Manaka ya Lukutakanu ya Sipesiali ya Kilumbu Mosi Sambu na Mvu 2010
1. (a) Inki bantu-dyambu ya mekatuka na Masonuku beto sadilaka na balukutakanu ya sipesiali ya kilumbu mosi ya bamvula meluta? (b) Keti kele ti mwa bangindu ya mfunu ya sikisiki ya balukutakanu ya kilumbu mosi ya melutaka yina kusadisaka nge na kisalu na nge ya kusamuna?
1 “Sola Mambu ya Kuluta Mfunu,” “Beno Vanda Kikesa Bonso Kibuka Mosi,” “Landa na Kutuba Kitemwe Sambu na Kyeleka,” mpi “Beto Kele Ntoto ya Tuma—Yehowa Kele Muwumbi na Beto.” (Filp. 1:9, 10, 27; Yoa. 18:37; Yez. 64:8, NW) Yai kele ndambu ya bantu-dyambu ya beto tubilaka na balukutakanu ya sipesiali ya kilumbu mosi ya melutaka. Keti nge kele na mpusa ya ngolo ya kukwenda na lukutakanu ya sipesiali ya kilumbu mosi ya mvu ya kisalu 2010? Ntu-dyambu na yo tavanda: “Ntangu Me Bika Diaka Mingi Ve,” mpi yo mesimbama na 1 Korinto 7:29.
2. Inki mutindu beto lenda sadisa bankaka na kuvanda na kyese sambu na lukutakanu yai?
2 Yantika kutubila manaka ya lukutakanu ya sipesiali ya kilumbu mosi na kyese yonso kukonda kusukinina banda na ntangu ya bo tazabisa dati na yo na dibundu na beno. Bibuti yankaka kesadisaka bana na bo na kuvingila lukutakanu yango na kusonikaka na kalandrie na bo ya dibuta dati na yo, mpi bima yina konso muntu ya dibuta fwete nata na lukutakanu, mpi bo ketangaka bilumbu ya mebikala na ntwala nde bo kuma na dati yango. Na nkokila ya Lusambu ya Dibuta na beno, beno lenda tadila dyaka banoti na beno ya balukutakanu ya sipesiali ya kilumbu mosi ya melutaka. Beno lenda bongisa mpi ntima na beno sambu na dyambu yai kana beno tadila dyaka mambu yina kele na mukanda Nzo-Nkanda ya Kisalu ya Teokrasi, na balutiti 13-16, sambu na kusadisa beno mpi mabuta na beno na ‘kukeba na mutindu yina ya beno kewaka mambu.’—Luka 8:18.
3. Inki mutindu beto lenda baka mambote mingi na mambu yina bo tatubila?
3 Sadila Mambu ya Nge Kelonguka: Mbala mingi na nima ya lukutakanu mosi ya nene, beto kewaka bangogo yai, “Lukutakanu yai kuvandaka kitoko mpenza!” Yo kevandaka ntangu yonso masonga, sambu yai kele mosi na kati ya bangidika ya mbote ya mekatuka na Yehowa. (Bing. 10:22) Sambu malongi yina kubuta bambuma, nge fwete yindulula yo mpi kubumba yo. (Luka 8:15) Ntangu beno kevutuka na nzo na nima ya lukutakanu, beno baka ntangu ya kutubila manaka yai na dibuta na beno to ti bantu yina beno kevutuka kumosi ti bo. Beno tubila balukanu ya konso muntu mpi bangindu yina tasadisa beno na kisalu na beno ya kusamuna. Kusala mutindu yai tasadisa beno na kubaka mambote ya malongi yango bantangu mingi na nima ya lukutakanu yai ya sipesiali.—Yak. 1:25.
4. Sambu na nki lukutakanu yai tasadisa beto mpenza?
4 Beto kekudiwaka mbote ntangu beto kebakaka dikabu mosi ya beto kele na yo mpenza mfunu. Keti beto kevingila ve ti mpusa ya ngolo mambu yina Yehowa mebumbila beto na lukutakanu na beto ya sipesiali ya kilumbu mosi ya kekwisa? Beto lenda ndima nde yo tasadisa beto mpenza na mitindu yonso. Beto lenda vingila na kubaka na Tata na beto ya zulu, Yehowa, dikabu ya mefwana yina tapesa beto kikesa mpi formasio sambu na kusala kisalu ya yandi mepesaka beto.—2 Tim. 4:2; Yak. 1:17.