‘Kaba Moyo na Nge’ na Balongoki na Nge
1. Yo kelombaka inki sambu na kusadisa longoki mosi ya Biblia?
1 Sambu na kusadisa longoki ya Biblia na mpila nde yandi kudipesa na Yehowa, yo kelombaka mambu mingi kuluta kaka kutwadisa kulonguka ya Biblia mbala na mbala ti yandi. Ntumwa Polo kufwanisaka bangwisana na yandi ti bantu yina yandi longaka ti bangwisana ya zola ya mama yina kenwisa kevandaka na yo sambu na bana na yandi. Beto mpi kesepelaka na kukaba “moyo na beto mosi” sambu na kusadisa balongoki na beto na kuyela na kimpeve.—1 Tes. 2:7-9.
2. Sambu na inki beto fwete monisa dikebi ya masonga, mpi inki mutindu beto lenda sala yo?
2 Tudila Yandi Dikebi ya Masonga: Ntangu longoki ya Biblia kesadila mambu yina yandi kelonguka, kansansa na yandi tapusa yandi na kuvukana dyaka ve ti bantu yina kewakanisaka ve luzingu na bo ti minsiku ya Biblia. (1 Pie. 4:4) Dibuta na yandi lenda buya yandi. (Mat. 10:34-36) Beto lenda sadisa yandi na kununga mawi ya kudimona yandi mosi na kumonisilaka yandi dikebi ya masonga. Misionere mosi ya kele na eksperiansi mingi kelongisila beto nde: “Kuyambula ve longoki nswalu na nima ya kumanisa kulonguka ya Biblia. Kana mpila kele, baka mwa ntangu fyoti mpi solula ti yandi.” Tula dikebi na longoki mpi pesa yandi lusadisu ya mefwana. Mu mbandu, keti nge lenda binga yandi na telefone to kukwenda kutala yandi kana yandi kebela? Keti nge lenda vanda kisika mosi ti longoki na nge na balukutakanu mpi kusadisa yandi na kukengila bana, kana mpila kele?
3. Inki mutindu beto lenda sadisa balongoki na beto na kubaka kikesa na dibundu?
3 Lusadisu ya Dibundu: Kana nge kesamuna penepene na nzo ya longoki na nge, sambu na inki ve kulutila yandi sambu na mwa ntangu fyoti mpi kusonga yandi mpangi yina beno kesamuna ti yandi? Kana mpila kele, lombaka mbala na mbala bansamuni ya kuswaswana, tanga mpi bankuluntu, na kukwenda kumosi ti nge sambu na kulonguka ti yandi. Dyaka, ntangu fyoti na nima ya kuyantika kulonguka ti yandi mbala na mbala, syamisa longoki na nge ya Biblia na kukwenda na balukutakanu na Nzo ya Kimfumu. Kusala mutindu yina tasadisa yandi na kusepela na kinduku ya mbote ti bampangi ya dibundu yina lenda kuma bantu ya dibuta na yandi ya kimpeve.—Mar. 10:29, 30; Baeb. 10:24, 25.
4. Inki mutindu beto lenda baka mbutu ya kikesa na beto?
4 Kibuti yina kesalaka ngolo sambu na kusadisa bana na yandi na kimpeve kevandaka na kyese mingi ntangu bana kebakaka lukanu ya kuvanda na lweka ya Yehowa mpi ya kutambula na kyeleka. (3 Yoa. 4) Beto lenda baka kyese ya mutindu mosi kana beto kaba moyo na beto sambu na kusadisa balongoki na beto ya Biblia.