Keti Mu Mefwana na Kusamuna?
1. Sambu na nki beto fwete yindula ve nde beto mefwana ve na kusamuna?
1 Kana kilumbu mosi nge kudiyula ngyufula ya mutindu yai, kudiyangisa ve! Yo kele ve malongi ya nzo-nkanda to mayele mingi yina beto butukaka ti yo kima kesalaka nde beto fwana na kuvanda baministre. Biblia ketuba nde balongoki yankaka ya mvu-nkama ya ntete kuvandaka “bantu ya mfunu mingi ve mpi nde bo me longukaka ve.” Ata mpidina, bo vandaka bansamuni ya mbote ya nsangu ya mbote sambu bo vandaka ti lukanu ya kulanda mbandu yina Yezu kupesaka.—Bis. 4:13; 1 Pie. 2:21.
2. Tubila mwa mambu ya metala kulonga ya Yezu.
2 Mutindu Yezu Vandaka Kulonga: Malongi na yandi kuvandaka pete, mpasi ve na kubakisa, mpi yo vandaka kutubila mambu ya sikisiki. Bangyufula, bingana, mpi bangogo na yandi ya luyantiku ya pete vandaka kubenda dikebi ya bawi na yandi. (Mat. 6:26) Yandi vandaka kumonisila bantu dikebi ya masonga. (Mat. 14:14) Dyaka, Yezu vandaka kutuba kukonda boma mpi ti kiyeka, sambu yandi vandaka kuzaba nde Yehowa kupesaka yandi kisalu mpi ngolo ya kulungisa kisalu yango.—Luka 4:18.
3. Inki mutindu Yehowa kesadisaka beto sambu na kulungisa kisalu na beto?
3 Yehowa Kesadisaka Beto: Na nzila ya Ndinga mpi ya organizasio na yandi, Longi na beto ya Nene kepesaka beto formasio yina beto kele na yo mfunu sambu na kusamuna nsangu ya mbote na mutindu ya mefwana mpenza. (Yez. 54:13) Sambu Yehowa kutaninaka disolo ya kemonisa mutindu Yezu vandaka kulonga, beto lenda tadila bametode na yandi mpi kulanda yo. Yehowa kepesaka beto mpeve santu na yandi mpi formasio na nzila ya balukutakanu ya dibundu. (Yoa. 14:26) Yandi kepesaka mpi bansamuni ya kele ti eksperiansi, bayina lenda sadisa beto na kukuma bansamuni ya kebuta bambuma mingi.
4. Sambu na nki beto kele ti bikuma ya kudimona nde beto mefwana na kuzabisa bankaka nsangu ya mbote?
4 Beto kele ti bikuma mingi ya kudimona nde beto mefwana na kusamuna, sambu “ngolo yina ya beto ke salaka kisalu yai yo ke katukaka na Nzambi.” (2 Kor. 3:5) Kana beto ketula ntima na Yehowa mpi kesadila mbote ti na kwikama yonso bangidika na yandi ya zola, beto “ta vanda na mpila ya mbote ya kusala konso kisalu ya mbote.”—2 Tim. 3:17.