Beto Monisa Ntonda Sambu na Dikabu ya Kuluta Nene ya Nzambi
1. Sambu na nki beto kemonisaka mingimingi ntonda na Yehowa?
1 Na ‘makabu mingi ya mbote’ ya Yehowa kepesaka, dikabu ya kuluta nene kele nkudulu yina Mwana na yandi ya yandi kezolaka kupesaka. (Yak. 1:17) Yo mekangulaka nzila na balusakumunu mingi, tanga mpi ndolula ya masumu na beto. (Ef. 1:7) Sambu na yo, beto kemonisaka ntonda ntangu yonso. Beto kebakaka ntangu ya kuyindulula dikabu yai ya mfunu mpenza mingimingi na nsungi ya Lusungiminu.
2. Inki mutindu beto lenda sadisa dibuta na beto mpi beto mosi na kumonisa ntonda sambu na nkudulu?
2 Beto Yedisa Ntonda: Sambu na kusadisa dibuta na beno na kumonisa ntonda na bamposo ya keyita Lusungiminu na Marsi 30, sambu na nki ve kusadila ntangu na beno ya nkokila ya Lusambu ya Dibuta sambu na kutadila dyaka mambu ya metala nkudulu? Dyaka, beno tadila lutangu ya sipesiali ya Biblia sambu na Lusungiminu konso kilumbu na dibuta. Yindulula mambote yina nkudulu menatilaka nge mpi bupusi na yo na mutindu na nge ya kutadila Yehowa, nge mosi, bankaka, mpi makwisa. Beno tamona mpi mbote na kumeka kuyimba mbala na mbala bankunga zole ya mpa yina beto tayimba na Lusungiminu, kana beno mezwa dezia mukanda ya bankunga ya mpa.—Nk. 77:13.
3. Inki mutindu beto lenda monisa ntonda na beto?
3 Mitindu ya Kumonisa Ntonda: Ntonda sambu na nkudulu kepusaka beto na kuzabisa bankaka mambu ya metala Yehowa mpi zola na yandi ya nene na mutindu yandi tindaka Mwana na yandi. (Nk. 145:2-7) Na nsungi ya Marsi, Aprili, mpi Mayi, mabuta yankaka kemonisaka ntonda na bo na kubakaka bangidika na mpila nde ata muntu mosi ya dibuta kusala kisalu ya kimupasudi-nzila nsadisi. Kana mpila ya kusala mutindu yai kele ve, keti nge lenda sumba ntangu sambu na kusala mingi na kisalu ya kusamuna? (Ef. 5:16) Ntonda tapusa beto mpi na kusadisa bankaka na kuvukana ti beto na Lusungiminu. (Kus. 22:17) Yantika kusala lisiti ya bamvutukila ya mpa, balongoki ya Biblia, bampangi ya fami, banduku ya kisalu, mpi bamfinangani yina nge tabingisa, ebuna sala yonso yina nge lenda sala na kampanye ya kukabula emvitasio ya sipesiali ya Lusungiminu.
4. Na nki mitindu beto lenda sadila nsungi ya Lusungiminu na mayele yonso?
4 Nsungi ya Lusungiminu kepesaka mabaku ya mpa ya kumonisa na Yehowa kiteso ya ntonda na beto na dikabu ya yandi mepesaka bantu. Bika beto sadila ntangu yai sambu na kuyedisa mpi kumonisa ntonda na beto sambu na nkudulu mpi “kimvwama ya kukonda nsuka ya Kristo.”—Ef. 3:8.