Keti Mambu ya Mu Kesala Mefwana?

1. Inki basusi Mukristu ya kwikama lenda vanda na yo?

¹ Keti nge mekudiyulaka dezia ngyufula yai? Mbala yankaka ntangu ya nge kelutisaka na kisalu ya kusamuna mekulumukaka sambu na kimununu, mavimpi, to mikumba mingi ya dibuta, mpi yo mesalaka nde nge lemba nitu. Mpangi-nkento mosi ya kele ti bana tatu kusonikaka nde bantangu yankaka yandi kemonaka nde yandi kele na foti sambu ntangu mpi ngolo ya yandi kele na yo mfunu sambu na kukeba dibuta na yandi ketulaka bandilu na mambu yina yandi lenda sala na kisalu ya kusamuna. Inki tasadisa beto na kumona mambu na bukatikati?

2. Inki Yehowa kelombaka beto?

² Mambu Yina Yehowa Kelombaka Beto: Ntembe kele ve nde, beto yonso kezolaka kusala mingi na kisalu ya kusamuna. Kansi mbala mingi luswaswanu ya nene kevandaka na kati ya mambu yina beto kezolaka kusala mpi mambu yina beto lenda fwana mpenza na kusala. Mutindu beto kezolaka kusala mingi kemonisa nde beto kesepelaka ve na kusala ndambu. Beto fwete yibuka nde Yehowa kezabaka mbote bandilu na beto mpi yandi kelombaka beto ve mambu yina beto lenda kuka ve na kusala. (Nk. 103:13, 14) Inki yandi kelombaka beto? Yandi kezolaka nde beto sadila yandi na ntima ya mvimba, disongidila kupesa yandi bima na beto ya kuluta mbote.—Kol. 3:23.

3. Inki mutindu beto lenda tesa bikesa ya beto kesalaka na kisalu ya kusamuna?

³ Inki tasadisa beto na kuzaba mambu yina beto mefwana mpenza na kusala? Beto lenda lomba Yehowa na kusadisa beto na kumona luzingu na beto na mutindu ya mefwana. (Nk. 26:2) Nduku mosi ya Mukristu ya kuyela mpi ya beto ketudilaka ntima yina mezaba beto mbote mpi kele ve na boma ya kuzabisa beto kana yo kelomba nde beto tomisa mambu lenda sadisa beto mpi. (Bing. 27:9) Beto fwete yibuka mpi nde sambu luzingu na beto lenda soba, yo kele mfunu na kutesa yo mbala na mbala.—Ef. 5:10.

4. Inki mutindu beto fwete tadila bangibusa ya mekatuka na Biblia ya ketadila kisalu ya kusamuna?

⁴ Mutindu ya Kutadila Bangibusa: Ntangu bantu kesalaka nsaka ya kubaka ntinu, mbala mingi bantu yina ketalaka bo ketubaka na ndinga ya ngolo mambu ya kepesa kikesa. Bo kesalaka yo sambu na kusadisa bantu ya kebaka ntinu na kulungisa lukanu na bo, kansi ve sambu na kulembisa bo. Mutindu mosi, bandongisila mpi bangibusa ya mekatuka na Biblia ya bo kepesaka na balukutakanu mpi na mikanda na beto ya kelombaka beto na ‘kutula ngolo na kuzabisa nsangu’ kevandaka sambu na mambote na beto mpi yo ketendulaka ve nde bikesa na beto kele fyoti na kiteso mosi buna. (2 Tim. 4:2) Beto lenda tula ntima nde na ntangu beto kelanda na kupesa bima na beto ya mbote, Yehowa tayibuka mpi tasakumuna ‘zola mpi bisalu’ na beto.—Baeb. 6:10.