Bambuma Meyela Ntangu ya Kukatula Yo Melunga
1. Inki kele kisalu ya mfunu yina ke na kusalama?
1 Na nima ya kuta kimbangi na nkento mosi ya Samaria, Yezu kusongaka balongoki na yandi nde: “Beno tala mbote bilanga: Bambuma me yela, ntangu me kuma penepene na kukatula yo.” (Yoa. 4:35, 36) Kisalu ya kukatula bambuma ya kimpeve vandaka na kusalama, mpi Yezu lendaka kumona na ntwala mutindu kisalu yango zolaka kuyalumuka na nsi-ntoto ya mvimba. Katuka na kiyeka na yandi na zulu, Yezu landaka na kutula dikebi na kisalu ya kukatula bambuma. (Mat. 28:19, 20) Inki kele banzikisa ya kemonisa nde kisalu yai kelanda na kukuma ngolo mutindu yo kekuma na nsuka na yo?
2. Inki kuyela kemonisa nde kisalu ya kukatula bambuma ke na kusalama ngolo na nsi-ntoto ya mvimba?
2 Kisalu ya Kukatula Bambuma na Nsi-Ntoto ya Mvimba: Na nsungi ya mvula ya kisalu 2009, ntalu ya bansamuni na nsi-ntoto ya mvimba kumataka na 3,2 na kati ya nkama. Na bansi yina ya bo buyisaka kisalu ya kusamuna, ntalu ya bansamuni kumataka na 14 na kati ya nkama. Ntalu ya balongoki ya Biblia ya konso ngonda kulutaka 7 619 000—ntalu yina meluta ntalu ya kuluta nene ya bansamuni mpi yo meluta ntalu ya balongoki ya Biblia ya kupesamaka na mvula ya meluta na kiteso ya 500 000. Mutindu kisalu ke na kuyalumuka na babwala mingi, yo kelomba nde bamisionere mingi kukwenda na Gileadi sambu na kubaka formasio. Na bansi mingi, kuyela ya ngolo ke na kusalama na bateritware ya ndinga ya banzenza. Yo kemonana nde Yehowa ke na kusasukisa kisalu na nsungi ya nsuka ya kisalu ya kukatula bambuma. (Yez. 60:22) Keti nge kele ti ngindu ya mbote na yina metala “bilanga” na teritware na nge?
3. Bantu yankaka lenda sukisa na kutuba inki na yina metala kisika na bo ya kukatula bambuma?
3 Kisika na Nge ya Kukatula bambuma: Bantu yankaka lenda tuba nde “teritware na munu kebuta mpenza ve bambuma.” Yo kele kyeleka nde bateritware yankaka kemonanaka bonso nde yo kebutaka ve bambuma to yo kebutaka dyaka ve bambuma mingi mutindu yo vandaka na ntama. Yo yina, Bambangi yankaka lenda sukisa na kutubaka nde kisalu ya kukatula bambuma memanaka dezia na bisika yina mpi nde ntangu yai yo me fyotunaka kisalu na bo sambu bo mekumaka kusosa bantu fyoti yina mebikalaka. Keti yo kele mpenza kyeleka?
4. Inki mabanza ya mbote beto fwete yedisa ya metala kisalu na beto, mpi sambu na inki?
4 Banda na luyantiku tii na nsuka na yo, kukatula bambuma kevandaka kisalu mosi ya ngolo mpenza. Tala bangogo yai ya Yezu ya kemonisa mfunu ya kusala mambu kukonda kusukinina: “Bambuma mingi kele na bilanga, kansi bantu ya kisalu kele mingi ve sambu na kukatula yo. Beno bondila munkwa-bilanga na kutinda bantu ya nkaka ya kisalu sambu na kukatula bambuma na yandi.” (Mat. 9:37, 38) Yehowa munkwa-bilanga, muntu mezaba ntangu mpi kisika yina yo tasuka. (Yoa. 6:44; 1 Kor. 3:6-8) Inki kele mukumba na beto? Biblia kepesa mvutu: “Kuna bima na nge na suka ti na nkokila mpi.” (Lo. 11:4-6) Ya kyeleka, ntangu kisalu ya kukatula bambuma kekuma na nsuka na yo, yo kele ve ntangu ya kulembisa maboko!
5. Sambu na inki beto fwete landa kusamuna ti kikesa na teritware yina kemona nde yo kebuta mbuma ve?
5 Landa na Kukatula Bambuma: Ata beto mesalaka teritware na beto mbala na mbala mpi yo kemonanaka nde yo kebuta mbuma ve, kele ti bikuma ya mbote ya kusala ti kikesa mpi kukonda kusukinina. (2 Tim. 4:2) Bansoba ya nene yina kesalama na nsi-ntoto kepusa bantu na kusoba nkadilu na bo mpi na kuyindula mingi na yina metala makwisa. Mutindu baleke kekuma bambuta bo lenda vanda na mfunu ya kuzwa lutaninu mpi ngemba ya mabanza. Kikalulu na beto ya kukwamina lenda yitukisa bantu yankaka. Ya kyeleka, bantu yina kuwaka ve nsangu na beto lenda ndima yo. Beto fwete kebisa ata bantu yina kebuyaka na luzolo yonso nsangu na beto.—Ezek. 2:4, 5; 3:19.
6. Kana teritware na beto kele mpasi, nki tasadisa beto na kutanina kikesa na beto?
6 Kana teritware na beto kele mpasi, nki tasadisa beto na kutanina kikesa na beto? Ziku beto lenda yika na kisalu na beto ya nzo na nzo mitindu yankaka ya kisalu ya kusamuna, mu mbandu kuta kimbangi na bisika ya mumbongo to na telefone. To beto lenda soba bangogo na beto ya kukotila na masolo na mpila nde beto lenda solula ti bantu mbote. Beto lenda soba manaka na beto mpi kuyantika kusamuna na nkokila to ziku na bantangu yankaka yina bantu kevandaka mingi na nzo. Mbala yankaka beto lenda longuka ndinga mosi ya mpa sambu na kuzabisa bantu mingi nsangu ya mbote. Beto lenda yalumuna kisalu na beto na kusalaka mbala na mbala kisalu ya kimupasudi-nzila. To beto lenda kwenda kisika yina bansadi ya kekatulaka bambuma kele fyoti. Kana beto kele na mabanza ya mbote na yina metala kukatula bambuma, beto tasala bikesa sambu na kusala mingi na kisalu yai ya mfunu mingi.
7. Tii inki ntangu beto fwete sala kisalu ya kuvukisa bantu?
7 Bantu ya kesalaka bilanga kevandaka ti ntangu fyoti ya kuvukisa bimenina, yo yina bo kepemaka ve to kelembaka ve tii kisalu yina kekumaka na nsuka. Kukatula bambuma ya kimpeve kelombaka mpi kusala mambu kukonda kusukinina. Tii inki ntangu beto fwete sala kisalu ya kuvukisa bantu? Yantika na nsungi ya “nsuka ya ngidika ya bima” (NW) tii na “nsuka.” (Mat. 24:14; 28:20) Mutindu Ministre ya ntetentete ya Yehowa kusalaka, beto kezola kumanisa kisalu yina bo mepesaka beto. (Yoa. 4:34; 17:4) Yo yina, bika beto landa kusala kisalu na beto ya kusamuna ti kikesa, kyese, mpi ti mabanza ya mbote tii na nsuka. (Mat. 24:13) Kukatula bambuma memana ntete ve!
[Bangogo sambu na kubenda dikebi ya kele na lutiti 2]
Banda na luyantiku tii na nsuka na yo, kukatula bambuma kevandaka kisalu mosi ya ngolo mpenza