Kisambu mpi Kuyindulula Kele Mfunu Sambu na Bansamuni ya Kikesa
1. Inki kusadisaka Yezu na kubuya mambu yina lendaka kukatula dikebi na yandi na kisalu na yandi ya ntete-ntete?
1 Yezu kulutisaka mpimpa ya mvimba na kubelula bantu mpi na kubasisa bampeve ya mbi. Ntangu balonguki na yandi kumonaka yandi kilumbu kulandaka, bo songaka yandi nde: “Bantu yonso ke sosa nge,” mpi bo syamisaka yandi na kulanda kusala bimangu na yandi. Kansi, Yezu lendaka ve kubika mambu yankaka kukatula dikebi na yandi na kisalu na yandi ya ntete ya kusamuna nsangu ya mbote. Yandi vutudilaka bo nde: “Beto kwenda na kisika ya nkaka na babwala yai kele awa penepene, sambu mono kwenda kulonga mpi kuna. Sambu yo kele mambu ya mono kwisilaka.” Inki kusadisaka Yezu na kutanina kisalu na yandi na kisika ya ntete? Yandi vandaka kutelama na sukasuka sambu na kusamba mpi kuyindulula. (Mar. 1:32-39) Inki mutindu kisambu mpi kuyindulula lenda sadisa beto mpi na kuvanda bansamuni ya kikesa?
2. Inki mambu beto lenda yindulula ya lenda sadisa beto na kutanina kikesa na beto na kisalu ya kusamuna?
2 Kuyindulula na Inki? Yezu kumonaka nde bantu vandaka “me lemba, kikesa ve, bonso mameme me konda ngungudi ya kutala bo.” (Mat. 9:36) Mutindu mosi, beto lenda yindulula mutindu yina bantu kele mpenza na mfunu ya nsangu ya mbote. Beto lenda yindulula mutindu ntangu yina mebikala kele fyoti. (1 Kor. 7:29) Beto lenda yindulula bisalu mpi bikalulu ya Yehowa, dibaku ya beto kele na yo ya kuvanda Bambangi ya Yehowa, mpi bimvwama ya mfunu ya kimpeve ya beto melongukaka na ndinga ya Nzambi yina kele tii ntangu yai ya kukonda kuzabana na bantu ya teritware na beto.—Nk. 77:12-14; Yez. 43:10-12; Mat. 13:52.
3. Inki ntangu beto lenda kuyindulula?
3 Kuyindulula Inki Ntangu? Mutindu Yezu kusalaka yo, bantu yankaka ketelamaka na suka-suka ntangu makelele kevandaka ve. Bankaka kemonaka mbote na kuyindulula na nkokila na ntwala ya kulala. (Kuy. 24:63) Ata beto kele ti bima mingi ya kusala, beto lenda zwa ntangu ya kuyindulula. Bankaka kesalaka yo ntangu bo kebakaka transpore ya bantu yonso. Bankaka kebakaka kitini ya ntangu na ntangu na bo ya kupema na midi sambu kuyindulula kukonda kukatula dikebi. Bantu mingi kemonaka nde kuyindulula na ntwala ya kukwenda na kisalu ya kusamuna, ata sambu na mwa minuta fyoti, kesadisaka bo na kusamuna ti kikesa mingi.
4. Sambu na nki beto fwete yindululaka?
4 Kisambu mpi kuyindulula takumisa ngolo mpusa na beto ya kusadila Yehowa, tasadisa beto na kutadila lusambu na beto bonso kima ya kuluta mfunu na luzingu na beto, mpi takumisa ngolo lukanu na beto ya kulanda kusamuna. Yezu Ministre ya Ntete ya Nzambi, kubakaka mambote na kuyindululaka, beto mpi tabaka mambote.