Lusadisu Sambu na Mabuta
1. Inki mambote mabuta ya Izraele vandaka kubaka na Kisabatu ya konso mposo?
1 Kuzitisa Kisabatu kuvandaka ngidika mosi ya zola yina Yehowa kubakaka sambu na mambote ya mabuta. Bantu ya Izraele vandaka kupema na kisalu na bo ya konso kilumbu, mpi kuyindulula na mambote ya Yehowa mpi na bangwisana na bo ti yandi. Bibuti lendaka kusadila ntangu yina sambu na kulonga bana na bo Nsiku ya Nzambi mpi kukotisa yo na ntima ya bana na bo. (Kul. 6:6, 7) Konso mposo Kisabatu vandaka kupesa bantu ya Yehowa dibaku ya kuzwa ntangu ya kutula dikebi na bangwisana na bo ti Yehowa.
2. Kisabatu kelonga beto nki na yina metala Yehowa?
2 Ya kyeleka Yehowa kelombaka dyaka ve mabuta na kuzitisa Kisabatu. Kansi, nsiku yai kelonga beto dyambu mosi na yina metala Nzambi na beto. Yandi ketulaka ntangu yonso dikebi ya ngolo na mavimpi ya kimpeve ya bantu na yandi. (Yez. 48:17, 18) Bubu yai, ngidika ya nkokila ya Lusambu ya Dibuta kemonisaka mpi nde Yehowa ketudilaka bantu na yandi dikebi ya zola.
3. Inki kele kikuma ya nkokila ya Lusambu ya Dibuta?
3 Inki Kele Kikuma ya Nkokila ya Lusambu ya Dibuta? Na Yanuari 2009, Kulonguka ya Mukanda ya Dibundu yantikaka kusalama nkokila mosi ti Nzo-Nkanda ya Kisalu ya Teokrasi mpi Lukutakanu ya Kisalu. Kikuma mosi na kati ya bikuma yina bo salaka nsoba yai kuvandaka ya kupesa mabuta dibaku ya kukumisa kimpeve na bo ngolo na kubongisaka nkokila mosi konso mposo sambu na lusambu ya dibuta. Bo syamisaka konso dibuta na kusoba manaka ya kulonguka ya dibuta, kana mpila kele, sambu na kusala yo nkokila ya kilumbu yina bo vandaka kusala kulonguka ya mukanda, mpi kusadila ntangu yina sambu na kusolula mambu ya Biblia na ntima madidi mpi kulonguka na mutindu ya kewakana ti bampusa ya dibuta.
4. Keti dibuta fwete sala kaka ngunga mosi na nkokila ya Lusambu ya Dibuta? Tendula.
4 Sambu na kukwenda na Kulonguka ya Mukanda ya Dibundu, beto vandaka kubaka ntangu sambu na kusoba bilele, kusala nzyetelo, mpi kusala bikesa ya mutindu ya nkaka. Sambu na bampangi mingi kati na beto, kukwenda na lukutakanu yai ya ngunga mosi vandaka kudia kitini ya nene ya ntangu ya nkolila. Nsoba yai na manaka ya balukutakanu na beto mepesaka beto ntangu ya kuvukana na nkokila yina sambu na kusambila Yehowa na dibuta. Yo yina, beto fwete sosa ve kusala kaka ngunga mosi na nkokila ya Lusambu ya Dibuta. Kansi, beto fwete yindula na yina metala bampusa mpi bandilu ya dibuta na beto sambu na kutala bantangu ikwa nkokila ya Lusambu ya Dibuta lenda baka sambu na kulungisa bampusa yango.
5. Keti dibuta fwete lutisa ntangu yonso kaka na kulonguka ya kimvuka? Tendula.
5 Keti Dibuta Fwete Lutisa Ntangu Yonso Kaka na Kulonguka ya Kimvuka? Ntangu bankwelani mpi mabuta yina kele ti bana kelonguka na kimvuka mambu ya kele na kati ya Biblia, bo kepesanaka kikesa. (Roma 1:12) Bangwisana ya dibuta kekumaka ngolo. Yo yina, kulonguka ya Masonuku fwete vanda diambu ya kuluta mfunu na nkokila ya Lusambu ya Dibuta. Kansi, konso muntu na dibuta lenda baka ntangu ya kulonguka yandi mosi. Mumbandu, na nima ya kulonguka ya kimvuka, dibuta lenda bikala kisika mosi kansi konso muntu kelonguka yandi mosi, mbala yankaka yandi kemanisa kudibongisa sambu na balukutakanu to na kutanga baperiodike. Mabuta yankaka kebakaka lukanu ya kukanga televizio na nkokila yina.
6. Inki mutindu beno lenda twadisa disolo?
6 Inki Mutindu Beno Lenda Twadisa Disolo? Yo kelomba kaka ve nde beno twadisa disolo na bangyufula mpi bamvutu. Sambu nkokila ya Lusambu ya Dibuta kuvanda tiya-tiya mpi kitoko, mabuta mingi mesalaka manaka mutindu mosi ti ya balukutakanu na beto ya konso mposo. Bo kekabisaka kulonguka na bo na bitini mingi mpi kesalaka yo na mitindu ya kuswaswana. Mumbandu bo lenda tanga Biblia na kimvuka, kuyidika kitini ya balukutakanu, mpi kusala bansonga sambu na kisalu ya kusamuna. Lutiti 6 kepesa mwa bandongisila.
7. Bibuti fwete sala kikesa sambu kulonguka kusalama nki mutindu?
7 Bibuti Fwete Sala Kikesa Sambu Kulonguka Kusalama Nki Mutindu? Dibuta na beno talonguka mbote mpenza kana beno kesala mambu na zola mpi na ngemba. Bantangu yankaka beno lenda longuka na nganda kana climat kele ya mbote. Yo kele mbi ve na kupema fyoti kana beno memona nde yo ke mfunu. Na nima ya kulonguka, mabuta yankaka kebakaka ntangu ya kudya mpi kunwa mwa kima. Bibuti fwete sadila ve ntangu ya nkokila ya Lusambu ya Dibuta sambu na kunganina to kupesa bana na bo ndola; ata mpidina, yo lenda vanda mbote nde bo tubila mpi dyambu mosi ya mfunu yina bo waka to yina bantu kuzabisaka bo. Kansi, kana kele ti dyambu mosi ya mpasi yina ketadila mwana mosi, yo tavanda mbote mingi na kutubila yo na kingenga ti yandi na ntangu yankaka sambu na kupesa yandi ve nsoni na ntwala ya bampangi na yandi. Nkokila ya Lusambu ya Dibuta fwete vanda ve madidi-madidi to kupesa bantu ya dibuta boma, kansi yo fwete monisa kyese ya Nzambi yina beto kesambilaka.—1 Tim. 1:11.
8, 9. Bo kelomba bantwadisi ya mabuta na kudibongisa nki mutindu?
8 Inki Mutindu Ntwadisi ya Dibuta Lenda Kudibongisa? Dibuta tabaka mambote ya mingi kana ntwadisi ya dibuta kekudibongisa na ntwala sambu na konso nkokila ya Lusambu ya Dibuta, na kutadilaka mambu yina bo fwete longuka mpi mutindu ya mbote ya kulongukila yo. (Bing. 21:5) Yo tavanda mbote nde bakala kusolula ti nkento na yandi sambu na mambu yango. (Bing. 15:22) Bantwadisi ya mabuta, keti bantangu yankaka beno lenda yula bana na beno mambu yina bo kezola kulonguka? Kana beno sala mpidina, beno tazaba mbote mambu yina kesepedisa bo mpi bampusa na bo.
9 Bamposo yankaka ntwadisi ya dibuta talutisa ve ntangu mingi na kudibongisaka. Na kusalaka mpidina, dibuta tavanda na kyese ya kusala mambu yina bo kesalaka konso mposo; mpi ntwadisi ya dibuta tavanda ve ti mfunu ya kusala manaka ya mpa konso mposo. Yandi lenda mona nde yo kele mbote na kudibongisa na nima ya konso kulonguka ya dibuta, sambu na ntangu yina bampusa ya kimpeve ya dibuta na yandi kele ntete na mabanza. Bantwadisi yankaka ya mabuta kesonikaka mwa manaka mpi ketulaka yo na kisika yina dibuta lenda mona yo kukonda mpasi, mumbandu na zulu ya frigo. Yo kepusaka dibuta na kuyilama mpi kepesaka bo ntangu ya kufwana sambu na kudibongisa na ntwala.
10. Inki mutindu bantu yina kezingaka bo mosi lenda sadila nkokila ya Lusambu ya Dibuta?
10 Inki Mu Fwete Sala Kana Mono Kezingaka Mono Mosi to Kana Mono Kele Kaka Mono Mosi Mbangi ya Yehowa na Dibuta? Bayina kezingaka bo mosi lenda sala kulonguka ya bo mosi na kisika ya nkokila ya Lusambu ya Dibuta. Manaka ya mbote ya kulonguka ya muntu yandi mosi fwete vanda ti mambu yai: Lutangu ya Biblia, kudibongisa sambu na balukutakanu mpi lutangu ya Nzozulu ya Nkengi mpi Réveillez-vous ! Bansamuni yankaka mebakaka lukanu ya kuyika mambu yai na kati ya mambu ya bo kelongukaka bo mosi. Bantangu yankaka, bo lenda sosa kubingisa nsamuni yankaka to dibuta yankaka na kuvukana ti bo sambu na kusolula mambu ya kimpeve yina ketungaka.
11, 12. Inki kele mwa mambote ya kuvanda mbala na mbala ti nkokila ya Lusambu ya Dibuta?
11 Inki Kele Mambote ya Kusala Mbala na Mbala Nkokila ya Lusambu ya Dibuta? Bantu yina kekudipesaka na ntima ya mvimba na lusambu ya kyeleka kepusanaka penepene ya Yehowa. Dyaka, mabuta yina kesambaka na kimvuka kekumisaka bangwisana na bo ya dibuta ngolo. Bankwelani mosi kusonikaka mambu yai kelanda sambu na mambote ya bo mebakaka: “Mutindu beto kele bapasudi-nzila yina kele ve ti bana, beto kevingilaka na kyese yonso nkokila ya Lusambu ya Dibuta na beto. Beto kemonaka nde bangwisana na beto mosi mpi bangwisana na beto ti Tata na beto ya zulu kekumaka ngolo. Ebuna, ntangu beto kekumaka kilumbu ya beto meyidikaka sambu na kulonguka kumosi, mosi na kati na beto ketubaka nde: ‘Nge kezaba mambu yina tasalama na nkokila? Lusambu ya Dibuta!’”
12 Ngidika ya kuvanda ti nkokila mosi sambu na Lusambu ya Dibuta kesadisaka mpi mabuta yina kevandaka ve ti ntangu mingi. Mama mosi ya kele mupasudi-nzila mpi kesansaka bana na yandi zole ya babakala yandi mosi, kusonikaka nde: “Na bilumbu meluta, kulonguka ya dibuta na beto vandaka kusalama na mpasi. Yo vandaka kusalama ve mbala na mbala mpi yo vandaka kuwakana ve ti bampusa ya dibuta na beto sambu mu vandaka ya kulemba. Mu vandaka kubakisa ve mutindu ya kuyidika mambu. Yo yina, mono kesonikila beno sambu na kutonda beno mingi mpenza sambu na nkokila ya Lusambu ya Dibuta. Beto mekumaka kulonguka mbala na mbala na dibuta mpi beto kebakaka mambote na yo.”
13. Inki kemonisa kiteso ya mambote yina dibuta na nge tabaka na ngidika yai?
13 Bonso Kisabatu, nkokila ya Lusambu ya Dibuta lenda sadisa mabuta sambu yo kele dikabu ya mekatuka na Tata na beto ya zulu. (Yak. 1:17) Mutindu mabuta ya Izraele vandaka kusadila Kisabatu vandaka ti bupusi na kiteso ya mambote ya kimpeve yina bo vandaka kubaka. Bubu yai mpi, mutindu beto kesadilaka nkokila yina mabuta kevandaka na yo sambu na lusambu ya dibuta kevandaka ti bupusi na kiteso ya mambote yina dibuta na beto tabaka. (2 Kor. 9:6; Gal. 6:7, 8; Kol. 3:23, 24) Kana beno kesadila na mutindu ya mbote ngidika yai, dibuta na beno lenda vanda mpi ti mawi ya kiteso mosi ti muyimbi-bankunga yina kuyimbaka nde: “Kansi mono, mbote mpenza na kuvanda penepene na nge Nzambi! Mono me tulaka ntima na mono na nge Mfumu Nzambi yina ke taninaka mono.”—Nk. 73:28.
[Bangogo sambu na kubenda dikebi ya kele na lutiti 5]
Nkokila ya Lusambu ya Dibuta fwete vanda ve madidi-madidi to kupesa bantu ya dibuta boma, kansi yo fwete monisa kyese ya Nzambi yina beto kesambilaka
[Lupangu ya lutiti 6]
BUMBA
Mwa Bangindu Sambu na Nkokila ya Lusambu ya Dibuta
Biblia:
• Beno tanga kumosi kitini ya lutangu ya Biblia ya mposo na mposo. Bo mesonikaka masolo yankaka ya Biblia na mpila nde muntu mosi lenda tanga disolo, mpi bankaka lenda tanga bangogo ya bantu ya kuswaswana yina disolo ketubila.
• Beno sala bonso nsonga kitini ya lutangu ya Biblia.
• Beno pesa konso muntu ya dibuta mukumba ya kutanga na ntwala bakapu ya Biblia yina beno ponaka mpi ya kusonika ngyufula mosi to bangyufula zole yina yandi kele na yo sambu na mambu ya yandi me tanga. Mpi beno sosa kumosi bamvutu na bangyufula ya konso muntu.
• Konso mposo beno yidika kifwanisu mosi mpi beno tula verse ya Biblia na kati mpi beno meka kukanga yo na ntu mpi kutendula yo. Beno vukisa bifwanisu yonso, mpi beno tadila yo dyaka konso mposo sambu na kuzaba kiteso ya masonuku yina beno tayibuka.
• Beno widikila lutangu ya Biblia mpi, na ntangu yina, beno sadila Biblia sambu na kulanda mambu ya bo ketuba.
Balukutakanu:
• Beno bongisa kumosi kitini mosi ya balukutakanu.
• Beno longuka bankunga ya Kimfumu yina bo meyidika sambu na mposo ya kekwisa.
• Kana muntu mosi kele ti disolo na Nzo-Nkanda ya Kisalu ya Teokrasi to nsonga na Lukutakanu ya Kisalu, beno tubila mutindu ya kusala yo to beno meka kusala repetisio na yo na ntwala ya dibuta.
Bampusa ya Dibuta:
• Beno tadila masolo yina kele na mikanda Les jeunes s’interrogent to Longuka na Longi ya Nene.
• Beno baka ntangu ya kusala bansonga ya kemonisa mutindu ya kununga mambu yina bana lenda kutana na yo na nzo-nkanda.
• Beno sala nsonga yina bibuti ti bana kesoba mikumba na bo. Bana lenda sala bansosa na disolo mosi mpi kusala bonso nde bo kelonga bibuti.
Kisalu ya Kusamuna:
• Beno baka ntangu ya kusala bansonga sambu na kuyidika bangogo ya kukotila na masolo na kisalu ya kusamuna.
• Beno solula sambu na kubaka balukanu yina beno lenda lungisa kukonda mpasi na mpila nde dibuta kulutisa ntangu mingi na kisalu ya kusamuna na nsungi ya Lusungiminu to na konzie.
• Beno pesa konso muntu ya dibuta mwa ntangu sambu na kusosa mutindu ya kupesa mvutu na bangyufula ya mutindu na mutindu yina bantu lenda yula na kisalu ya kusamuna, mpi beno sala bansonga.
Bangindu Yankaka:
• Beno tanga kumosi disolo mosi ya kele na baperiodike ya mpa.
• Beno songa konso muntu ya dibuta na kutanga na ntwala disolo mosi yina kesepedisa yandi na periodike ya mpa, mpi na nima beno lomba yandi na kutubila yo.
• Bantangu yankaka, beno bingisa nsamuni mosi to bankwelani na kuvukana ti beno na Lusambu ya Dibuta mpi beno lenda yula bo bangyufula.
• Beno tala video mosi na kati ya bavideo na beto mpi beno tubila yo.
• Beno tubila na kimvuka masolo “ Les jeunes s’interrogent ” to “ Apprenons en famille, ” yina kevandaka na Réveillez-vous !
• Beno tubila na kimvuka masolo “ Enseignez vos enfants ” to “ Pour nos jeunes lecteurs, ” yina kevandaka na Nzozulu ya Nkengi ya Kifalansa.
• Beno tanga mpi beno tubila kitini mosi ya Annuaire ya mpa to ya mukanda mosi ya mpa yina kubasikaka na lukutakanu ya distrike ya mekatuka kuluta.
• Kana beno memanisa lukutakanu ya distrike to lukutakanu yankaka ya nene, beno tadila mambu ya mfunu yina bo tubilaka na lukutakanu yango.
• Beno tala lugangu ya Yehowa, mpi beno tubila mambu yina yo kelonga beto na yina metala Yehowa.
• Beno longuka mutindu ya kusala dyambu mosi na kimvuka, mumbandu kifwanisu ya kemonisa kima mosi buna, to karti mosi.