‘ Rends pleinement témoignage au sujet du Royaume de Dieu ’
1. Inki beto tatadila na Kulonguka ya Biblia ya Dibundu na mposo ya keyantika na Marsi 14?
1 Na mposo ya Marsi 14, 2011, beto tayantika kulonguka mukanda ‘ Rends pleinement témoignage au sujet du Royaume de Dieu ’ na Kulonguka ya Biblia ya Dibundu na Cibemba, na Kingelesi, na Kifalansa, mpi na Swahili. Mukanda yai ketubila mukanda ya Bisalu na mutindu mosi ya kesadisa mutangi na kuwa kyese ya mambu yina kele na kati na mutindu yo kelungana nswalu. Na kisika ya kutubila verse mosi-mosi, mukanda Rends témoignage ketubila malongi yina mekatuka na masolo yina kele na mukanda ya Bisalu mpi kesadisa beto na kumona mutindu beto lenda sadila yo.—Roma 15:4.
2. Tendula mwa mambu yina kele na mukanda Rends témoignage.
2 Mambu Yina Kele na Mukanda: Bangogo ya luyantiku ya lutiti 2 kele mukanda mosi ya zola ya mekatuka na Nto-Kimvuka yina kemonisa nde bo kezola mpenza beto baka mambote na mukanda yai. Kubanda na kapu ya 2, kele ti nsa mosi ya ketendula mambu ya mfunu ya konso kapu mpi verse ya kemonisa kitini ya mukanda ya Bisalu yina beto tatadila. Bakapu mingi kele ti balupangu yina kepesa bansangu ya kesadisa na kubakisa mbote bantu, bisika ya bo zingaka, to mambu yina kusalamaka. Bisika yina bo mebika ya mpamba na lweka ya konso lutiti tasadisa beto na kusonika mambu ya mfunu. Mukanda yango kele ti bifwanisu ya kitoko ya ketendula mambu mingi mpenza ya Biblia ketubilaka sambu na kusadisa beto na kumona na mabanza mambu ya mfunu; mpi lutiti ya nsuka kele ti index ya bifwanisu yina kesadisa na kutendula nki bo memonisa na kati ya bifwanisu ya kuswaswana. Kana beto balula lutiti ya zulu ti ya nsuka, beto tamona bakarte yina tasadisa beto na kubakisa kuyela ya bampangi na beto ya mvu-nkama ya ntete ntangu bo vandaka kumwanga nsangu ya mbote “tii na nsuka ya ntoto.”—Bis. 1:8.
3. Kulonguka na beto ya mukanda ya Bisalu tapesa mvutu na nki bangyufula ya mfunu?
3 Bamvutu na Bangyufula ya Mfunu: Kulonguka ya mukanda ya Bisalu tasadisa beto na kubakisa na pwelele yonso bamvutu na bangyufula ya mfunu na yina metala kisalu ya kusamuna. Mu mbandu, inki kisalu mpi inki nsangu kesalaka nde bantu kuzaba balongoki ya kyeleka ya Yezu Kristu? Nani ketwadisaka kisalu yai ya kusamuna na nsi-ntoto ya mvimba, mpi nki mutindu? Kimbeni ti mbangika kepesaka bansamuni inki mabaku? Inki kele kisalu ya mpeve santu na kisalu na beto ya kusamuna?
4. Inki mutindu beto lenda baka mambote mingi na kulonguka na beto ya mukanda yai?
4 Sambu na kubaka mambote mingi, longuka mambu yango na ntwala, mpi kudibongisa sambu na kupesa bakomantere ntangu beno talonguka na dibundu. Vanda na konso lukutakanu mpi yindulula mutindu nge lenda sadila na kisalu na nge ya kusamuna mambu ya nge melonguka. Bika nde kulonguka na beto ya mukanda yai kupusa beto na kuta mbote-mbote kimbangi na yina metala Kimfumu ya Nzambi!—Bis. 28:23.