Bamvutu na Bangyufula na Beno

◼ Bantangu ikwa beto fwete longuka ti longoki ya Biblia ya keyela?

Yo kele mbote na kulanda kulonguka ti longoki ya Biblia ya keyela tii kuna yandi tamanisa kulonguka mikanda yai zole: Inki Biblia Kelongaka Mpenza? ti “Beno Zinga Kaka na Zola ya Nzambi.” Yo fwete vanda mutindu yina ata longoki mebaka dezia mbotika na ntwala ya kumanisa mikanda yai. Na nima ya mbotika na yandi, beto lenda landa na kutanga bangunga, mvutukila ya mpa, mpi kulonguka. Kana nsamuni mosi mebasika kumosi ti beto mpi kepesa bakomantere, yandi lenda tanga mpi bangunga.​—Tala Kisalu na Beto ya Kimfumu ya Marsi 2009, lutiti 2.

Yo kele mfunu nde bantu ya mpa kubaka fondasio ya mbote na kyeleka na ntwala ya kuyambula bo, bo mosi. Bo kele na mfunu ya kutula “misisa” na Kristu mpi kukuma na ‘lukwikilu ya ngolo’ sambu na kununga bampasi yina bo kekutana na yo. (Kol. 2:6, 7; 2 Tim. 3:12; 1 Pie. 5:8, 9) Dyaka, sambu na kulonga bantu yankaka mbote-mbote, bo fwete vanda ti “nzayilu ya sikisiki ya kyeleka.” (1 Tim. 2:4, NW) Kumanisa mikanda yonso zole ti balongoki, kele mutindu ya kusadisa bo na kukuma ti fondasio ya ngolo na “nzila yina kenataka bantu na moyo.”​—Mat. 7:14.

Na ntwala ya kundima nde muntu mosi kubaka mbotika, bankuluntu fwete zikisa nde yandi kebakisa mbote-mbote malongi ya luyantiku ya Biblia mpi kezinga na kuwakana ti yo. Bankuluntu fwete keba, mingi-mingi ntangu bo ketadila longoki yina memanisa ntete ve mukanda ya ntete ya kulonguka. Kana muntu mosi mefwana ntete ve na kubaka mbotika, bankuluntu tazikisa nde yandi kebaka lusadisu ya mefwana na mpila nde, na bilumbu kekwisa, yandi lungisa mambu ya bo kelombaka sambu na kubaka mbotika.​—Tala Beto Mevukana Sambu na Kusala Luzolo ya Yehowa balutiti 217-218.

[Bangogo sambu na kubenda dikebi ya kele na lutiti 2]

Yo kele mfunu nde bantu ya mpa kubaka fondasio ya mbote na kyeleka