“Bika Nde Nsemo na Beno Kusema”

1. Beto kele ti mukumba ya kumonisa inki?

¹ Banda na suka tii na nkokila, kitoko ya nsemo yina kemonanaka kepesaka Yehowa Nzambi lukumu. Kansi Yezu kuzabisaka balongoki na yandi na kuvanda ti nsemo ya mutindu yankaka​—“nsemo ya luzingu.” (Yoa. 8:12, NW) Kuvanda ti nsemo yai ya kimpeve kele dikabu mosi ya sipesiali yina kele ti mikumba ya nene. Yezu kutumaka nde: “Bika nde nsemo na beno kusema na ntwala ya bantu,” sambu bantu yankaka kubaka mambote. (Mat. 5:16, NW) Na kati-kati ya mudidi ya ngolo ya kimpeve ya bubu yai, bantu fwete mona nsemo yai, mpi mfunu na yo mekuma mingi kuluta! Bonso Kristu, inki mutindu beto lenda monisa nsemo na beto?

2. Inki mutindu Yezu kumonisaka mfunu ya kupesa bantu yankaka nsemo ya kimpeve?

² Ntangu Beto Kesamuna: Yezu kusadilaka ntangu, ngolo, bima na yandi ya kinsuni sambu na kusadisa bantu na kuzaba nsemo ya kyeleka na banzo na bo, na babala-bala, na bangumba​—na konso kisika yina yandi lendaka kuzwa bantu. Yandi bakisaka nde kupesa nsemo ya kimpeve ya kyeleka kele na mbalu ya kukonda nsuka. (Yoa. 12:46) Sambu na kulonga bantu mingi dyaka, Yezu kusadisaka balongoki na yandi sambu na kuvanda “nsemo ya nsi-ntoto.” (Mat. 5:14, NW) Bo bikaka nde nsemo na bo kusema, na kusadilaka bamfinangani na bo mambu ya mbote mpi na kulongaka bo bakyeleka ya kimpeve.

3. Inki mutindu beto lenda monisa ntonda ya masonga sambu na nsemo ya kyeleka?

³ Bantu ya Nzambi kebakaka na mbalu mingi mukumba ya “kulanda na kuvanda bana ya nsemo, NW” mpi bo kesamunaka konso kisika yina bo lenda zwa bantu. (Ef. 5:8) Kutanga Biblia to mikanda na beto yankaka ya Bukristu na kisika yina bantu mingi lenda mona beto na kisalu to na ntangu ya kupema na nzo-nkanda, lenda pesa beto dibaku ya kulonguka Biblia ti muntu. Ntangu toko mosi ya nkento sadilaka metode yai, yandi kabulaka mikanda na banduku na yandi 12 ya nzo-nkanda mpi yantikaka kulonguka Biblia ti bo!

4. Sambu na nki ntuma ya ‘kubika nde nsemo na beto kusema’ ketadila mpi bikalulu na beto?

⁴ Ntangu Beto Kesala Mambu ya Mbote: Ntuma ya kubika nde nsemo na beto kumonana ketadila mpi bikalulu na beto ya konso kilumbu. (Ef. 5:9) Na kisalu, na nzo-nkanda, mpi na bisika yankaka yina bantu kele mingi, kikalulu ya Bukristu kebendaka dikebi ya bantu mingi mpi kepesaka mabaku ya kulonga bakyeleka ya Biblia. (1 Pie. 2:12) Mu mbandu, Bikalulu ya mbote ya mwana-bakala mosi ya bamvula tanu kupusaka longi na yandi na kubinga bibuti na yandi na telefone. Yandi tubaka nde, “Mu memonaka ntete ve mwana ya fyoti ya kebakisa na pwelele yonso mambu ya mbote mutindu yai mpi kesala yonso sambu na kusadila yo!” Ya kyeleka, kisalu na beto kusamuna mpi bikalulu na beto kebenda bantu na “nsemo ya luzingu” mpi kepesaka Nzambi lukumu.