‘Bika nde Zina ya Nzambi Kusantisama’
1. Inki kele ntu-dyambu ya lukutakanu ya nzyunga ya mvula ya kisalu 2012, mpi yo mesimbama na nki?
1 Yo kele mpenza dibaku ya mbote mutindu beto mezabanaka na zina ya Yehowa, Mfumu ya Luyalanganu! Nzambi yandi mosi mepesaka beto zina na yandi, mpi banda 1931 beto mezabanaka bonso Bambangi ya Yehowa. (Yez. 43:10) Yezu, Mwana mosi kaka ya kubutukaka ya Nzambi, kupesaka zina ya Nzambi lukumu mpi yandi tulaka yo na kisika ya ntete na kisambu yina yandi longaka balongoki na yandi. (Mat. 6:9) Ntu-dyambu ya lukutakanu na beto ya nzyunga ya mvula ya kisalu 2012 mesimbama na mambu yai ya Yezu kutubaka na kisambu na yandi. Ntu-dyambu yango kele: “Bika nde Zina ya Nzambi Kusantisama.”
2. Inki malongi beto tabaka na lukutakanu na beto ya nzyunga yina kekwisa?
2 Mambu Yina Beto Tawa: Na Mposo, disolo ya kele na ntu-dyambu “Kuma Nsamuni ya Ntangu Yonso Sambu na Kusala na Mpila Nde Zina ya Nzambi Kuzabana” tatubila bikuma yina kemonisa nde kisalu ya ntangu yonso kenataka mambote mingi na luzingu. Beto tawa dyaka diskure ya bitini iya, “Beno Fingisa ve Zina ya Yehowa”; yo tasadisa beto na kubwa ve na mitambu iya yina beto lenda kutana na yo. Disolo, “Sambu na Nki Zina ya Nzambi Fwete Santisama?” tapesa bamvutu na bangyufula yai: Inki tasadisa beto na kusamuna na kikesa yonso ntangu beto kemona nde bantu ketudila beto dikebi ya fyoti? Inki tasadisa beto na kusala kisalu ya kusamuna ya kebuta mbuma, mpi na mutindu mosi ya mbote? Na Lumingu, beto tasepela na diskure ya bitini iya yina tamonisa mutindu beto lenda santisa zina ya Nzambi na mabanza, na bangogo, na balukanu, mpi na bikalulu na beto. Bantu ya mpa tasepela mpenza na disolo ya bantu yonso, “Yehowa Tasantisa Zina na Yandi ya Nene na Armagedoni.”
3. Beto kele ti nki dibaku ya mbote mpi nki mutindu manaka ya lukutakanu ya nzyunga tasadisa beto?
3 Ntama mingi ve Yehowa tasala mambu yina tasantisa zina na yandi. (Ezek. 36:23) Kansi bubu yai, beto kele ti dibaku ya nene kibeni ya kuzitisa mambu yonso yina ketadila zina ya santu ya Yehowa. Beto kele na kivuvu nde manaka ya lukutakanu ya nzyunga yai tasadisa beto yonso na kulungisa mbote mpenza mukumba na beto ya kuvanda bantu yina mezabanaka na zina ya Nzambi.