Mbandu ya Bangogo ya Kukotila na Masolo

(Sadila periodike ya Kifalansa kana yo kele ve na Kikongo)

Kuyantika Kulonguka Biblia ti Muntu na Sabala ya Ntete ya Ngonda ya Yanuari

“Bantu yankaka kekwikilaka nde Biblia kele mukanda ya bambikudulu yina mefwana na kutudila ntima. Bankaka keyindulaka nde yo kele ti mambu ya bisakasaka sambu na makwisa, yina bantu lenda tendula na mitindu mingi ya kuswaswana. Inki kele dibanza na nge?” Bika muntu yango kupesa mvutu. Na nima, pesa yandi Nzozulu ya Nkengi ya Februari 1, mpi beno tadila mambu yina kele na nsi ya kantu-dyambu ya lutiti 11 mpi ata verse mosi. Pesa bazulunalu, mpi beno wakana sambu na kuzaba kilumbu nge tavutukila yandi sambu na kutadila ngyufula yina kelanda.

Nzozulu ya Nkengi Februari 1

“Beto lenda baka malongi mingi na babakala mpi bankento ya nene yina mezingaka na bantangu ya ntama. Keti nge kendima yo? [Bika muntu yango kupesa mvutu.] Verse yai ketubila muntu mosi ya nene yina Biblia bingaka ‘nduku ya Nzambi.’ [Tanga Yakobo 2:23.] Zulunalu yai ketendula kikuma yina Nzambi ndimaka Abrahami bonso nduku na yandi mpi yo ketubila malongi yina beto lenda baka na mbandu ya Abrahami.”

Réveillez-vous ! Yanuari

“Kupesa avoka, to kufuta mbongo na mutindu mosi ya mbi sambu na kubaka mambote, mpi mambu yankaka ya kukonda masonga mekuma kusalama mingi na mambu ya mumbongo. Bantu yankaka keyindula nde kuvanda ve masonga na mambu yankaka ya mumbongo kele mfunu sambu na kununga. Nge keyindula Inki? [Bika muntu yango kupesa mvutu.] Tala kingana yai ya kepusa na kuyindula. [Tanga Bingana 20:17.] Zulunalu yai ketendula sambu na nki yo kele mbote na kuvanda masonga.”