Inki ‘Kikuma Nge Kevandaka ti Yo ya Kudikumisa’?
1. Inki kesalaka nde beto vanda na kyese konso nsuka ya ngonda?
1 Ntangu bo kelombaka beto na kupesa rapore ya kisalu ya kusamuna na nsuka ya konso ngonda, inki kikuma nge kevandaka ti yo ya kudikumisa? (Gal. 6:4) Yo vanda beto kele bapasudi-nzila ya nene, yina kepesaka bangunga 130 na nsuka ya ngonda, to beto kele na kati ya bansamuni yina bo mendimaka nde beto pesa ata minuta 15 na rapore, beto yonso fwete vanda na kyese mutindu beto mesadila Yehowa na ntima ya mvimba.—Nk. 100:2.
2. Sambu na nki beto fwete sala ngolo na kisalu ya Yehowa?
2 Mutindu yandi kele Nkwa Kimfumu ya luyalanganu, Yehowa mefwana na kubaka bima ya kuluta mfunu yina beto kele na yo. (Mal. 1:6) Sambu beto kezolaka Nzambi, beto mekudipesaka na kusala luzolo na yandi. Yo yina, na nsuka ya kilumbu to na nsuka ya ngonda, kana beto pesaka mpenza “makabu ya bima” na beto, ntangu na beto, mayele mpi ngolo na beto na kisalu ya Yehowa, pana beto kele na kikuma ya kudikumisa. (Bing. 3:9) Kansi, kana kansansa na beto kezabisa beto nde beto lendaka kusala mingi kuluta, beto fwete tala nki beto lenda sala sambu na kutomisa mambu.—Roma 2:15.
3. Sambu na nki yo kele mbote ve na kudifwanisa ti bantu yankaka?
3 “Kudifwanisa ve ti Muntu ya Nkaka”: Yo kele mbote ve na kudifwanisa ti bantu ya nkaka to ti beto mosi ntangu beto vandaka ti ngolo mingi. Mambu ya luzingu kesobaka. Bantu yonso kevandaka ve ti makuki ya kiteso mosi. Kudifwanisa ti bantu yankaka kenataka mbala mingi na kutesana to kesalaka nde muntu kumona nde yandi kele ve mfunu. (Gal. 5:26; 6:4) Yezu fwanisaka bantu. Kansi, yandi sikisaka bantu na kutadilaka mambu yina bo vandaka na makuki ya kusala.—Mar. 14:6-9.
4. Inki dilongi ya mfunu beto lenda baka na kingana ya Yezu ya batalanta?
4 Na kingana ya Yezu ya batalanta, yandi monisaka nde konso nsadi bakaka batalanta na kutadilaka “kiteso ya makuki na yandi.” (Mat. 25:15) Ntangu mfumu vutukaka mpi kulombaka rapore sambu ya kisalu na bo, bayina salaka ti kikesa yonso na kutadilaka makuki mpi mambu ya luzingu na bo, mfumu sikisaka bo mpi bo kwendaka kusepela ti yandi. (Mat. 25:21, 23) Beto mpi, kana beto kesala mingi kisalu ya Kusamuna Kimfumu, beto lenda tula ntima nde Nzambi tandima beto mpi beto lenda vanda ti kikuma ya kudikumisa!