Tanina Kansansa na Nge
1. Inki kele ntu-dyambu ya lukutakanu ya sipesiali ya kilumbu mosi sambu na mvula ya kisalu 2013, mpi inki kele lukanu ya manaka yai?
1 Konso kilumbu, beto kekutanaka ti mambu yina lenda sala nde beto bebisa kansansa na beto. Yo yina manaka ya lukutakanu ya sipesiali ya kilumbu mosi sambu na mvula ya kisalu 2013, yina tayantika na Septembri 1, 2012, kele ti ntu-dyambu “Tanina Kansansa na Nge.” (1 Tim. 1:19) Bo mesala manaka yai sambu na kusadisa konso muntu na kati na beto na kutula dikebi ya masonga na mutindu yandi kesadilaka dikabu yai ya mbote mpenza ya mekatukaka na Ngangi na beto.
2. Inki bangyufula ya mfunu yina bo tapesa bamvutu na yo na manaka yai?
2 Sosa Kuzaba Mambu Yai: Manaka yai tapesa mvutu na bangyufula nsambwadi ya mfunu na yina metala kansansa:
• Inki lenda tula kansansa na beto na kigonsa?
• Inki mutindu beto lenda longa kansansa na beto?
• Inki mutindu beto lenda vanda bunkete na yina metala menga ya bantu yonso?
• Kana beto keyindula mpi kesala mambu na kuwakana ti minsiku ya Biblia, yo tamonisa nde beto kele bantu ya nki mutindu?
• Inki beto lenda sala sambu na kupesa ve kansansa ya bantu yankaka mpasi?
• Baleke, inki mutindu beno lenda kanga ntima ntangu bantu kepusa beno na kusala mambu ya mbi?
• Inki balusakumunu kevingila bantu yina kebikaka nde mpeve ya Yehowa kulonga kansansa na bo?
3. Inki mutindu beto lenda baka mambote na lukutakanu yai?
3 Ti lusadisu ya Yehowa, beto lenda telamina bikesa yina Satana kesala sambu na kubebisa kansansa na beto. Na nsadisa ya Ndinga mpi organizasio na yandi, Tata na beto ya zulu ya kezolaka beto mingi kezabisa beto nde: “Nzila yo yai, beno landa yo.” (Yez. 30:21) Manaka yai kele mosi na kati ya banzila yina Yehowa kepesaka beto lutwadisu ya mutindu yina. Yo yina, baka bangidika sambu na kuvanda na lukutakanu yai mpi kulanda manaka ya mvimba. Tula dikebi ya ngolo, mpi tala mutindu nge lenda sadila malongi ya lukutakanu yai na luzingu na nge. Beno tubila mambu ya lukutakanu yai na dibuta. Kusadila malongi yina beto tabaka tapesa beto ngolo ya kufula na ‘kutanina kansansa ya mbote’ mpi yo tasadisa beto na kubwa ve na biese ya ntangu fyoti ya nsi-ntoto ya Satana.—1 Pie. 3:16.