Mona Kiese Sambu na Kisalu na Nge ya Ngolo
1. Inki lenda fiotuna kikesa na beto na kisalu ya kusamuna?
1 Nzambi salaka muntu sambu na “kumona kiese” na kisalu na yandi ya ngolo. (Lo. 2:24) Kansi, kana beto ke baka ve mbutu ya mbote na kisalu na beto ya kusamuna, yo lenda lembisa beto nitu, kukatula beto kiese mpi kufiotuna kikesa na beto. Inki lenda sadisa beto na kutanina mabanza ya mbote?
2. Sambu na nki beto fwete tadila mambu na mutindu ya mbote, na yina metala nkadilu ya bantu na kisalu na beto ya kusamuna?
2 Tadila Mambu na Mutindu ya Mbote: Kuvila ve nde ata bantu fioti mpamba ndimaka malongi ya Yezu, kansi yandi nungaka kibeni na kisalu na yandi. (Yoa. 17:4) Na kingana na yandi ya muntu yina vandaka kukuna bankeni, Yezu bikulaka nde bantu mingi ta ndima mpenza ve nsangu ya Kimfumu yina me fwanana na bankeni. (Mat. 13:3-8, 18-22) Ata mpidina, bikesa na beto ya ngolo lenda pesa mbutu ya mbote.
3. Inki mutindu beto lenda “buta mbuma” ata bantu mingi ve ke ndima nsangu ya Kimfumu?
3 Mutindu Beto Ke Butaka Bambuma Mingi: Na kutadila kingana ya Yezu, bantu yina ke ndima nsangu ‘ta buta bambuma.’ (Mat. 13:23) Kana nkeni ya ble me mena mpi yo me yela, nti na yo ke basisaka ve bantangu ya fyoti, kansi bankeni ya mpa. Mutindu mosi mpi, bambuma yina Mukristu ke butaka kele kaka ve balongoki ya mpa, kansi bankeni mingi ya mpa ya Kimfumu, na nzila ya kisalu na beto ya kusamuna Kimfumu. Diambu yai ke pesaka beto mbutu ya “mbote,” yina lenda pesa beto kiese, yo vanda bantu ke ndima nsangu na beto to ve. Beto ke pesaka maboko na kisalu ya kusantisa zina ya Yehowa. (Yez. 43:10-12; Mat. 6:9) Beto ke sepelaka na dibaku ya kuvanda banduku ya kisalu ya Nzambi. (1 Bak. 3:9) Mpi “mbuma ya bikobo” ya mutindu yai ke sepedisaka Yehowa.—Baeb. 13:15, 16.
4. Inki mbutu kisalu na beto ya kusamuna ke butaka nkatu beto zaba?
4 Diaka, kisalu na beto ya ngolo lenda buta bambuma yina beto ke monaka ve. Yo lenda vanda nde bantu yankaka yina waka malongi ya Yezu kumaka ve balongoki na yandi tii ntangu yandi manisaka kisalu na yandi na ntoto. Kiteso mosi, bankeni ya Kimfumu yina beto ke kunaka lenda yela na ntima ya muntu bantangu mingi na nima, mpi yandi lenda yamba kieleka nkatu beto zaba. Ya kieleka, kisalu na beto ya kusamuna ke salaka mambu mingi ya mbote. Yo yina, bika beto “landa na kubuta mbuma mingi” mpi kumonisa nde beto kele balongoki ya Yezu.—Yoa. 15:8.