Kampanye ya Ke Butaka Mbuma

Bamposo tatu na ntwala nde lukutakanu ya distrike yantika, mabundu ta sala diaka kampanye sambu na kubingisa bantu ya ke monisaka mpusa na teritware na beto, na kuvukana ti beto. Beto kele ti bikuma ya mbote ya kusala kampanye yai ya beto ke salaka konso mvula. Mbala mingi, bantu yina ke ndimaka baemvitasio mpi ke kwisaka na lukutakanu ya distrike ke yitukaka na kuwa badiskure yina me simbama na Masonuku, kumona mutindu bavolontere ke sala bisalu yonso mpi ke yidika mambu mbote, mpi bikalulu na beto ya mbote ti bumosi. (Nk. 110:3; 133:1; Yez. 65:13, 14) Ata mpidina, keti kampanye na beto ke butaka mbuma, mingi-mingi na bisika yina bantu ya ke sepelaka na kieleka fwete sala nzietelo ya nda sambu na kukwenda na lukutakanu ya distrike?

Na nima ya lukutakanu ya distrike ya 2011, nkento mosi yina kutaka emvitasio na porte ya nzo na yandi, tindilaka biro ya filiale mukanda. Yandi vandaka na kikalulu ya kubumbana ntangu bambangi ya Yehowa ke kokula na porte na yandi. Yandi sonikaka nde: “Mu vandaka na nzo ya kitoko, na bakala ya mbote mpi mu yindulaka nde mu vandaka na bima yonso yina lendaka kupesa munu kiese. Kansi, mu vandaka ve na kiese, mpi luzingu na munu vandaka mpenza ve na lukanu. Mu bakaka lukanu ya kusala nzietelo ya bakilometre 320 na kamio sambu na kulanda manaka ya Mposo.” Yandi sepelaka mingi na lukutakanu mpi yandi bingaka bakala na yandi na telefone sambu na kusonga yandi nde yandi ta lala kuna sambu na kulanda mpi manaka ya Lumingu. “Mu landaka badiskure yonso, mu kutanaka na Bambangi ya Yehowa mingi, mpi mu zolaka ve nde manaka yai kumana.” Na nima ya kuvutuka na nzo, yandi yantikaka kulonguka mpi na nima ya bangonda iya yandi kumaka nsamuni ya me bakaka ntete ve mbotika. “Mu ke na kiese mutindu mu kutaka emvitasio yina na porte sambu ntangu yai luzingu na munu me kuma na lukanu!”

Bantu ya nkaka yina bakaka emvitasio ta kwisa na lukutakanu. Yo yina, samuna na kikesa yonso na kampanye yai ya mfunu. Nata baimvitasio yina ta bikala na kisika lukutakanu ya distrike ta salama mpi sadila yo sambu na kuta kimbangi ya dibaku ya mbote.

[Lupangu ya kele na lutiti 5]

Inki Mutindu Beto Ta Kabula Baemvitasio?

Sambu na kusala teritware na beto ya mvimba, beto fwete tuba mingi ve. Beto lenda tuba nde: “Mbote. Beto ke sala kisalu ya kukabula emvitasio yai na ntoto ya mvimba. Ya nge yo yai. Nge ta kuta bansangu mingi na kati.” Tuba na kiese. Kana mpila kele, ntangu beno ke kabula baemvitasio na Mposo ti na Lumingu, beno fwete kabula mpi baperiodike.