Banani Ta Sepela na Yo?
1. Inki beto fwete tadila ntangu beto ke tanga Nzozulu ya Nkengi to Réveillez-vous ! mpi sambu na inki?
1 Bo ke sonikaka Nzozulu ya Nkengi mpi Réveillez-vous ! sambu na bantu ya nsi-ntoto ya mvimba. Yo yina, masolo na yo ke tubilaka mambu mingi ya mutindu na mutindu. Ntangu beto ke tanga disolo mosi, beto fwete tala kana nani ta sepela na yo mpi kubaka bangidika sambu na kupesa yandi yo.
2. Inki masolo ya baperiodike na beto lenda sepedisa mingi bantu ya nkaka?
2 Keti Nzozulu ya Nkengi ya mpa ke tubila disolo mosi ya Biblia yina beno me tubilaka dezia ti nduku mosi ya kisalu? Keti yo kele ti disolo mosi ya ke tubila luzingu ya dibuta, yina lenda sadisa mpangi mosi ya kinsuni? Keti nge me zaba muntu mosi yina ke zola kusala nzietelo na bwala mosi ya bo me tubilaka na Réveillez-vous !? Keti periodike mosi ke tubila mumbongo mosi buna to bisalu ya leta yina ke salamaka na teritware na beno? Mu mbandu, periodike ya ke tubila bampasi yina minunu ke kutanaka na yo lenda sepedisa bantu yina ke zingaka na banzo ya minunu. Babiro ya ke talaka mambu ya bansiku lenda sepela na periodike ya ke tubila mubulu.
3. Ta disolo mosi ya ke monisa mfunu ya kukabula banimero ya sikisiki ya baperiodike na bantu yina beto ke mona nde yo ta sepedisa bo.
3 Mbutu: Ntangu mpangi mosi ti nkento na yandi, na Afrika ya Sudi, bakaka Réveillez-vous ! ya Oktobri 1, 2011, ya ke tuba, “Faites de vos enfants des adultes responsables,” bo bingaka ba ekole 25 ya teritware na bo na telefone; ba ekole 22 ndimaka Réveillez-vous ! yai mpi bo pesaka yo bana ya nzo-nkanda. Bankwelani ya nkaka ya bwala yai vandaka ti dibanza ya mutindu mosi mpi bo kabulaka Réveillez-vous ! yai na ba ekole ya teritware na bo. Balongi ya ekole mosi bakaka lukanu ya kusadila Réveillez-vous ! yai na malongi na bo ya nzo-nkanda. Bankwelani yango zabisaka nkengi ya nziunga mosi disolo yai. Na nima, yandi siamisaka mabundu ya nziunga na yandi na kusamuna na ba ekole ya teritware na bo. Biro ya filiale bakaka bakomande mingi ya Réveillez-vous ! yai; yo yina bo niemaka diaka bakopi ya nkaka!
4. Sambu na nki beto ke zolaka kupesa bantu mingi bazulunalu na beto?
4 Baperiodike na beto ke pesaka ntendula ya kieleka ya mambu yina ke salama bubu yai mpi yo ke bendaka dikebi na Biblia ti na Kimfumu ya Nzambi. Na nsi-ntoto ya mvimba, kaka bazulunalu na beto ke pesaka “nsangu ya kuguluka ya bantu.” (Yez. 52:7) Yo yina, beto ke zolaka kukabula yo na bantu mingi. Mutindu ya mbote ya kusala yo kele ya kudiyula, ‘Banani ta sepela na yo?’