Beto Landa Mbandu ya Baprofete—Ozea
1. Inki ngiufula nge lenda kudiyula?
1 ‘Mono kele ti luzolo ya kusala nki bibansa sambu na Yehowa?’ Ziku nge me kudiyulaka ngiufula yai ntangu nge ke yindululaka bumbote mpi mawa ya mingi ya Nzambi. (Nk. 103:2-4; 116:12) Ozea salaka mambu yina Yehowa lombaka yandi na luzolo yonso, ata yo lombaka nde yandi sala bibansa. Inki mutindu beto lenda landa mbandu ya Ozea?
2. Inki mutindu beto lenda landa mbandu ya mbote ya Ozea ya kukwamina na kisalu ya kusamuna?
2 Samuna na Ntangu ya Mpasi: Nsangu ya Ozea vandaka kutadila ntete-ntete kimfumu ya makanda kumi ya Izraele, kisika lusambu ya kieleka ya Yehowa bebaka mingi. Ntotila Yeroboami II vandaka kusala mambu ya mbi na meso ya Yehowa mpi vutulaka lusambu ya mwana-ngombe yina Yeroboami I yantikisaka. (2 Bant. 14:23, 24) Bantotila yina yingaka, landaka kubebisa kimpeve ya kimfumu ya makanda kumi yina fwaka nsuka-nsuka na mvu 740 N.T.B. Ata lusambu ya luvunu yalumukaka mingi, Ozea sadilaka Nzambi na kwikama yonso bonso profete na nsungi ya bamvula 59. Keti beto ke vandaka mpi ti lukanu ya kusamuna konso mvula ata bantu ke tula ve dikebi na nsangu na beto, to ntangu beto ke kutana ti kimbeni?—2 Tim. 4:2.
3. Inki mutindu luzingu ya Ozea ke monisa mawa ya Yehowa?
3 Tula Dikebi na Mawa ya Yehowa: Yehowa pesaka Ozea ntuma ya kukwela “nkento yina ke salaka kindumba.” (Ozea 1:2) Ata nkento na yandi Gomere butilaka yandi mwana-bakala, yo ke monana bonso nde, na nima, yandi butaka bana zole ya makangu. Luzolo ya Ozea ya kulolula nkento na yandi monisaka mawa mingi yina Yehowa wilaka bantu ya Izraele ntangu bo balulaka ntima. (Ozea 3:1; Bar. 9:22-26) Keti beto kele ti luzolo ya kutula mambote na beto mosi na nima sambu na kuzabisa ntete mawa ya Yehowa na bantu ya mitindu yonso?—1 Bak. 9:19-23.
4. Inki bibansa ya nkaka beto lenda sala sambu na Yehowa?
4 Bansadi ya nkaka ya Yehowa me yambulaka bisalu yina ke futaka mbongo mingi sambu na kusala mingi na kisalu ya kusamuna. Bankaka me bikalaka bampumpa to me buyaka kubuta sambu na kutula mambote ya Kimfumu na kisika ya ntete. Ntangu beto ke yindulaka luzingu ya Ozea, beto lenda tuba nde: ‘Mono lenda sala ve mambu yina yandi salaka.’ Kansi, ntangu ntonda na beto sambu na ntima ya mbote ya nene ya Yehowa ke yelaka, mpi ntangu beto ke tulaka ntima na mpeve santu na yandi sambu na kubaka ngolo, yandi lenda sadila beto na mitindu yina beto lenda yindula ve, kaka mutindu yandi sadilaka Ozea.—Mat. 19:26; Bafi. 2:13.