Kulonguka ya Mukanda Kwenda Pene-Pene na Yehowa Ta Yantika na Mposo ya Yanuari 6
1. Yantika na mposo ya Yanuari 6, nki mabaku beto ta vanda na yo na kukwenda pene-pene na Yehowa?
1 Yehowa ke zolaka nde beto kwenda pene-pene na yandi. (Yak. 4:8) Sambu na kusadisa beto na kusala mutindu yina, yantika na mposo ya Yanuari 6, beto ta longuka mukanda Kwenda Pene-Pene na Yehowa na Kulonguka ya Biblia ya Dibundu. Lutiti ya ntete ke tuba mutindu yai na kutadila lukanu ya mukanda yai: “Kuyindulula mutindu Yehowa ke monisaka konso kikalulu na yandi, kumona mutindu Yezu Kristu monisaka yo na mutindu ya kukuka mpi kubakisa mutindu beto lenda yedisa yo, ta sadisa beto na kukwenda kibeni pene-pene na Nzambi.” Mabundu longukaka ntete mukanda yai na mvu 2004 mpi 2005. Kansi, yo ta vanda mbala ya ntete sambu na bansamuni kiteso ya bamilio zole ya me katuka kukuma Bakristu, na kutadila na mudindu bikalulu ya kitoko ya Yehowa. Sambu na bantu yina longukaka dezia mukanda yai, kulonguka yo diaka ta sadisa bo na kuyedisa ntonda na bikalulu ya nene ya Yehowa.—Nk. 119:14.
2. Inki mutindu beto ta longuka mukanda Kwenda Pene-Pene na Yehowa?
2 Mutindu Beto Ta Longuka Yo: Ntwadisi ta yantika ti bangogo ya nkufi, ziku nsa mosi to bansa zole. Sambu masolo ya kele na mukanda yai ke monisa ve baverse yina beno fwete tanga, ntwadisi ta pona baverse ya mfunu ya kutanga. Yandi lenda yula ngiufula mosi to bangiufula zole na nsuka ya konso dilongi bonso mvutukilu. Kana kitini ya kulonguka kele ti lupangu “Bangiufula Sambu na Kuyindulula,” yandi ta sadila yo bonso mvutukilu. Kana ntangu kele, ntwadisi lenda tanga baverse ya nkaka ya bo me vutukila ve bangogo na yo yina kele na lupangu mpi kuyula bangiufula ya nkaka sambu bawi kupesa bakomantere.
3. Ntangu beto ke longuka mukanda, nki beto fwete sala mpi sambu na nki?
3 Baka Mpenza Mambote: Kudibongisa na ntwala, ata nge me longukaka dezia mukanda yai. Pesa bakomantere, yo ta pesa Yehowa lukumu, yo ta sadisa nge na kuyibuka mambu ya nge me longukaka, mpi yo ta natila bampangi ya nkaka mambote. (Nk. 35:18; Baeb. 10:24, 25) Kana nge ke yindulula bikalulu ya kuluta nene ya Yehowa, nge ta kwenda pene-pene na yandi. (Nk. 77:12-14) Ebuna, yo ta sadisa nge na kubaka lukanu ya kulemfukila bansiku na yandi mpi yo ta pusa nge na kuzabisa bantu ya nkaka mambu ya me tala Nzambi.—Nk. 150:1-6.