Batrakiti ya Mpa ya Bo Me Yidika na Mutindu Mosi ya Kitoko!
1. Inki bisadilu ya mpa bo me yidika na mutindu mosi ya kitoko sambu na kisalu ya kusamuna?
1 Batrakiti tanu ya mpa basikaka na Lukutakanu ya Distrike ya mvu 2013, “Ndinga ya Nzambi Kele Kieleka!” Diaka, bo me yika Nsangu ya Kimfumu No. 38, “Keti ya Kieleka Bafwa Lenda Zinga Diaka?” na batrakiti ya mpa yina basikaka. Bo me yidika batrakiti yai yonso sambanu na mutindu mosi ya kitoko. Inki kele bikuma ya batrakiti yai ya mpa? Ntangu beto ke kabula yo nzo na nzo, nki mutindu beto lenda sadila mbote bangindu yina kele na kati?
2. Inki kele lukanu ya batrakiti yai ya mpa?
2 Sambu na Nki Bo Me Yidika Batrikiti ya Mpa?: Mbala mingi, bangogo ya mbote ya kukotila na masolo na kisalu ya nzo na nzo ke lombaka bitambi yai iya: (1) Yula ngiufula mosi ya ke lomba nde muntu kupesa dibanza sambu na kuyantika disolo. (2) Tubila dibanza mosi ya me katuka na Masonuku. (3) Pesa muwi trakiti sambu na kutanga. (4) Yula yandi ngiufula yina nge ta pesa mvutu na mbala ya nima mpi baka bangidika sambu na kuvutukila yandi. Batrakiti yai ya mpa ya bo me yidika ke sadisa beto na kulanda bitambi yai yonso iya kukonda mpasi.
3. Inki mutindu beto lenda pesa trakiti mosi ya mpa na kisalu ya kusamuna?
3 Mutindu ya Kusadila Yo: (1) Na nima ya kupesa muwi mbote, songa yandi ngiufula yina kele ti bamvutu mingi na lutiti ya ntete ya trakiti mpi bika yandi pona mvutu mosi. Na nima, lomba dibanza na yandi. (2) Kangula trakiti mpi beno tadila kantu-diambu “Mambu Yina Biblia Ke Tubaka.” Tanga verse mbala mosi na Biblia kana mpila kele. Kana muwi kele ti ntangu, beno tadila kantu-diambu “Yo Lenda Tendula Inki Sambu na Nge.” (3) Pesa yandi trakiti, mpi siamisa yandi na kutanga mambu ya nkaka yina me bikala na ntangu yina me fwana sambu na yandi. (4) Na ntwala ya kukatuka, songa yandi ngiufula yina kele na lutiti ya nsuka na nsi ya kantu-diambu “Kudiyula” mpi baka bangidika sambu na kuvutukila yandi mpi kutadila mvutu ya Biblia na mbala ya nima.
4. Inki mutindu beto lenda sadila batrakiti ya mpa ntangu beto ke vutukila muntu?
4 Kusadila batrakiti yango na mvutukilu ya mpa kele mpi mpasi ve. Sadila kaka baverse yina bo me vutukila ve bangogo na yo na lutiti ya nsuka ya trakiti sambu na kupesa mvutu na ngiufula yina nge yulaka na mbala lutaka. Na ntwala ya kukatuka, songa muwi kifwanisu ya kamukanda Nsangu ya Mbote yina kele na lutiti ya nsuka ya trakiti; na nima, songa yandi kamukanda Nsangu ya Mbote mpi dilongi yina bo me tubila na mudindu ya ke wakana ti ntu-diambu ya beno me tubila mpi pesa yandi kamukanda yango. Kana yandi me ndima yo, baka bangidika sambu na kutadila kamukanda yango na mbala ya nima. Pana nge me yantika kulonguka ya Biblia ti yandi! To nge lenda pesa yandi trakiti ya nkaka na kisika ya kupesa yandi kamukanda mpi baka bangidika sambu na kuvutukila yandi.
5. Inki kele mfunu ya batrakiti na kisalu na beto ya kusamuna?
5 Beto ke sadilaka dezia batrakiti na kisalu na beto ya kusamuna bamvula kuluta 130. Ata bo ke sobaka nda mpi ke salaka yo na mitindu ya kuswaswana, batrakiti kele bisadilu ya mbote sambu na kuta kimbangi. Bika nde beto sadila mbote batrakiti yai ya mpa sambu na kulanda kuyalumuna nzayilu ya Biblia na ntoto ya mvimba.—Bing. 15:7a.