Beto Yedisa Mayele na Beto na Kisalu ya Kusamuna—Yantika Disolo Sambu na Kuta Kimbangi na Dibaku ya Mbote

Mfunu na Yo: Ntangu beto ke samunaka nzo na nzo, mbala mingi beto ke monaka nde bantu mingi ke vandaka ve na banzo. Kansi, beto lenda kutana ti bo ntangu beto ke samuna na ba transpore, na kisika ya bo ke vingilaka doktere, na ntangu ya kupema na kisalu to na nzo-nkanda mpi buna na buna. Yehowa ke zola mpi nde bantu yonso kuzwa dibaku ya kuwa nsangu ya Kimfumu. (1 Tim. 2:3, 4) Mbala mingi sambu na kuta kimbangi, beto fwete sala kitambi ya ntete sambu na kuyantika disolo.

Mutindu ya Kusala Yo:

Sadila luswasukusu. Keti muntu yango kele mawete mpi kele ti luzolo ya kusolula? Keti mambu na yandi ke pesa yandi nzila ya kusolula mbote? Kima ya ntete yina bansamuni ya nkaka ke salaka kele kutala bantu na meso mpi kumweta. Kana bantu yango me mweta mpi, bo ke yantikaka disolo.
Kana nge kele ve na kikesa ya kutuba, sala kisambu ya nkufi na nsi ya ntima.—Neh. 2:4; Bis. 4:29.
Yantika ti diambu mosi ya pete, mu mbandu kupesa mbote. Yezu yantikaka ve kusolula mbala mosi ti nkento ya Samaria mambu ya me tala Kimfumu. (Yoa. 4:7) Mbala mingi, sambu na kuyantika disolo beto lenda sikisa muntu nde: “Bana na nge kele ti bikalulu ya mbote!” Beto lenda yula mpi ngiufula sambu na kuyantika disolo, mu mbandu “Keti nge waka nsangu yina bo pesaka mazono na mpimpa?”
Kana nge me yantika kusolula ti muntu, sosa dibaku ya kulonga nsangu ya mbote kansi kunwanina ve. Bika nde disolo yo mosi kupesa nge nzila. Ziku nge lenda tubila kima mosi yina ta telemisa mpusa ya muwi na kuzaba mambu mpi ta pusa yandi na kuyula ngiufula. Mu mbandu, kana beno ke tubila disolo ya ke tadila dibuta, nge lenda tuba nde, “mono sengumunaka bandongisila ya nkaka ya kutudila ntima sambu na kusansa bana.” Kana beno ke tadila diambu mosi ya bo tubilaka na bansangu, nge lenda tuba nde, “ntama mingi ve, mono sepelaka na kutanga mwa bansangu ya mbote ya ke tubila bansoba.” Kulemba ve nitu kana masolo na beno me suka na ntwala nde nge ta kimbangi.
Nata batrakiti to mikanda ya nkaka yina nge lenda pesa muntu ya me monisa mpusa.

Sadila Yo Ngonda ya Mvimba:

Konso mposo, yantika ata disolo mosi ti lukanu ya kuta kimbangi ya dibaku ya mbote.