Beto Landa Mbandu ya Baprofete—Nahumi
1. Inki mambu beto ke longuka na mukanda ya Nahumi?
1 Bonso Nahumi bikulaka, lufwa ya Ninive ya ntama ke monisa nde Yehowa ke vutudilaka bambeni na yandi mbi. Ata bambeni yina kele ngolo mingi lenda telama ve na ntwala na yandi. (Nah. 1:2, 6) Beto tadila na dikebi yonso mbikudulu ya Nahumi sambu na kubaka malongi na kisalu na beto ya kusamuna.
2. Inki mutindu nsangu na beto lenda vanda ya mbote?
2 Pesa Bantu Kikesa mpi Kivuvu: Kana beto tala na zulu-zulu, yo ke monana bonso nde mukanda ya Nahumi ke tubila kaka nsangu ya lusambisu ya Ninive, ntu-mbanza ya Asiria ya ntama. (Nah. 1:1; 3:7) Kansi, nsangu yai vandaka nsangu ya kiese sambu na bansadi ya Yehowa. Zina ya Nahumi ke tendula “muntu ya ke pesaka kikesa.” Yandi zabisaka Bayuda nde bambeni na bo ta vanda diaka ve! Diaka, Nahumi ndimisaka bo nde Yehowa “ke kebaka mbote bantu yina ke kwisaka kutina na yandi na ntangu ya mpasi.” (Nah. 1:7) Ntangu beto ke samunaka, beto ke zabisaka mpi bantu ya nkaka nsangu ya mbote mpi ke pesaka bo kikesa na kutina na Yehowa.—Nah. 2:1.
3. Inki mutindu beto lenda landa mbandu ya Nahumi ntangu beto ke sadila bambandu mpi bingana?
3 Sadila Bambandu mpi Bingana: Na ngolo ya mpeve santu, Yehowa sadilaka Nahumi na kufwanisa lufwa ya Ninive ti mbanza Tebe (No-amoni) ya Ezipte, yina bantu ya Asiria fwaka. (Nah. 3:8-10) Ntangu beto ke zabisa bantu mambu ya me tala nsuka ya ngidika yai ya bima ya mbi, beto lenda tendudila bo bambikudulu ya Biblia yina ke monisa nde Yehowa ke lungisaka nkutu mambu ya fioti-fioti yina yandi ke tubaka. Mu mbandu, ntangu bantu ya Babilone mpi bantu ya Medi nwanisaka mbanza Ninive na mvu 632 N.T.B., bamvula ya ngolo fulusaka Nzadi ya Tigre mpi bwisaka bibaka ya ngolo ya mbanza yina. Yo yina, bo botulaka Ninive kaka mutindu Yehowa tubaka.—Nah. 1:8; 2:7.
4. Inki mutindu beto lenda tuba mambu pwelele mpi na mutindu yina bantu lenda bakisa na kisalu ya kusamuna?
4 Tuba Mambu Pwelele mpi na Mutindu Yina Bantu Lenda Bakisa: Nahumi tendulaka mambu na mutindu ya ke benda dikebi na mukanda na yandi. Yandi sonikaka mambu pwelele. (Nah. 1:14; 3:1) Mutindu mosi, beto fwete sadila bangogo ya kele mpasi ve na kubakisa. (1 Bak. 14:9) Na mbala ya ntete, tendudila muwi pwelele kikuma ya nge me kwenda kutala yandi. Ntangu nge ke longuka Biblia ti bantu, sadisa bo na kuyedisa lukwikilu na Yehowa mpi na Ndinga na yandi. Sadisa bo mpi na kubakisa nde mambu ya bo ke longuka ke tadila bo mosi.—Bar. 10:14.
5. Mbikudulu ya Nahumi ke pesa beto nki kivuvu?
5 Mukanda ya Nahumi ke monisa pwelele nde Nahumi tulaka ntima na kulungana ya mambu yina Yehowa tubaka. Sambu nsuka ya ngidika ya Satana me finama, beto ke baka kikesa na bangogo yai ya Nzambi: Mpasi ta basika diaka ve “mbala ya zole.”—Nah. 1:9.