Beto Yedisa Mayele na Beto na Kisalu ya Kusamuna—Beto Longa Balongoki ya Biblia Mutindu ya Mbote ya Kulonguka

Mfunu na Yo: Sambu na kuyela na kimpeve, balongoki ya Biblia fwete kotisa malongi ya nkaka na mabanza mpi na bantima na bo, katula malongi ya luyantiku ya Ndinga ya Nzambi. (Baeb. 5:12–6:1) Yo ke lombaka kusala kikesa sambu na kulonguka. Yo ke lombaka kuwakanisa mambu ya mpa ya beto ke tanga ti yina ya beto ke zabaka dezia mpi kubakisa mfunu na yo. (Bing. 2:1-6) Kana balongoki me zaba kusala bansosa bo mosi, yo ta sadisa bo na kusadila mikanda na beto sambu na kupesa bamvutu na bangiufula ya Biblia. Kana bo ke sala kikesa sambu na kusadila mambu ya bo ke longuka, yo ta sadisa bo na kukanga ntima na bampasi ntangu bo ta kuma Bakristu.—Luka 6:47, 48.

Mutindu ya Kusala Yo:

Monisa longoki mfunu ya kusosa lusadisu ya Yehowa na kisambu konso ntangu ya yandi ke longuka.—Yoa. 14:26; 1 Bak. 2:10.
Banda na luyantiku, siamisa longoki na kudibongisa na ntwala ya kulonguka. Songa yandi mukanda na nge mpi longa yandi mutindu ya kutenda bangogo to bansa ya mfunu.
Lomba longoki na nge na kupesa bamvutu na bangogo na yandi mosi. Na ntangu beno ke longuka, kuzola ve nde longoki kutanga mvutu kaka mutindu yo kele na mukanda.
Siamisa longoki na nge na kutanga Biblia konso kilumbu. Songa yandi manaka ya lutangu ya Biblia yina kele na jw.org ya ke monisa mutindu ya kusala yo. Yo ke lombaka kubaka lukanu sambu na kutanga Biblia konso kilumbu, kansi kusala kikesa sambu na kusala yo ta natila nge mambote.—Nk. 1:2, 3.
Songa longoki na nge mutindu ya kusadila Watchtower Library to BIBLIOTEKE NA INTERNET sambu na kuzwa bamvutu na bangiufula ya Biblia. Sadisa yandi na kuzaba bidimbu ya mikanda yina beto ke sadilaka mbala mingi na balukutakanu na beto ya Bukristu. Mu mbandu, be ke tendula mukanda Nzo-Nkanda ya Kisalu.

Sadila Yo Ngonda ya Mvimba:

Na ntwala ya kuluta na ntu-diambu mosi to na kapu ya nkaka, lomba longoki na nge na kutuba na bunkufi mambu ya yandi me longuka. Kana nge kele ve ti longoki ya Biblia, tanga verse mosi ya Biblia to paragrafe mosi ya Nzozulu ya Nkengi mpi tuba na bunkufi mambu ya verse to ya paragrafe yango sambu na kutomisa mutindu na nge ya kubakisa mambu.