Mutindu ya Kusimba Ntima ya Bantu ya Beto Ke Longa
1. Malongi ya Yezu vandaka ti nki bupusi na bantima ya bawi na yandi?
1 Yezu Kristu simbaka ntima ya bawi na yandi. Kilumbu mosi, yandi tendudilaka balongoki na yandi Masonuku mbote-mbote, ebuna bantima na bo yantikaka “kupela.” (Luka 24:32) Sambu kima ya ke pusaka muntu na kulemfukila Nzambi kele ntima, nki mutindu beto lenda tedimisa mpusa ya balongoki na beto sambu bo sala bansoba na luzingu?—Bar. 6:17.
2. Sambu na nki kusadila mayele mpi luswasukusu kele mfunu mingi sambu na kusimba ntima ya muntu?
2 Sadila Mayele mpi Luswasukusu: Bantu mingi ta soba ve kana beto ke zabisa bo kaka nde mambu yai kele mbote mpi mambu yai kele mbi. Kana beto ke sadila baverse mingi sambu na kumonisa bo nde mambu ya bo ke kwikilaka kele na kifu, yo lenda pusa bo na kutina beto. Sambu na kusimba ntima ya muntu, beto fwete zaba ntete bikuma yina ke pusaka yandi na kukwikila na dilongi mosi buna mpi na kusala mambu. Kana nge yula muntu na mayele yonso bangiufula ya ke pusa yandi na kupesa dibanza, yo ta sadisa yandi na kubasisa mambu ya kele na ntima na yandi. (Bing. 20:5) Mpidina, beto lenda pona baverse yina lenda simba ntima na yandi. Yo yina, beto fwete tudila konso muntu dikebi mpi beto fwete vanda ntima-nda. (Bing. 25:15) Kuvila ve nde bantu yonso ke yelaka ve na kimpeve mutindu mosi. Bikila mpeve santu ya Yehowa ntangu ya kutwadisa mabanza na yandi mpi mambu ya yandi ke sala.—Mar. 4:26-29.
3. Inki mutindu beto lenda sadisa bantu ya beto ke longa na kuyedisa bikalulu ya mbote?
3 Sadisa Bo na Kuyedisa Bikalulu ya Mbote: Baverse ya Biblia yina ke monisaka bumbote ya Yehowa mpi zola na yandi lenda sadisa bantu ya beto ke longa na kuyedisa bikalulu ya mbote. Mu mbandu, beto lenda sadila Nkunga 139:1-4 to Luka 12:6, 7 sambu na kumonisa mutindu Nzambi ke tudilaka konso muntu dikebi. Ntangu ya bo ta monisa ntonda sambu na ntima ya mbote ya nene ya Yehowa, zola na bo ta yela mpi bo ta kangama na Nzambi. (Bar. 5:6-8; 1 Yoa. 4:19) Diaka, ntangu bo ta longuka nde bikalulu na bo lenda pesa Yehowa mpasi, yo lenda pusa bo na kusala mambu yina ta sepedisa Yehowa mpi ya ta pesa yandi lukumu.—Nk. 78:40, 41; Bing. 23:15.
4. Ntangu beto ke longa bantu na kisalu ya kusamuna, nki mutindu beto lenda monisa luzitu na kimpwanza na bo ya kupona?
4 Yehowa ke pusaka ve muntu na kulemfukila bansiku na yandi na kingolo-ngolo. Kansi, yandi ke songaka bantu mfunu ya kulanda bandongisila na yandi sambu na kubenda bo na yandi. (Yez. 48:17, 18) Beto ke landaka mbandu ya Yehowa ntangu beto ke longaka bantu na mutindu yina ke pusaka bo na kubaka lukanu bo mosi. Kana bantu me bakisa bo mosi mfunu ya kusala bansoba na luzingu, bo ta baka mambote ya ta zinga mingi. (Bar. 12:2) Diaka, yo ta pusa bo na kukwenda pene-pene na Yehowa, muntu yina ke talaka ntima.—Bing. 17:3.