Mutindu ya Kusadila Mikanda ya Kuwidikila
1. Katula mikanda ya bo me niema, nki kima ya nkaka ya mfunu beto kele na yo?
1 Bantu mingi ke sadila jw.org sambu na kutanga bangogo ya kieleka ya kitoko mpi ya sikisiki. (Lon. 12:10) Keti nge me sadilaka dezia mikanda ya kuwidikila? Yo ke sadisaka beto na kuwidikila mambu mingi na site Internet na beto. Inki mambote beto lenda baka na mikanda yango ya kuwidikila?
2. Inki mutindu beto lenda sadila mikanda ya kuwidikila sambu na kulonguka na beto mosi to ya dibuta na beto?
2 Sambu na Kulonguka na Beto Mosi to ya Dibuta na Beto: Kana beto ke widikila Biblia, bazulunalu to mikanda ya nkaka ntangu beto ke sala nzietelo to ke sala mambu ya beto ke salaka konso kilumbu, yo ta sadisa beto na kusadila ntangu na beto mbote. (Baef. 5:15, 16) Kana beto ke widikila mukanda mosi mpi beto ke landa yo na mukanda ya bo me niema, beto lenda soba fioti mutindu beto ke salaka lusambu na beto ya dibuta. Kana beto ke zola kutomisa mutindu na beto ya kutanga to kana beto ke longuka ndinga ya nkaka, kuwidikila mikanda yina na kulonguka na beto mosi ta sadisa beto.
3. Na teritware na beto, banani lenda baka mambote ya mikanda ya kuwidikila?
3 Na Kisalu ya Kusamuna: Bantu ya teritware na beto yina ke monaka nde bo kele ve na ntangu ya kutanga lenda ndima kuwidikila mikanda yango. To beto lenda kutana ti bantu yina ke tubaka ndinga ya nkaka, yina lenda ndima kuwa nsangu ya Kimfumu na ‘ndinga na bo yina bo butukilaka.’ (Bis. 2:6-8) Na bisika ya nkaka, bantu ke zolaka kuwidikila masolo. Mu mbandu, bantu ya Hmong na Chine ke vandaka ti kikalulu ya kubudila bana na bo masolo mpi bana ke yibukaka mbote-mbote masolo yango. Bantu mingi ya Afrika mpi ke zolaka nde bo budila bo masolo sambu na kulonguka mambu.
4. Inki bangiufula beto lenda kudiyula sambu na kusadisa bantu ya teritware na beto?
4 Na teritware na beno, keti nge lenda tudila muwi disolo mosi na ndinga na yandi sambu yandi widikila? Keti nge lenda tindila muntu mukanda ya kuwidikila na nzila ya Internet sambu yandi bakila yo mambote? Keti nge lenda baka mukanda mosi ya kuwidikila, nge tula yo na CD mpi nge pesa CD yango na muwi ya me monisa mpusa ti mukanda yango ya kuniema? Kana nge me tindila muntu mukanda, kamukanda, zulunalu to trakiti na nzila ya telefone, ya ordinatere, to ya apareyi mosi buna, nge fwete tanga yo bonso mikanda ya beto ke kabulaka. Bo me yidikaka mikanda ya kuwidikila sambu beto sadila yo na kulonguka na beto mosi mpi sambu na kukuna bankeni ya kieleka ya Kimfumu.—1 Bak. 3:6.