Beto Landa Mbandu ya Bambikudi—Habakuki
1. Sambu na nki beto lenda tuba nde mambu ya profete Habakuki me fwanana ti ya beto?
1 Sambu mambu ya mbi me kuma mingi na nsi-ntoto, beto lenda kudiwa bonso Habakuki, yina yulaka Yehowa nde: “Sambu na nki nge ke bika nde mono mona mambu ya mbi? Mpi sambu na nki nge ke pesa nzila nde bo niokula bantu?” (Hab. 1:3; 2 Tim. 3:1, 13) Kana beto ke yindulula mambu yina kele na mukanda ya Habakuki mpi mbandu na yandi ya kwikama, yo lenda sadisa beto na ntangu beto ke vingila kilumbu ya kusambisa ya Yehowa.—2 Pie. 3:7.
2. Bubu yai, inki mutindu beto lenda monisa nde beto ke zinga sambu na kwikama?
2 Zinga Sambu na Kwikama: Na kisika ya kudiyangisa sambu na mambu ya mbi yina yandi vandaka kumona, Habakuki landaka kukengila na kimpeve. (Hab. 2:1) Yehowa ndimisaka Habakuki nde ndinga na yandi ta lungana na ntangu ya me fwana mpi nde “muntu ya lunungu ta zinga sambu na kwikama na yandi.” (Hab. 2:2-4) Mambu yai ke tendula nki sambu na Bakristu yina ke zinga kibeni na ntangu ya nsuka? Diambu ya kuluta mfunu kele ya kundima nde nsuka ta kwisa kibeni, kansi ve ya kusosa kuzaba ntangu yina yo ta kwisa. Lukwikilu ta sadisa beto na kukengila mpi na kutula kisalu ya kusamuna na kisika ya ntete.—Baeb. 10:38, 39.
3. Sambu na nki beto fwete sadila Yehowa ti kiese?
3 Yangalala na Yehowa: Ntangu Gogi ya Magogi ta nwanisa bansadi ya Yehowa, lukwikilu na beto ta mekama. (Ezek. 38:2, 10-12) Bitumba ke nataka bampasi ata na bantu yina me nunga. Bantu lenda konda madia. Bo lenda vidisa bima na bo ya kinsuni mpi luzingu lenda kuma mpasi. Beto ta sala nki kana bampasi yai me basika? Habakuki zabaka nde yandi ta kutana ti bampasi, yo yina yandi bakaka lukanu ya kusadila Yehowa ti kiese. (Hab. 3:16-19) “Kiese ya Yehowa” ta sadisa beto mpi na kukanga ntima na bampasi yina ke kwisa.—Neh. 8:10; Baeb. 12:2.
4. Inki kiese beto lenda vanda ti yo bubu yai mpi na bilumbu yina ke kwisa?
4 Bantu yina Yehowa ta tanina na kilumbu ya kusambisa na yandi yina ke kwisa, ta landa kulonguka nzila ya Nzambi yina ke nataka na luzingu. (Hab. 2:14) Bantu yina ta futumuka, bo mpi ta longuka mambu ya Yehowa. Ata bubu yai, beto lenda sadila mabaku yonso sambu na kuzabisa bantu mambu ya Yehowa mpi bisalu na yandi ya kuyituka.—Nk. 34:1; 71:17.