Mutindu Ngangi Ke Monisaka Balusilu na Yandi ya Zola

Banda luyantiku ya luzingu ya bantu, Ngangi na beto me solulaka ti bantu na nzila ya bawanzio mpi ya baprofete. Diaka, yandi zolaka nde bo sonika nsangu mpi balusilu na yandi. Nzambi ke sila nde beto ta vanda na kiese na bilumbu ke kwisa. Yo yina, na wapi nge lenda zwa balusilu ya Nzambi bubu yai?

Bo me sonikaka nsangu ya Nzambi na Masonuku ya Santu. (2 Timoteo 3:16) Inki mutindu Nzambi sadilaka baprofete sambu na kusonika nsangu na yandi? (2 Piere 1:21) Nzambi songaka bansoniki mambu yina bo fwete sonika mpi na nima bo sonikaka yo. Yo kele mpi mutindu mosi bubu yai. Kana mfumu me songa sekretere na kusonika mukanda, beto ke zabaka nde mukanda yina me katuka na mfumu. Mutindu mosi, ata Nzambi sadilaka bantu sambu na kusonika nsangu na yandi, yandi kele Munkwa ya Masonuku ya Santu.

NDINGA YA NZAMBI KELE NA NTOTO YA MVIMBA

Ndinga ya Nzambi kele mfunu mingi yo yina yandi ke zola nde bantu kutanga mpi kubakisa yo. ‘Nsangu na yandi ya mbote ya mvula na mvula’ kele “na makanda yonso, na mabuta yonso, na bandinga yonso.” (Kusonga 14:6) Na lusadisu ya Nzambi, Masonuku ya Santu kele, yo vanda ya mvimba to ya kitini na bandinga kuluta 3 000, yo me luta mikanda ya nkaka.