Sadila Bavideo Sambu na Kulonguka ti Balongoki na Nge ya Biblia

Bima yina bantu ke monaka ke bendaka dikebi na bo mpi yo ke sadisaka bo na kubakisa mpi na kuyibuka mambu yina bo me longukaka. Yehowa Longi ya Kuluta Nene, sadilaka mpi bima yina ke monikaka sambu na kulonga malongi ya mfunu. (Kuy 15:5; Yer 18:1-6) Yezu Longi ya Nene salaka mpi mutindu mosi. (Mat 18:2-6; 22:19-21) Bubu yai, na kati ya bima yina ke monikaka, bavideo kele bima yina ke bendaka kibeni dikebi ya bantu. Keti nge ke sadilaka mbote bavideo ntangu nge ke longukaka ti balongoki na nge ya Biblia?

Bo me sala bavideo 10 sambu yo sadisa beto ntangu beto ke longuka ti bantu malongi ya kamukanda, Nsangu ya Mbote ya Mekatuka na Nzambi! Mbala mingi konso ntu-diambu ya video ke wakanaka ti ngiufula mosi ya kele na bisono ya ndombe na kamukanda yai. Kamukanda yina kele na Internet kele ti bidimbu (ba liens) yina ke yibusaka beto ntangu ya kusonga konso video. Diaka beto kele ti bavideo ya nkaka yina lenda sadisa beto ntangu beto ke longuka ti bantu mukanda mosi na kati ya Bisadilu Yina Ke Sadisaka Beto Sambu na Kulonga Bantu.

Keti nge ke tubila dilongi mosi ya Biblia yina lenda vanda mpasi sambu longoki na nge kubakisa? To keti longoki na nge ke kutana ti diambu mosi ya mpasi? Tala bavideo yina kele na jw.org® mpi na JW Télédiffusion® mpi sosa video yina lenda sadisa yandi. Nge lenda tala yo ti yandi mpi na nima beno tubila yo.

Konso ngonda, bo ke basisaka bavideo ya mpa. Ntangu nge ke tala yo, yindula mutindu nge lenda sadila yo ntangu nge ke longuka ti bantu.