ZINGA MUTINDU BAKRISTU FWETE ZINGA
Sosa Kuzaba Bangindu ya Nzambi
Beto fwete sepedisa Yehowa na mambu yonso ya beto ke sala. (Bin 27:11) Sambu na kusala yo, beto fwete baka balukanu yina ke wakana ti bangindu ya Yehowa ata na mambu yina kele ve ti nsiku ya pwelele ya ke songa beto mambu yina beto fwete sala. Inki lenda sadisa beto?
Landa kulonguka Biblia mbala na mbala. Beto ke lutisaka ntangu ti Yehowa ntangu yonso yina beto ke tangaka Biblia. Beto lenda zaba mabanza ya Yehowa kana beto ke longuka mutindu yandi vandaka kusadila bantu na yandi mambu na ntangu ya ntama mpi kana beto ke longuka bambandu ya bantu yina salaka mambu ya mbote to mambu ya mbi na meso ya Yehowa. Kana beto ke zola kubaka lukanu mosi, mpeve santu lenda sadisa beto na kuyibuka malongi ya mfunu mpi minsiku yina beto longukaka na Ndinga ya Nzambi.—Yoa 14:26.
Sala bansosa. Kana nge ke zola kubaka lukanu mosi, kudiyula nde: ‘Inki baverse to masolo ya kele na Biblia lenda sadisa mono na kubakisa mutindu Yehowa ke tadila lukanu yango?’ Samba Yehowa sambu yandi sadisa nge mpi sadila mikanda yina ke sadisaka beto na kusala bansosa, yina kele na ndinga na beno sambu yo sadisa nge na kuzwa minsiku ya Biblia ya ke tadila lukanu yina nge ke zola kubaka mpi sadila minsiku yango.—Nk. 25:4.
TALA VIDEO BETO FWETE “BAKA NTINU TI KUKANGA-NTIMA”—DIA MADIA YA MBOTE, MPI NA NIMA BENO PESA BAMVUTU NA BANGIUFULA YAI:
Inki mambu ya mpasi mpangi-nkento yina na video kutanaka ti yo?
Inki mutindu nge lenda sadila mikanda yina ke sadisaka beto na kusala bansosa kana nge ke kutana ti mambu ya mutindu mosi?
Inki mambote beto ta baka kana beto ke sala bansosa mpi ke longuka sambu na kubaka balukanu ya mbote?—Ebr 5:13, 14