Mutindu ya Kusadisa Bantu na Nima ya Kisumbula

Bubu yai, bisumbula ya lugangu me kuma kusalama mingi. Kana kisumbula ya lugangu me salama, yo ke lombaka kuyidika mambu mbote mpi kutwadisa yo mbote sambu na kusadisa bantu yina me bwila kisumbula. Yo yina na Babetele yonso, Nto-Kimvuka me tulaka Departema ya Kusadisa Bampangi ya Me Bwila Mpasi.

Kana bampangi ya ke salaka na departema yina me wa nde kisumbula mosi me salama, kukonda kusukinina bo ke solulaka ti bankuluntu ya kisika yina sambu na kuzaba lusadisu yina bampangi kele ti yo mfunu. Kana kisumbula yango bebisaka bima mingi kibeni, mpi bampangi ya kisika yina ta kuka ve kuyidika yo bo mosi, Betele ta tinda bampangi yina bo me pesaka formasio sambu na kutwadisa kisalu ya kusadisa bampangi. Bampangi yina lenda lomba bavolontere na kusadisa bo to bo lenda lomba bima yina bo kele ti yo mfunu to bo lenda sumba bima kisika yina bo kele mpi kukabudila bampangi.

Yo kele mfunu mingi na kusala mutindu yina. Yo ke salaka nde bampangi kusala ve bisalu ya nkaka ya kukonda mfunu, bo vila ve bima ya nkaka, bo bebisa ve mbongo mpi bima ya nkaka sambu bo salaka ve mambu na mutindu na bo.

Bampangi yina Betele me ponaka lenda zaba ntalu ya mbongo yina yo ta lomba mpi ntalu ya bavolontere sambu na kusala kisalu yina ya kusadisa bantu. Bo lenda solula mpi ti bamfumu ya kisika yina sambu na kusadisa bo sambu kisalu yina kusalama nswalu. Yo yina, bampangi fwete kongula ve mbongo, kutindila ve bampangi yina me bwila kisumbula bima to kukwenda ve kisika yina kisumbula me salama na mpila na bo.

Kana kisumbula me salama, beto ke zolaka kusadisa bampangi. (Ebr 13:16) Beto ke zolaka bo. Inki beto lenda sala? Kima ya kuluta mfunu yina beto lenda sala kele kusamba sambu na bampangi yina me bwila kisumbula mpi sambu na bayina ke sadisa bo. Beto lenda pesa mpi mbongo sambu na kupesa maboko na kisalu yina ke salamaka na ntoto ya mvimba. Na nsi ya lutwadisu ya Nto-Kimvuka, Babetele ta zaba mbote bisika yina mbongo yina ta sadisa mingi. Kana beto ke zola kupesa maboko na kisalu yina, beto lenda fulusa formilere Demande D’admission Comme Volontaire Local Développement/​Construction (DC-50).

TALA VIDEO MASA FULUKAKA NA BRÉSIL MPI BEBISAKA BIMA MPI NA NIMA BENO PESA MVUTU NA NGIUFULA YAI:

Inki me benda dikebi na nge na bikesa yina Bambangi ya Yehowa salaka sambu na kusadisa bantu na Brésil ntangu mvula ya ngolo nokaka na 2020?