Bantotila Zole ya Kele na Kimbeni na Ntangu ya Nsuka
Bambikudulu ya kele na lupangu yai ke tubila mambu yina ke salama na nsungi mosi. Mambu yango ke monisa nde beto ke zinga na “ntangu ya nsuka.”—Dan. 12:4.
Baverse. Kus. 11:7; 12:13, 17; 13:1-8, 12
Mbikudulu. “Mbisi ya mfinda” ke yala ntoto ya mvimba banda bamvula mingi. Na ntangu ya nsuka, ntu na yo ya nsambwadi me lwala. Na nima, ntu yango me beluka mpi “ntoto ya mvimba” ke landa mbisi yai. Satana ke sadila mbisi yai sambu na ‘kunwanisa bayina me bikala.’
Mutindu yo lunganaka. Na nima ya Mvula ya Ngolo, baluyalu yina vandaka kuyala vandaka bambeni ya Nzambi. Bamvula mingi na nima, na Mvita ya Ntete ya Ntoto ya Mvimba, luyalu ya Angleterre vandaka diaka ve ngolo. Yo kumaka diaka ngolo ntangu yo vukanaka ti États-Unis. Na ntangu yai ya nsuka, Satana ke sadila mingi-mingi baluyalu sambu na kubangika bansadi ya Nzambi.
Baverse. Dan. 11:25-45
Mbikudulu. Kimbeni ya ntotila ya nordi mpi ya sudi na ntangu ya nsuka.
Mutindu yo lunganaka. Luyalu ya Allemagne nwaninaka kimfumu ti luyalu ya Anglo-Amerika. Na 1945 luyalu ya union soviétique mpi bansi yina pesaka yandi maboko kumaka ntotila ya nordi. Na 1991, luyalu ya union soviétique sukaka mpi na nima ya bamvula, Russie mpi bansi yina ke pesaka yandi maboko kumaka ntotila ya nordi.
Baverse. Yez. 61:1; Mal. 3:1; Luka 4:18
Mbikudulu. Yehowa me tinda “kinati-nsangu” sambu na ‘kuyidika nzila’ na ntwala nde yandi tula Kimfumu ya Mesia. Nzambi yidikaka kimvuka yai ya bantu sambu bo ‘zabisa nsangu ya mbote na bansukami.’
Mutindu yo lunganaka. Na bamvu 1870, Charles Taze Russell ti banduku na yandi longaka ti kikesa bakieleka ya Biblia. Na bamvu 1880, bo yantikaka kumonisa nde bansadi ya Nzambi fwete longa nsangu. Bo basisaka masolo bonso “Beto ke sosa bansamuni 1 000” mpi “Bo Mepakulama Sambu na Kuzabisa Nsangu.”
Baverse. Mat. 13:24-30, 36-43
Mbikudulu. Mbeni mosi me kuna matiti ya mbi na bilanga yina bo kunaka ble, munkwa-bilanga me ndima nde matiti ya mbi kuyela mpi yo fika ble tii ntangu ya kukatula bima na bilanga ta lunga, na ntangu yina bo ta kabula matiti ya mbi ti ble.
Mutindu yo lunganaka. Na bamvu 1800 tii na nima, Bakristu ya kieleka yantikaka kukabwana ti mabundu ya luvunu. Na bilumbu yai ya nsuka, Bakristu ya kieleka ke vukana na dibundu ya Yehowa mpi me kabwanaka ti mabundu ya luvunu.
Baverse. Dan. 2:31-33, 41-43
Mbikudulu. Makulu ya kibende ya kuvukisa ti ntoto ya kiteki mosi yina bo me sala na bibende mingi.
Mutindu yo lunganaka. Ntoto ya tuma ke monisa bantu yina luyalu ya Anglo-Amerika ke yala. Bantu yango ke teleminaka luyalu yai ebuna bantangu ya nkaka yo ke kukaka ve kusadila ngolo na yo ya me fwanana ti kibende.
Baverse. Mat. 13:30; 24:14, 45; 28:19, 20
Mbikudulu. Bo me “vukisa ble” na nzo ya “kubumba bima.” Mpi bo me tula “mpika ya kwikama mpi ya mayele” bo me pesa yandi mpi kiyeka na zulu ya “bansadi.” Kisalu ya kusamuna me yantika kumwangana na “ntoto ya mvimba.”
Mutindu yo lunganaka. Na 1919, bo tulaka mpika ya kwikama na kukeba bansadi ya Nzambi. Banda na ntangu yina tii bubu yai, Balongoki ya Biblia ke longaka mingi nsangu ya Kimfumu. Bubu yai, Bambangi ya Yehowa ke longaka nsangu na bansi kuluta 200 mpi ke basisaka bisadilu ya ke sadisaka bantu na kulonguka Biblia na bandinga kuluta 1 000.
Baverse. Dan. 12:11; Kus. 13:11, 14, 15
Mbikudulu. Mbisi ya bibongo zole ke pusa bantu na “kusala kifwani ya mbisi ya mfinda” mpi ‘kupesa mupepe’ na kifwani yango.
Mutindu yo lunganaka. Luyalu ya Anglo-Amerika ya Ke Yala Nsi-Ntoto ya Mvimba me pusaka bantu na kusala Société des Nations. Bansi ya nkaka mpi me pesaka maboko na lukanu yai. Na nima, ntotila ya nordi me kumaka mpi kupesa maboko na Société des Nations kansi yandi salaka yo kaka banda na 1926 tii na 1933. Bantu vandaka kupesa Société des Nations lukumu yina bo fwete pesa na Kimfumu ya Nzambi, bubu yai mpi bo ke pesa Nations-Unies (ONU) yina me yingaka yo lukumu ya mutindu mosi.
Baverse. Dan. 8:23, 24
Mbikudulu. Ntotila mosi yina kele ti luse ya nku “ta fwa bantu na mutindu ya kuyituka kibeni.”
Mutindu yo lunganaka. Luyalu ya Anglo-Amerika ya Ke Yala Nsi-Ntoto ya Mvimba ke fwa bantu mingi. Mu mbandu, na Mvita ya Zole ya Ntoto ya Mvimba, États-Unis fwaka bantu mingi kibeni na mutindu mosi yina me salamaka ntete ve ntangu bo losaka babombe zole na insi mosi ya bambeni na bo.
Baverse. Dan. 11:31; Kus. 17:3, 7-11
Mbikudulu. ‘Mbisi ya mfinda ya mbwaki ya ngolo’ yina kele ti bibongo kumi ke basika na dibulu ya nda mpi yo kele ntotila ya nana. Mukanda ya Daniele ke binga ntotila yai “kima ya nzanzi yina ke nataka lufwa.”
Mutindu yo lunganaka. Na Mvita ya Zole ya Ntoto ya Mvimba, Société des Nations vandaka kusala diaka ve bisalu na yo. Na nima ya mvita, bansi salaka Nations unies (ONU). Bantu vandaka kupesa Société des Nations lukumu yina me fwana kupesa na Kimfumu ya Nzambi, bubu yai bantu ke pesa diaka lukumu ya mutindu yina na Nations unies. Nations unies ta nwanisa mabundu.
Baverse. 1 Bate. 5:3; Kus. 17:16
Mbikudulu. Makanda ta tuba “Ngemba mpi lutaninu” mpi “bibongo kumi” mpi “mbisi ya mfinda” ta nwanisa “nkento ya ndumba” mpi ta fwa yandi. Na nima bo ta fwa makanda.
Mutindu yo ta lungana. Makanda ta tuba nde “ngemba mpi lutaninu.” Na nima, bansi yina me salaka kimvuka ya Nations unies ta fwa mabundu ya luvunu. Yo ta vanda luyantiku ya mpasi ya nene. Mpasi ya nene ta suka ntangu bitumba ya Armagedoni ta fwa nsi-ntoto ya mvimba ya Satana.
Baverse. Ezek. 38:11, 14-17; Mat. 24:31
Mbikudulu. Gogi “ta kota na ngolo” na insi ya bansadi ya Nzambi. Na nima bawanzio ta vukisa “bantu yina [bo] me solaka.”
Mutindu yo ta lungana. Ntotila ya nordi ti baluyalu ya nsi-ntoto ta nwanisa bansadi ya Nzambi. Ntangu fioti na nima, bo ta nata na zulu ndambu ya Bakristu ya bo me tulaka mafuta yina me bikalaka na ntoto.
Baverse. Ezek. 38:18-23; Dan. 2:34, 35, 44, 45; Kus. 6:2; 16:14, 16; 17:14; 19:20
Mbikudulu. “Muntu yina vandaka na zulu” ya “mpunda mosi ya mpembe” me ‘nunga tii na nsuka’ sambu yandi me fwa Gogi mpi basoda ya Gogi. Bo me losa “mbisi ya mfinda” na “dizanga ya tiya” mpi bo me panza mpi me buka-buka kiteki ya nene.
Mutindu yo ta lungana. Yezu, Ntotila yina ke yala na Kimfumu ya Nzambi ta kwisa kugulusa bansadi ya Nzambi. Yandi ti bantu 144 000 yina ta yala ti yandi mpi basoda ya zulu, disongidila bawanzio ta fwa bimvuka ya makanda mpi nsi-ntoto ya Satana.