Mambu ya Kusala Sambu na Kuzinga na Ntoto ya Mpa

Na masolo yina me luta, beto monaka nde kubika fioti, Nzambi ta fwa bantu ya mbi mpi ta manisa bampasi yonso. Beto tula kibeni ntima nde mambu yina ta salama. Sambu na nki? Sambu Biblia, Ndinga ya Nzambi ke tuba nde:

“Nsi-ntoto ke luta.”—1 YOANE 2:17.

Beto lenda tula mpi ntima nde bantu ta guluka, sambu verse yai ke tuba mpi nde:

“Muntu yina ke salaka luzolo ya Nzambi ke bikalaka kimakulu.”

Kansi sambu na kuguluka, beto fwete sala luzolo ya Nzambi. Sambu na kuzaba luzolo ya Nzambi, ntete beto fwete zaba yandi.

“ZABA” NZAMBI SAMBU NA KUGULUKA

Bifwanisu: 1. Munganga mosi ya nkento me nieka na ntoto na lupitalu, yandi me lemba mpi mambu ke lutila yandi. 2. Yandi ke pema na kisika ya bo ke tekaka kafe mpi yandi me mona nduku na yandi ya munganga ke tanga zulunalu mosi na kiese yonso. 3. Nduku yina me tangila yandi verse mosi ya Biblia mpi me pesa yandi karte ya jw.org.

Yezu tubaka nde: “Luzingu ya mvula na mvula ke tendula nde, bo zaba nge, Nzambi mosi kaka ya kieleka.” (Yoane 17:3) Sambu beto guluka na nsuka ya nsi-ntoto mpi beto zinga mvula na mvula, beto fwete “zaba” Nzambi. Yo ke tendula nde, katula kundima nde yandi kele to kuzaba mwa mambu ya me tala yandi, beto fwete sala mambu mingi ya nkaka. Beto fwete kuma banduku na yandi. Kana beto ke zola nde kinduku na beto ti muntu mosi buna kukuma ngolo, beto fwete lutisaka ntangu ti yandi. Yo kele mpi kiteso mosi ti kinduku na beto ti Nzambi. Tala mambu ya mfunu yina Biblia ke longa beto mpi ya ta sadisa beto na kukuma banduku ya Nzambi mpi na kutanina kinduku yango.

Mambu ya Kieleka Yina Biblia Ke Longa

Nzambi ke zola nde bantu kuzinga na Paladisu.

Nzambi salaka bantu ya ntete, Adami ti Eva, mpi yandi tulaka bo na kisika mosi ya kitoko. Bo vandaka kubinga kisika yango kilanga ya Edeni. Bo vandaka bantu ya kukuka, mpi Nzambi pesaka bo bima yonso ya bo vandaka ti yo mfunu sambu bo vanda na kiese. Bo lendaka kuzinga mvula na mvula. Kana bo landaka kuvanda banduku ya Nzambi, bo zolaka ve kufwa. Kansi bo ponaka na kubuya kulemfuka na nsiku mosi ya kukonda mpasi ya Nzambi.

Kikuma yina bantu ke monaka mpasi.

Mutindu bakala ya ntete, Adami, buyaka kulemfukila Nzambi, yandi vidisaka dibaku ya kuzinga mvula na mvula sambu na yandi mosi mpi sambu na bantu yonso. Biblia ke tuba nde: “Mutindu disumu kotaka na nsi-ntoto na nzila ya muntu mosi mpi lufwa na nzila ya disumu, mutindu mosi mpi lufwa me mwanganaka na bantu yonso.” (Baroma 5:12) Kaka mutindu muntu lenda baka kifu mosi buna ya nitu na bibuti na yandi, bana yonso ya Adami me bakaka kukonda kukuka na yandi. Yo yina, beto ke nunaka mpi beto ke fwaka.

Mambu yina Nzambi me salaka dezia sambu na bantu.

Biblia ke tuba nde: “Nzambi zolaka nsi-ntoto mingi kibeni yo yina yandi pesaka Mwana na yandi mosi kaka ya kubutuka, sambu konso muntu yina ke monisa lukwikilu na Mwana kufwa ve kansi kubaka luzingu ya mvula na mvula.” (Yoane 3:16) Nzambi tindaka Yezu na ntoto sambu na kupesa luzingu na yandi sambu na beto. Sambu na diambu yai ya ke monisa zola ya Nzambi, Prabhakar ya kele ti bamvula 86 mpi ya ke zingaka na Inde ke tuba nde: “Yo ke monisaka zola ya mingi yina Yehowaa kele ti yo sambu na mono. Zola na yandi me pesaka mono kivuvu ya kuzinga mvula na mvula.”

Mambu ya beto fwete sala sambu na kumonisa ntonda na mambu yina Nzambi me salaka sambu na beto.

Biblia ke tuba nde beto ta monisa ntonda sambu na mambu yina Nzambi me salaka sambu na beto kana beto ‘ke zitisa bansiku na yandi.’ (1 Yoane 2:3) Yehowa Nzambi ke songaka beto mambu ya beto fwete sala sambu na kuvanda na kiese banda bubu. (Yezaya 48:17, 18, noti na nsi ya lutiti) Nzambi ke zola ve nde beto mona mpasi. Yandi ke tuba nde kana beto ke zitisa bansiku na yandi, beto ta vanda na kiese banda bubu mpi beto ta baka luzingu ya mvula na mvula.

TANGA BIBLIA, NDINGA YA NZAMBI, KONSO KILUMBU

Munganga yango me vanda na nganda, yandi me manisa kutanga Biblia na ntangu ya kupema mpi yandi ke tala na zulu. — Kana nge ke samba Nzambi mpi nge ke sala luzolo na yandi, nge ta guluka na nsuka ya nsi-ntoto yai

Sambu na kulanda kuvanda na luzingu, beto ke diaka konso kilumbu. Yezu tubaka nde: “Muntu fwete zinga na mampa mpamba ve, kansi na mambu yonso ya ke basikaka na munoko ya Yehowa.”—Matayo 4:4.

Bubu yai, Biblia ke songaka beto mambu yina Nzambi ke tubaka. Kana nge ke tanga mukanda yina ya santu, nge ta zaba mambu yina Nzambi salaka na ntangu ya ntama, mambu yina yandi ke sala bubu mpi yina yandi ta sala na bilumbu ke kwisa.

SAMBA NZAMBI SAMBU YANDI SADISA NGE

Inki nge fwete sala kana nge ke zola kulemfukila Nzambi kansi nge ke kuka ve kuyambula mambu yina kele mbi na meso na yandi? Kana mpidina, kuzaba Nzambi mbote-mbote lenda sadisa nge.

Beto tadila mbandu ya nkento mosi. Beto ke binga yandi Sakura. Yandi vandaka kusala pite na luzingu na yandi. Ntangu yandi yantikaka kulonguka Biblia, yandi zabaka nde Nzambi ke tubaka nde beto fwete “tina pite.” (1 Bakorinto 6:18) Sakura sambaka Nzambi sambu yandi pesa yandi ngolo ya kuyambula kikalulu yina ya mbi mpi yandi kukaka kuyambula yo. Kansi yo ke lombaka nde yandi nwana ntangu yonso ti bampukumuna. Yandi ke tuba nde: “Kana mabanza ya kusala pite me kwisila mono, mono ke sambaka Yehowa na masonga yonso sambu mono me zaba nde mono lenda nunga ve bitumba yai na ngolo na mono mosi. Ngolo yina kisambu ke vandaka ti yo me kumisaka mono pene-pene ya Yehowa.” Bonso Sakura, bamilio ya bantu bubu ke longuka na kuzaba Nzambi. Yandi ke pesaka bo ngolo ya kusala bansoba na luzingu na bo sambu na kuzinga na mutindu yina ke sepedisaka yandi.—Bafilipi 4:13.

Kana nge me zaba Nzambi, ‘Nzambi ta zaba’ nge mpi, ebuna kinduku na nge ti yandi ta kuma ngolo. (Bagalatia 4:9; Nkunga 25:14) Mpidina, nge ta fwana sambu na kuguluka mpi kuzinga na ntoto ya mpa ya Nzambi. Kansi nsi-ntoto yina ya mpa ta vanda nki mutindu? Disolo ya ke landa ta pesa mvutu.

a Yehowa kele zina ya Nzambi mutindu Biblia ke monisaka yo.