Nge Lenda Pona Mutindu Luzingu na Nge Ta Vanda na Bilumbu Ke Kwisa

Bamvula kiteso ya 3500 me luta, Yehowa Nzambi songaka bansadi na yandi mambu yina bo fwete sala sambu bo vanda ti luzingu ya mbote na bilumbu ke kwisa. Yandi tubaka nde: “Mono me tula luzingu mpi lufwa na ntwala na nge, lusakumunu mpi kusinga; nge fwete sola luzingu sambu nge zinga, nge ti bana na nge.”—Kulonga 30:19.

Sambu na kuvanda ti luzingu ya mbote na bilumbu ke kwisa, yo lombaka nde bansadi ya Yehowa na ntangu yina kubaka desizio mosi ya mbote. Bubu mpi, beto fwete sala mutindu mosi. Biblia ke songa beto mambu yina beto fwete sala sambu na kuvanda ti luzingu ya mbote na bilumbu ke kwisa. Yo ke tuba nde: ‘Nge fwete zola Yehowa Nzambi na nge mpi nge fwete widikila ndinga na yandi.’—Kulonga 30:20.

INKI MUTINDU BETO LENDA ZOLA YEHOWA MPI KUWIDIKILA NDINGA NA YANDI?

LONGUKA BIBLIA: Sambu na kuzola Yehowa, nge fwete longuka ntete mambu yina me tala yandi na Biblia. Kana nge ke sala yo, nge ta bakisa nde yandi kele Nzambi ya zola mpi yandi ke zolaka nde nge vanda mbote. Yandi ke lomba nge na kusambila yandi ‘sambu yandi ke kudibanzaka sambu na nge.’ (1 Piere 5:7) Biblia ke tuba nde kana nge ke sala bikesa sambu na kukuma nduku na yandi, ‘yandi ta kwisa pene-pene na nge.’—Yakobo 4:8.

SADILA MAMBU YINA NGE KE LONGUKA: Sambu na kuwidikila Nzambi, nge fwete sadila bandongisila yina kele na Biblia. Kana nge ke sadila yo, “nge ta nunga, mpi nge ta sala mambu na mayele.”—Yozue 1:8.