Beto Lenda Zinga Mvula na Mvula

1. Inki mutindu kuyindula na mudindu lusilu ya Yehowa ya luzingu ya mvula na mvula ke sadisaka beto?

YEHOWA ke tuba nde bantu yina ke lemfukilaka yandi ta baka “luzingu ya mvula na mvula.” (Bar. 6:23) Kana beto ke yindula na mudindu lusilu yina Yehowa me pesaka beto, beto ta kuma kuzola yandi diaka mingi. Yindula diambu yai: Tata na beto ya zulu ke zolaka beto mingi kibeni yo yina yandi me pesaka beto lusilu yina ya kitoko mpi ata kima mosi ve ta kabula beto ti yandi.

2. Inki mutindu lusilu ya luzingu ya mvula na mvula ke sadisaka beto?

² Lusilu ya Nzambi ya luzingu ya mvula na mvula ke sadisaka beto na kukanga ntima na bampasi yina beto ke kutana ti yo. Ata bambeni kutuba nde bo ta fwa beto, beto ta yambula ve kusadila Yehowa. Sambu na nki? Sambu kana beto me kangama kaka na Yehowa ata kana bo fwa beto, yandi ta futumuna beto mpi beto ta fwa diaka ve. (Yoa. 5:28, 29; 1 Bak. 15:55-58; Baeb. 2:15) Sambu na nki beto fwete ndima kibeni nde beto lenda zinga mvula na mvula? Beto tadila mambu yai ya ke monisa yo.

YEHOWA KE ZINGAKA MVULA NA MVULA

3. Sambu na nki beto fwete ndima kibeni nde Yehowa ta pesa beto luzingu ya mvula na mvula? (Nkunga 102:12, 24, 27)

³ Beto me zaba nde Yehowa ta pesa beto luzingu ya mvula na mvula sambu yandi kele Nto ya luzingu mpi yandi ke zingaka mvula na mvula. (Nk. 36:9) Beto tadila mwa baverse ya ke monisa nde Yehowa ke zingaka mvula na mvula mpi nde yandi ta zingaka mvula na mvula. Nkunga 90:2 ke tuba nde Yehowa kele “katuka mvula na mvula tii mvula na mvula.” Nkunga 102 ke tuba mpi kima ya mutindu mosi. (Tanga Nkunga 102:12, 24, 27.) Profete Habakuki tubaka sambu na Tata na beto ya zulu nde: “O Yehowa, keti nge ke zingaka ve tuka mvula na mvula? O Nzambi na mono, Santu na mono, nge ke fwaka ve.”​—Hab. 1:12.

4. Keti beto fwete kudiyangisa kana yo kele mpasi sambu beto bakisa mutindu Yehowa ke zingaka mvula na mvula? Tendula.

⁴ Mbala ya nkaka yo ke vandaka mpasi sambu nge bakisa mutindu Yehowa ke zingaka “mvula na mvula.” (Yez. 40:28) Yo ke vandaka mpi mpasi sambu bantu mingi kubakisa yo. Elihu tubaka sambu na Nzambi nde: “Muntu lenda bakisa ve ntalu ya bamvula na yandi.” (Yobi 36:26) Kansi kana beto ke bakisa ve kima mosi, yo ke tendula ve nde kima yango kele ve kieleka. Mu mbandu, kana beto ke bakisa ve mbote-mbote mutindu nsemo ke salaka, yo ke tendula ve nde nsemo ke vandaka ve. Mutindu mosi, beto bantu ta bakisaka ve ata fioti mbote-mbote mutindu Yehowa ke zingaka mvula na mvula mpi nde yandi ta zingaka mvula na mvula. Kansi yo ke tendula ve nde Nzambi ke zingaka ve mvula na mvula. Kieleka na yina me tala Ngangi ke tadila ve mambu yina beto lenda bakisa to yina beto lenda bakisa ve. (Bar. 11:33-36) Yandi vandaka na ntwala nde yandi sala bima yonso yina kele na zulu mpi na ntoto. Mu mbandu, ntangu mpi bambwetete. Yehowa ke ndimisa beto nde “yandi Muntu salaka ntoto na ngolo na yandi.” Ya kieleka, Yehowa vandaka na ntwala nde yandi ‘tandula zulu.’ (Yer. 51:15; Bis. 17:24) Inki kele kikuma ya nkaka ya ke ndimisaka beto nde beto lenda zinga mvula na mvula?

YEHOWA SALAKA BETO SAMBU BETO ZINGA MVULA NA MVULA

5. Inki kivuvu Yehowa pesaka Adami ti Eva?

⁵ Bima ya ke zingaka yina Yehowa salaka na ntoto zolaka kufwa. Kansi bantu zolaka kufwa ve. Yandi pesaka bo kivuvu mosi ya kitoko ya kuzinga mvula na mvula. Kansi Yehowa songaka Adami nde: “Nge fwete dia ve mbuma ya nti ya kuzaba mambu ya mbote ti ya mbi, sambu kilumbu yina nge ta dia yo, nge ta fwa kibeni.” (Kuy. 2:17) Kana Adami ti Eva lemfukilaka Yehowa, bo zolaka kufwa ve. Beto lenda tuba nde nsuka-nsuka, Yehowa zolaka kupesa bo nswa ya kudia mbuma ya “nti ya luzingu.” Yo zolaka kutendula nde Yehowa zolaka kundimisa bo nde bo ta “zinga kimakulu.”b​—Kuy. 3:22.

6-7. (a) Inki diaka ke monisa nde Nzambi salaka ve bantu sambu bo fwa? (b) Inki mambu nge ta zola kusala na nsi-ntoto ya mpa? (Tala bifwanisu ya ke wakana ti baparagrafe yai.)

⁶ Bantu ya siansi me bakisaka nde butomfu na beto kele ti makuki ya kubumba bansangu mingi kuluta yina yo ke bumbaka luzingu na beto ya mvimba. Yo ke yitukisa kibeni. Na 2010, zulunalu mosi tubaka nde butomfu na beto kele ti makuki ya kubumba bansangu kiteso ya bangunga bamilio tatu ya video. Nge lenda sala bamvula kuluta 300 sambu na kumanisa kutala video yina. Yo ke monana nde butomfu na beto, lenda bumba mambu mingi kuluta yina zulunalu yina ke tubila. Yo ke monisa nde Yehowa salaka butomfu na beto ti makuki ya kubumba bansangu mingi kuluta yina yo ke bumbaka na bamvula 70 to 80.​—Nk. 90:10.

⁷ Yehowa me salaka beto mpi ti mpusa ya ngolo ya kulanda kuzinga. Biblia ke tuba nde Nzambi me tulaka na ntima ya bantu “ngindu ya kuzinga mvula na mvula.” (Lon. 3:11) Yo yina beto ke monaka lufwa mbeni na beto. (1 Bak. 15:26) Kana beto ke bela ngolo, keti beto ke salaka ve ata kima mosi mpi beto ke vingilaka kaka lufwa? Ve. Beto ke kwendaka na munganga mpi mbala ya nkaka beto ke nwaka nkisi yina ta belula maladi yina beto ke bela. Beto ke salaka bikesa sambu beto fwa ve. Kana muntu mosi yina beto ke zolaka me fwa yo vanda leke to mununu, beto ke waka mpasi mingi bantangu ya nda. (Yoa. 11:32, 33) Ya kieleka, kana Yehowa zolaka ve nde beto zinga mvula na mvula, yandi zolaka ve kusala beto ti mpusa ya kuzinga mvula na mvula. Kansi kele ti bikuma mingi ya nkaka ya ke pusa beto na kundima nde beto lenda zinga mvula na mvula. Beto tadila ntangu yai, mambu yina Yehowa salaka na ntangu ya ntama mpi yina yandi ke sala bubu yai ya ke monisa nde yandi me sobaka ve lukanu na yandi ya kisina.

YEHOWA ME SOBAKA VE LUKANU NA YANDI

8. Yezaya 55:11 ke ndimisa beto nki na yina me tala lukanu ya Yehowa sambu na beto?

⁸ Ata Adami ti Eva salaka disumu mpi yo salaka nde nsuka-nsuka bana na bo kufwa, Yehowa me sobaka ve lukanu na yandi sambu na bantu. (Tanga Yezaya 55:11.) Yandi ke zola nde bantu yina ke sadilaka yandi na mutindu ya mbote kuzinga mvula na mvula na bilumbu ke kwisa. Beto me zaba yo na nzila ya mambu yina Yehowa me tubaka mpi me salaka sambu na kulungisa lukanu na yandi.

9. Inki Nzambi me silaka beto? (Daniele 12:2, 13)

⁹ Yehowa me tubaka nde yandi ta futumuna bafwa mpi yandi ta pesa bo dibaku ya kuzinga mvula na mvula. (Bis. 24:15; Tito 1:1, 2) Yobi, muntu ya kwikama ndimaka kibeni nde Yehowa ke vandaka ti nzala ya ngolo ya kufutumuna bantu yina me fwaka. (Yobi 14:14, 15) Profete Daniele zabaka mbote nde Yehowa ta futumuna bafwa mpi yandi ta pesa bo dibaku ya kuzinga mvula na mvula. (Nk. 37:29; tanga Daniele 12:2, 13.) Na bilumbu ya Yezu, Bayuda zabaka mpi nde Yehowa ta pesa bansadi na yandi ya kwikama “luzingu ya mvula na mvula.” (Luka 10:25; 18:18) Yezu vandaka kutubila lusilu yina mbala mingi mpi Tata na yandi muntu futumunaka yandi.​—Mat. 19:29; 22:31, 32; Luka 18:30; Yoa. 11:25.

10. Mutindu bantu futumukaka na ntangu ya ntama ke ndimisa beto nki? (Tala kifwanisu ya ke wakana ti paragrafe yai.)

¹⁰ Yehowa kele Muntu Yina Ke Pesaka Luzingu mpi yandi kele ti ngolo ya kufutumuna bafwa. Yandi pesaka profete Eliya ngolo ya kufutumuna mwana-bakala ya mufwidi ya Sarefati. (1 Bant. 17:21-23) Na nima, Nzambi pesaka profete Elisha ngolo ya kufutumuna mwana ya nkento ya Shunemi. (2 Bant. 4:18-20, 34-37) Mutindu Eliya mpi Elisha futumunaka bantu mpi mutindu bantu ya nkaka futumukaka, yo ke monisa nde Yehowa kele ti ngolo ya kufutumuna bafwa. Ntangu Yezu vandaka na ntoto, yandi monisaka nde Tata na yandi pesaka yandi ngolo ya kufutumuna bafwa. (Yoa. 11:23-25, 43, 44) Bubu yai, Yezu kele na zulu mpi Nzambi me pesaka yandi “kiyeka yonso na zulu mpi na ntoto.” Yo yina yandi ta lungisa lusilu ya ke tuba nde “bantu yonso yina kele na maziamu ya kuyibuka” ta futumuka mpi bo ta vanda ti kivuvu ya kuzinga mvula na mvula.​—Mat. 28:18; Yoa. 5:25-29.

11. Inki mutindu kimenga ya Yezu ke pesaka beto dibaku ya kuzinga mvula na mvula?

¹¹ Sambu na nki Yehowa pesaka nzila nde Mwana na yandi yina yandi ke zolaka mingi kufwa lufwa mosi ya mpasi? Yezu pesaka mvutu na ngiufula yina ntangu yandi tubaka nde: “Nzambi zolaka nsi-ntoto mingi kibeni yo yina yandi pesaka Mwana na yandi mosi kaka ya kubutuka, sambu konso muntu yina ke monisa lukwikilu na Mwana kufwa ve kansi kubaka luzingu ya mvula na mvula.” (Yoa. 3:16) Mutindu Yehowa pesaka kimenga ya Mwana na yandi sambu na masumu na beto, yo ke pesaka beto dibaku ya kubaka luzingu ya mvula na mvula. (Mat. 20:28) Ntumwa Polo mpi tendulaka kitini yina ya mfunu ya lukanu ya Nzambi ntangu yandi sonikaka nde: “Sambu lufwa kwisaka na nzila ya muntu mosi, lufutumuku ya bafwa mpi ke kwisa na nzila ya muntu mosi. Sambu, kaka mutindu na Adami bantu yonso ke fwaka, mutindu mosi mpi na Kristu bantu yonso ta baka luzingu.”​—1 Bak. 15:21, 22.

12. Inki mutindu Yehowa ta lungisa lukanu na yandi?

¹² Yezu longaka balongoki na yandi na kusamba sambu Kimfumu ya Nzambi kukwisa mpi sambu luzolo ya Nzambi kusalama na ntoto. (Mat. 6:9, 10) Lukanu ya Nzambi kele mpi nde bantu kuzinga mvula na mvula na ntoto. Sambu na kulungisa lukanu yango, Yehowa me tulaka Mwana na yandi Ntotila ya Kimfumu ya Mesia. Nzambi me ponaka bantu 144 000 na ntoto na kusala ti Yezu sambu na kulungisa luzolo na yandi.​—Kus. 5:9, 10.

13. Inki Yehowa ke sala bubu yai mpi nki beto fwete sala?

¹³ Bubu yai, Yehowa ke vukisa “kimvuka mosi ya nene” ya bantu mpi yandi ke longa bo sambu bo vanda bantu ya Kimfumu na yandi. (Kus. 7:9, 10; Yak. 2:8) Ata bubu yai, bantu mingi na nsi-ntoto yai kele ya kukabwana sambu na kimbeni mpi bitumba, bantu ya ‘kimvuka ya nene’ ke salaka yonso sambu na kuzinga na ngemba. Na kutuba ya kifwani, bo ke na kukumisa dezia bambele na bo ya bitumba, bima ya kubundudila ntoto. (Mika 4:3) Bo ke nwanaka ve bitumba sambu yo ke salaka nde bantu mingi kufwa. Kansi bo ke sadisaka bantu na kuzwa “luzingu ya kieleka” ntangu bo ke longaka bo mambu ya me tala Nzambi ya kieleka mpi balukanu na yandi. (1 Tim. 6:19) Bantu ya mabuta na bo lenda telemina bo to bo lenda vanda diaka ve ti mbongo sambu bo ke pesa maboko na Kimfumu ya Nzambi. Kansi Yehowa ke salaka yonso sambu na kupesa bo bima yina bo kele na yo mfunu. (Mat. 6:25, 30-33; Luka 18:29, 30) Mambu yina ke ndimisa beto nde Kimfumu ya Nzambi kele kibeni kieleka mpi nde yo ta landa kulungisa balukanu ya Nzambi.

LUZINGU YA MBOTE NA BILUMBU KE KWISA

14-15. Inki mutindu lukanu ya Yehowa ya kukatula lufwa kimakulu ta lungana?

¹⁴ Bubu yai, Yezu kele Ntotila ya Kimfumu ya Nzambi mpi yandi ta lungisa balusilu yonso yina Yehowa me silaka. (2 Bak. 1:20) Banda na 1914, Yezu me nungaka bambeni na yandi. (Nk. 110:1, 2) Kubika fioti, yandi ti bantu yina ta yala ti yandi ta fwa bantu yonso ya mbi.​—Kus. 6:2.

¹⁵ Na nsungi ya Luyalu ya Yezu ya Bamvula Funda, bafwa ta futumuka mpi bantu ya bulemfu ta kuma bantu ya kukuka. Na nima ya kumekama ya nsuka, bantu ya lunungu “ta baka ntoto, mpi bo ta zinga kimakulu na zulu na yo.” (Nk. 37:10, 11, 29) Diambu ya kiese kele nde, Yehowa “ta katula lufwa, mbeni ya nsuka.”​—1 Bak. 15:26.

16. Inki kele kikuma ya kuluta mfunu ya ke pusaka beto na kusadila Yehowa?

¹⁶ Mutindu beto me mona yo na disolo yai, kivuvu na beto ya kuzinga mvula na mvula me simbama ngolo na Ndinga ya Nzambi. Kivuvu yina lenda sadisa beto na kukangama kaka na Yehowa na bilumbu yai ya mpasi mingi. Kansi sambu na kusepedisa Yehowa, beto fwete suka ve kaka na kuvanda ti kivuvu ya kuzinga mvula na mvula. Beto fwete sala diaka mambu ya nkaka. Kikuma ya kuluta mfunu yina ke pusaka beto na kukangama kaka na Yehowa mpi na Yezu kele zola na beto ya ngolo sambu na bo. (2 Bak. 5:14, 15) Yo ke pusaka beto na kulanda mbandu na bo mpi na kusonga bantu ya nkaka kivuvu yina beto kele ti yo. (Bar. 10:13-15) Kana beto ke sala yonso sambu na kuvanda ve bantu ya bwimi mpi kana beto ke kaba, Yehowa ta sepela kuvanda nduku na beto mvula na mvula.​—Baeb. 13:16.

17. Beto kele ti mukumba ya kusala nki? (Matayo 7:13, 14)

¹⁷ Keti beto ta vanda na kati ya bantu yina ta baka luzingu ya mvula na mvula? Yehowa me pesaka beto dibaku yina. Ntangu yai, beto mosi fwete sala yonso sambu na kulanda nzila yina ke nataka na luzingu. (Tanga Matayo 7:13, 14.) Luzingu ta vanda nki mutindu ntangu beto ta zinga mvula na mvula? Beto ta baka mvutu na ngiufula yina na disolo ya ke landa.