Keti Nge Ke Yibuka?

Keti nge tangaka na dikebi yonso masolo ya Banzozulu ya Nkengi ya mvula yai? Tala kana nge lenda pesa bamvutu na bangiufula yai:

Inki mambote beto ta baka kana beto ke solula ti Yehowa, kana beto ke widikila yandi mpi kana beto ke yindula mambu na yandi?

Beto ta baka balukanu ya mbote, beto ta kuma balongi ya mbote, lukwikilu na beto ta kuma ngolo mpi beto ta kuma kuzola Yehowa mingi​—w22.01, balut. 30-31.

Inki mambote beto ta baka kana beto ke tudila Yehowa ntima mpi bantu yina yandi me pesaka mikumba na organizasio na yandi?

Yai ntangu ya kutudila Nzambi ntima na mambu yonso. Beto fwete landa lutwadisu yina bankuluntu ke pesa mpi balukanu yina bo ke baka. Ntangu mpasi ya nene ta yantika, beto ta lemfukila bo kukonda mpasi ata bo pesa beto bantuma yina lenda yitukisa beto to yina beto lenda yindula nde yo me fwana ve​—w22.02, balut. 4-6.

Wanzio zolaka kutuba nki ntangu yandi songaka Zekaria mambu ya me tala “nsinga ya bamaso na diboko ya [guvernere] Zorobabele”? (Zek. 4:8-10)

Mbona-meso yina ndimisaka bansadi ya Nzambi nde tempelo yina bo vandaka kutunga ta mana mpi yo ta vanda mutindu yina Nzambi zolaka nde yo vanda​—w22.03, balut. 16-17.

Inki mutindu beto lenda vanda “mbandu . . . na kutuba”? (1 Tim. 4:12)

Beto fwete tuba ti mawete mpi luzitu na kisalu ya kulonga nsangu ya mbote, beto fwete yimba na ntima ya mvimba na balukutakanu mpi kupesa bamvutu mbala na mbala. Beto fwete tuba mambu ya masonga mpi kupesa bampangi kikesa mpi beto fwete tuba ve mambu ya mbi​—w22.04, balut. 6-9.

Sambu na nki bidimbu ya bambisi ya mfinda iya (bimfumu) yina Daniele kapu 7 ke tubila, yonso kele na mbisi ya mfinda yina Kusonga 13:1, 2 ke tubila?

Mbisi ya mfinda yina Kusonga 13 ke tubila ke monisa ve kimfumu mosi buna, mu mbandu Roma. Kansi yo ke monisa bangolo yonso ya ntoto ya mvimba yina me yalaka bantu​—w22.05, lut. 9.

Inki kele mambu ya mfunu ya beto fwete sala sambu na kutula ntima na lunungu ya Nzambi?

Kana muntu mosi me finga beto to me sadila beto diambu ya mbi, beto ke salaka yonso sambu na kukangila yandi ve kimbeni, beto ke bikaka mambu na maboko ya Yehowa. Yandi ta katula bampasi yonso yina disumu me nataka​—w22.06, balut. 10-11.

Mpangi yina ke sala kisambu na lukutakanu fwete vila ve nki ntangu yandi ke samba?

Kisambu kele ve dibaku ya kupesa bampangi na dibundu bandongisila to kupesa baluzayisu. Yo kele mpi ve mfunu na kutuba “bangogo mingi,” mingi-mingi na luyantiku ya lukutakanu. (Mat. 6:7)​—w22.07, balut. 24-25.

Inki mutindu bantu yina “salaka mambu ya mbi” ta futumuka sambu bo ‘sambisa bo’? (Yoa. 5:29)

Bo ta sambisa bo ve na kutadila mambu yina bo salaka ntangu bo vandaka na luzingu. Kansi bo ta sambisa bo na kutadila mambu yina bo ta sala na nima ya lufutumuku na bo​—w22.09, lut. 18.

Inki mambu ya ke pesa kikesa mpangi Rutherford tubaka na lukutakanu ya distrike yina salamaka na Septembre 1922?

Na lukutakanu ya distrike yina salamaka na Cedar Point, na Ohio na États-Unis, yandi tubaka nde: “Ntotila ke yala! Beno kele bantu yina ke zabisaka nsangu na yandi. Yo yina, beno samuna, beno samuna, beno samuna, Ntotila mpi Kimfumu na yandi.”—w22.10, balut. 3-5.

Inki mambu tatu Yezaya kapu 30 ke tubila yina Nzambi ke salaka sambu na kusadisa beto na kukanga ntima?

Kapu yina ke monisa nde yandi (1) ke widikilaka bisambu na beto mpi ke pesaka bamvutu, (2) ke twadisaka beto mpi (3) ke pesaka beto bima ya mbote bubu yai mpi ntangu yandi ta sala mutindu mosi na bilumbu ke kwisa​—w22.11, lut. 9.

Sambu na nki beto ke tuba nde mambu yina kele na Nkunga 37:10, 11, 29 lunganaka na ntangu ya ntama mpi yo ta lungana na bilumbu ke kwisa?

Mambu yina Davidi tubaka ke monisa luzingu ya mbote yina bantu ya Izraele vandaka ti yo ntangu Salomo vandaka kuyala. Yezu vutukilaka mambu yina kele na verse 11 ya Nkunga yina sambu na kumonisa nde mambu yina ta salama na Paladisu na bilumbu ke kwisa. (Mat. 5:5; Luka 23:43)​—w22.12, balut. 8-10, 14.