4 | Biblia Ke Pesaka Bandongisila ya Mfunu

Yo Ke Tendula Nki?

Biblia kele ve mukanda ya kimunganga kansi yo ke pesaka beto bandongisila ya mbote mpi ya mfunu mingi. Bandongisila yango lenda sadisa muntu yina ke niokwama na mabanza. Beto tadila mwa bambandu yai.

Inki Mutindu Yo Lenda Sadisa nge?

“Bantu yina kele na mavimpi ya mbote ke vandaka na mfunu ya munganga ve, kansi bayina kele na maladi bantu ke vandaka na mfunu na yandi.”​—MATAYO 9:12.

Biblia ke monisaka nde beto lenda vanda na mfunu ya lusadisu ya munganga. Bantu mingi yina ke belaka maladi ya basusi to ke niokwamaka na mabanza, me bakaka lusadisu sambu na kuzaba mbote-mbote maladi na bo mpi bo ke kwendaka kumona minganga yina ke sansaka maladi yango.

‘Bansaka ya kupesa nitu ngolo kele mfunu.’​—1 TIMOTEO 4:8, Bible en Kituba.

Kusala bansaka yina ke pesaka ngolo na nitu lenda sadisa muntu yina ke niokwama na mabanza to ke bela maladi ya basusi na kudiwa mbote. Yandi fwete sala yo mbala na mbala, kudia madia ya mbote mpi kulala mingi.

“Ntima ya kiese kele nkisi ya mbote kansi mabanza ya ke niokwama ke katulaka ngolo ya muntu.”​—BINGANA 17:22.

Kutanga baverse ya Biblia yina ke pesaka kikesa mpi kuditudila balukanu yina nge lenda lungisa ta sadisa nge na kuvanda ti ngemba ya mabanza. Kana nge ke tula dikebi ya mingi na mambu ya mbote ya ke kumina nge na luzingu mpi nge ke ndima nde na bilumbu ke kwisa mambu yonso ta bonga, yo ta sadisa nge na kuwa mbote.

“Mayele ke vandaka ti bantu ya kudikulumusa.”​—BINGANA 11:2.

Kana nge ke kuka ve kusala kima mosi buna, nge lenda ndima lusadisu ya bantu ya nkaka. Banduku mpi bantu ya dibuta na nge lenda vanda ti nzala ya kusadisa nge kansi bo lenda zaba ve mutindu ya kusala yo. Nge lenda songa bo mutindu bo lenda sala yo. Kulomba bo ve na kusala mambu mingi kansi pesa bo mersi ntangu yonso sambu na mambu yina bo ke sadila nge.

Mutindu Bandongisila ya Biblia Ke Sadisaka Bantu Yina Ke Belaka Maladi Yai

“Mono vandaka kudiwa mbote ve, yo yina mono kwendaka kumona doktere. Yandi zabaka maladi yina vandaka kuyangisa mono. Yo sadisaka mono na kuzaba maladi ya mono vandaka kubela mpi kuzaba bankisi yina mono lenda baka sambu mono kudiwa mbote.”​—Nicole,a yina ke belaka maladi ya ntu (trouble bipolaire).

“Mono me bakisaka nde kutanga Biblia mbala na mbala ti nkento na mono ke sadisaka mono na kubanda kilumbu ti bangindu ya mbote mpi ya ke pesa kikesa. Mbala mingi na kilumbu kana basusi me lutila mono, verse mosi ya mono tangaka ke pesaka mono kikesa.”​—Peter, yina ke belaka maladi ya kuniokwama na mabanza.

“Yo vandaka mpasi na kutela bantu ya nkaka maladi yina mono ke belaka sambu mono vandaka kuwa nsoni mingi. Kansi nduku na mono mosi ya nkento vandaka kubakisa mono mbote mpi kuditula na kisika na mono. Yandi sadisaka mono mpenza na kudiwa mbote mpi na kumona nde mono kele ve mono mosi.”​—Mpangi-nkento Ji-yoo, yina ke belaka maladi ya ke salaka nde muntu kudia mingi to ya ke katulaka mpusa ya kudia (troubles alimentaires).

“Biblia me sadisaka mono na kutula kisalu mpi kupema na kisika na yo. Bandongisila na yo ke sadisaka mono na kunwana ti maladi ya basusi ya mono ke belaka.”​—Timothy, yina ke belaka maladi ya basusi.