Kulolula Masumu Yina Salamaka na Ntangu ya Ntama

Yehowa lenda lolula masumu na beto kaka na nzila ya kimenga ya Yezu. (Baef. 1:7) Kansi Biblia ke tuba nde: ‘Nzambi vandaka kukanga ntima mpi kulolula masumu yina salamaka na ntangu ya ntama,’ yo ke tendula nde na ntwala nde Yezu kupesa luzingu na yandi bonso kimenga. (Bar. 3:25) Inki mutindu Yehowa lendaka kulolula masumu na ntwala nde Yezu kupesa luzingu na yandi bonso kimenga mpi yandi landa kaka kuvanda Nzambi ya lunungu?

Yehowa silaka nde “mwana” mosi ta gulusa bantu yina ta kwikila na yandi mpi na balusilu na yandi. Ntangu Yehowa tubaka mambu yina, yo vandaka bonso nde mwana yina pesaka dezia luzingu na yandi bonso kimenga. (Kuy. 3:15; 22:18) Yehowa ndimaka kibeni nde na ntangu yina yandi tulaka, Mwana na yandi mosi kaka ya kubutuka ta ndima kupesa luzingu na yandi bonso kimenga. (Bag. 4:4; Baeb. 10:​7-10) Ntangu Yezu vandaka awa na ntoto, Nzambi pesaka yandi kiyeka ya kulolula masumu na ntwala nde yandi pesa luzingu na yandi bonso kimenga. Yezu salaka yo sambu yandi zabaka nde luzingu na yandi yina yandi ta pesa bonso kimenga, ta sala nde Yehowa kulolula masumu na bo.—Mat. 9:​2-6.