Mutindu Dibundu Ke Landaka Mbandu ya Yehowa Kana Mpangi Me Sala Disumu

1. Inki Yehowa ke zola sambu na bantu yonso?

YEHOWA me pesaka bantu nswa ya kupona. Beto ke sadilaka dikabu yai mbala na mbala ntangu beto ke bakaka balukanu. Lukanu ya kuluta mfunu kele kudipesa na Yehowa mpi kukuma nsadi na yandi. Yehowa ke zola nde bantu yonso kubaka lukanu yai. Sambu na nki? Sambu yandi ke zolaka bantu mpi ke zolaka mambote na bo. Yehowa ke zolaka nde bantu kukuma banduku na yandi sambu bo zinga mvula na mvula.​—Kul. 30:19, 20; Bag. 6:7, 8.

2. Inki mutindu Yehowa ke tadilaka bantu yina ke salaka masumu ya nene kansi ke balula ve ntima? (1 Yoane 2:1)

² Ata mpidina, Yehowa ke pusaka ve bantu na kingolo-ngolo na kusadila yandi. Yandi ke bikaka konso muntu kupona mambu yina yandi ta sala. Kansi, nki beto ta sala kana mpangi mosi ya me bakaka mbotika me fwa bansiku ya Nzambi, disongidila me sala disumu ya nene? Kana yandi me balula ve ntima, bo fwete katula yandi na dibundu. (1 Bak. 5:13) Ata mpidina, Yehowa ke vandaka ti kivuvu nde mpangi yina me sala disumu ya nene ta kuma diaka nduku na yandi. Kikuma ya mfunu mingi yina yandi pesaka kimenga ya Yezu kele sambu yandi lolula bantu yina ke balula ntima. (Tanga 1 Yoane 2:1.) Nzambi ya zola ke bondila kibeni bantu yina ke salaka masumu na kubalula ntima.​—Zek. 1:3; Bar. 2:4; Yak. 4:8.

3. Inki beto ta tubila na disolo yai?

³ Yehowa ke zola nde beto tadila disumu mpi bantu ya ke sala masumu mutindu yandi ke tadilaka bo. Disolo yai ta tubila mutindu beto lenda sala yo. Ntangu nge ke tanga disolo yai, tala mutindu (1) bo yidikaka disumu ya nene yina muntu mosi salaka na Korinto na bilumbu ya Bakristu ya ntete, (2) mambu yina ntumwa Polo tubaka ntangu muntu yango balulaka ntima mpi (3) mutindu disolo yango ke monisa mutindu Yehowa ke tadilaka bampangi yina me sala disumu ya nene.

MUTINDU BO YIDIKAKA DISUMU YA NENE YINA SALAMAKA NA BILUMBU YA BAKRISTU YA NTETE

4. Inki mambu salamaka na dibundu ya Korinto na bilumbu ya Bakristu ya ntete? (1 Bakorinto 5:1, 2)

⁴ Tanga 1 Bakorinto 5:1, 2. Na voyage ya Polo ya tatu ya kimisionere, yandi waka mambu ya nsoni mingi yina salamaka na dibundu ya Korinto yina katukaka kukanguka. Na dibundu yango, mpangi mosi vukisaka nitu ti nkento ya tata na yandi. Yo vandaka mambu ya mbi kibeni, “pite ya mutindu yina kele nkutu ve na kati ya makanda”! Bampangi monaka ve diambu yina mbi mpi bo monaka nde mpangi yina lenda landa kuvanda na dibundu. Mbala ya nkaka, bampangi ya nkaka yindulaka nde bo ke wila muntu yina mawa mutindu Nzambi ke wilaka bantu mawa. Kansi, Yehowa ke ndimaka ve masumu na dibundu na yandi. Mambu ya mbi ya mpangi yina salaka fingisaka zina ya Yehowa. Yandi lendaka kubebisa mpi bikalulu ya bampangi ya nkaka ya vandaka kukangama ti yandi. Inki Polo songaka dibundu na kusala?

5. Inki Polo songaka dibundu mpi yo tendulaka nki? (1 Bakorinto 5:13) (Tala mpi kifwanisu.)

⁵ Tanga 1 Bakorinto 5:13. Mpeve santu sadisaka Polo na kusonika mukanda yina monisaka nde bo katula muntu yina balulaka ve ntima na dibundu. Inki mutindu bampangi kumaka kutadila muntu yango? Polo songaka bo “na kuyambula kuvukana” ti yandi. Yo ke tendula nki? Polo monisaka nde nsiku yango ke tadila mpi “kudia nkutu ve ti muntu ya mutindu yina.” (1 Bak. 5:11) Kudia ti muntu lenda pesa dibaku ya kulutisa ntangu mpi kusolula ti yandi kukonda mpasi. Ya kieleka, Polo monisaka nde bampangi fwete vukana ve ti muntu yina. Mpidina kikalulu yina ya mbi ta bebisa ve na dibundu. (1 Bak. 5:5-7) Diaka, kukonda kuvukana ti muntu yina ta sadisa yandi na kubakisa nde yandi me kuma ntama ti Yehowa, mpidina yandi lenda wa nsoni mpi kubalula ntima.

6. Inki mutindu dibundu mpi muntu yina salaka disumu tadilaka mukanda ya Polo?

⁶ Na nima ya kutindila bampangi ya Korinto mukanda, Polo kumaka kudiyula mutindu bampangi ta tadila yo. Na nima, Tito natilaka yandi nsangu ya kiese nde dibundu sepelaka ti mukanda na yandi. (2 Bak. 7:6, 7) Bo lemfukaka na mambu yina Polo songaka bo. Kima ya mfunu mingi kele nde, na nima ya kutanga bandogisila yina Polo sonikaka, na bangonda yina landaka muntu yina salaka disumu balulaka ntima! Yandi sobaka bikalulu mpi mabanza na yandi mpi kumaka diaka kulemfuka na bansiku ya Yehowa. (2 Bak. 7:8-11) Inki Polo songaka dibundu na kusala?

MUTINDU DIBUNDU TADILAKA NSUMUKI YINA BALULAKA NTIMA

7. Kukatula mpangi na dibundu nataka nki mambote? (2 Bakorinto 2:5-8)

⁷ Tanga 2 Bakorinto 2:5-8. Polo bakisaka nde “ndola [yina] bantu mingi pesaka muntu yina fwanaka.” Yo ke tendula nde ndola yina bo pesaka mpangi yina natilaka yandi mambote mingi. Inki mambote? Yo sadisaka yandi na kubalula ntima.​—Baeb. 12:11.

8. Inki Polo zabisaka diaka bampangi na kusala?

⁸ Yo yina Polo songaka bampangi nde: Beno ‘lolula mpangi yina salaka kifu na ntima ya mvimba mpi beno lembika yandi,’ mpi beno songa “yandi nde beno ke zolaka yandi.” Simba nde Polo ke lomba ve bampangi na kundima kaka nde mpangi kuvutuka na dibundu, kansi bangogo na bo, mutindu na bo ya kutadila yandi mpi mambu ya bo ke sadila yandi kumonisa yandi nde bo me lolula yandi mpi ke zolaka yandi. Mpidina, mpangi yina ta bakisa pwelele nde bampangi kele na kiese mutindu yandi me vutuka na dibundu.

9. Mbala ya nkaka sambu na nki bampangi ya nkaka sepelaka ve na kulolula mpangi yina balulaka ntima?

⁹ Keti bampangi ya nkaka sepelaka ve mutindu mpangi yina balulaka ntima vutukaka na dibundu? Biblia me tubila yo ve, kansi yo lenda salama. Mambu yina mpangi yai salaka, basisaka mavwanga na dibundu mpi mbala ya nkaka yo pesaka bampangi ya nkaka nsoni. Yo ke monana nde bampangi ya nkaka monaka mbi mutindu bo vutulaka mpangi yai na dibundu sambu bo vandaka kusala ngolo na kubikala bunkete. (Tala mpi Luka 15:28-30.) Ebuna, sambu na nki yo lombaka nde dibundu kuzola kibeni mpangi yai ya balulaka ntima?

10-11. Inki lenda salama kana bankuluntu kubuya kulolula mpangi yina salaka mbi kansi me balula ntima?

¹⁰ Yindula mambu yina lenda salama kana bankuluntu kubuya kuvutula muntu yina me balula mpenza ntima na dibundu to bampangi kubuya kumonisila yandi zola. Yandi lenda wa “mawa ya mingi kibeni.” Yandi lenda yindula nde yandi lenda sadila diaka ve Yehowa. Nkutu, yandi lenda lemba mpi kusala diaka ve bikesa sambu na kuvutukila kinduku na yandi ti Nzambi.

¹¹ Diambu ya kuluta mbi kele nde kana bampangi me buya kulolula muntu yina me balula ntima, bo lenda bebisa kinduku na bo ti Yehowa. Sambu na nki? Sambu bo ta landa ve mbandu ya Yehowa ya kulolula muntu ya me sala disumu mpi me balula ntima, kansi bo ta landa mbandu ya nku ya Satana yina ke lolulaka ve. Ebuna, Diabulu ta sadila bo sambu na kubesisa kimpeve ya mpangi yina.​—2 Bak. 2:10, 11; Baef. 4:27.

12. Inki mutindu dibundu lenda landa mbandu ya Yehowa?

¹² Inki mutindu bampangi ya Korinto lendaka kulanda mbandu ya Yehowa kansi ve ya Satana? Kana bo tadila bantu yina ke sala masumu mpi ke balula ntima mutindu Yehowa ke tadila bo. Tala mambu yina bantu ya nkaka ya sonikaka Biblia ke tuba sambu na Yehowa. Davidi sonikaka nde Yehowa “kele mbote mpi ya kuyilama na kulolula.” (Nk. 86:5) Mika sonikaka nde: “Nani kele Nzambi bonso nge, yina ke lolulaka kifu mpi mbi?” (Mika 7:18) Yezaya tubaka nde: “Bika nde muntu ya nku kuyambula nzila na yandi mpi muntu ya mbi kuyambula bangindu na yandi; bika nde yandi vutuka na Yehowa, yina ta wila yandi mawa, na Nzambi na beto, sambu yandi ta lolula na luzolo yonso.”​—Yez. 55:7.

13. Sambu na nki yo fwanaka na kuvutula mpangi yina salaka disumu mpi balulaka ntima na dibundu? (Tala lupangu “Inki Ntangu Bo Vutulaka na Dibundu Muntu ya Korinto Yina Salaka Disumu?”)

¹³ Sambu na kulanda mbandu ya Yehowa, yo lombaka nde bampangi ya Korinto kusepela ti muntu yina balulaka ntima mpi kumonisila yandi zola. Kana bampangi kuyamba mpangi yina salaka disumu yina balulaka ntima mutindu Polo songaka bo, bo ta monisa “bulemfu na mambu yonso.” (2 Bak. 2:9) Ya kieleka, bangonda fioti mpamba lutaka banda bo katulaka mpangi yango na dibundu, kansi ndola yina pusaka yandi na kubalula ntima. Yo yina, yo vandaka ve mfunu nde bankuluntu kuvingila ntangu ya nda sambu na kuvutula yandi na dibundu.

LANDA MBANDU YA KULOLULA MPI YA LUNUNGU YA YEHOWA

14-15. Mutindu bo yidikaka mambu yina salamaka na dibundu ya Korinto ya ntama ke longa beto nki? (2 Piere 3:9) (Tala mpi kifwanisu.)

¹⁴ Bo me sonikaka na Biblia mutindu bo yidikaka mambu yina salamaka na dibundu ya Korinto ya ntama “sambu na kulonga beto.” (Bar. 15:4) Disolo yai ke sadisa beto na kubakisa nde, Yehowa ke ndimaka ve masumu ya nene na dibundu na yandi. Diaka, yandi ke ndimaka ve nde bo wila muntu yina me balula ve ntima “mawa” mpi yandi ke zolaka ve nde muntu yango kulanda kuvukana ti bansadi na yandi. Ata Yehowa ke wilaka bantu mawa, yandi ke ndimaka ve nde bantu kuditwadisa na konso mutindu ya bo me zola mpi yandi ke sobaka ve minsiku na yandi. (Yude 4) Kuwila bantu yonso mawa ata bo ke balula ve ntima kele mbote ve, sambu yo ta vanda kingosa sambu na bampangi yonso na dibundu.​—Bing. 13:20; 1 Bak. 15:33.

¹⁵ Ata mpidina, beto ke zaba nde Yehowa ke zolaka ve nde ata muntu mosi kufwa. Yandi ke salaka yonso sambu na kugulusa bantu. Yandi ke wilaka bantu yina ke balula ntima mawa, bayina ke zola kukuma diaka banduku na yandi. (Ezek. 33:11; tanga 2 Piere 3:9.) Yo yina, ntangu mpangi yina ya Korinto balulaka ntima mpi yambulaka mambi, Yehowa sadilaka Polo na kutendudila dibundu nde bo fwete lolula muntu yina mpi kuvutula yandi na dibundu.

16. Inki mutindu nge ke kudiwa ntangu nge ke yindula mutindu bo yidikaka mambu yina basikaka na dibundu ya Korinto?

¹⁶ Kulonguka mutindu bo yidikaka mambu yina basikaka na dibundu ya Korinto me sadisa beto na kubakisa nde Yehowa kele Nzambi ya zola, ya lunungu mpi ya mbote. (Nk. 33:5) Keti yo ke pusa nge ve na kupesa diaka Nzambi lukumu mingi? Beto yonso kele bantu ya masumu, konso muntu na kati na beto kele ti mfunu nde Yehowa kulolula yandi. Beto yonso fwete pesa Yehowa mersi sambu na kimenga ya Mwana na yandi yina yandi me pesaka sambu na kulolula masumu na beto. Kuzaba nde Yehowa ke zolaka mingi bansadi na yandi mpi ke zolaka nde beto vanda ti luzingu ya mbote, ke pesaka beto kiese mingi!

17. Inki beto ta longuka na masolo yina ke landa?

¹⁷ Inki dibundu ke salaka kana mpangi me sala disumu ya nene bubu yai? Inki mutindu bankuluntu lenda monisa nde bo ke landa mbandu ya Yehowa ya kuvanda ti nzala ya ngolo ya kusadisa mpangi yina me sala disumu na kubalula ntima? Inki kikalulu bampangi fwete monisa ntangu bankuluntu me baka lukanu ya kukatula to ya kuvutula muntu na dibundu? Masolo yina ke landa ta pesa bamvutu na bangiufula yai.