Mutindu Nge Lenda Vanda na Ngemba Ata Bitumba mpi Mubulu Ke Salama
Gary vandaka soda. Yandi ke tuba nde: “Na ntwala nde mono longuka Biblia, mono vandaka kuzaba ve ata fioti sambu na nki nku, kukonda lunungu mpi mavwanga ke vandaka mingi na ntoto. Kansi sesepi, mono me kumaka ti ngemba ya mabanza. Mono me zaba nde Yehowa Nzambi ta kumisa ntoto kisika mosi ya bantu ta zingaka na lutaninu.”
Gary mpamba ve muntu ke kudiwaka mutindu yina. Tala mutindu Biblia me sadisaka bantu ya nkaka.
BIBLIA KE TUBA NDE: “O Yehowa, nge kele mbote mpi ya kuyilama na kulolula.”—Nkunga 86:5.
VERSE YAI KE KITISA NTIMA: Wilmar yina ke zingaka na Colombie ke tuba nde: “Verse yai ke ndimisaka mono nde Yehowa kele Nzambi ya mawa. Mono me zaba nde, yandi ke zolaka kulolula mono mambu yonso ya mono me salaka ntama ntangu mono pesaka maboko na bitumba.”
BIBLIA KE TUBA NDE: “Mono ke ganga zulu ya mpa mpi ntoto ya mpa; mpi mambu ya ntama ta kwisa ve na mabanza, yo ta kwisa mpi ve na ntima.”—Yezaya 65:17.
VERSE YAI KE KITISA NTIMA: Zafirah yina ke zingaka na États-Unis ke tuba nde: “Mono ke belaka maladi ya ntu mpi mono me kumaka kudiyangisa mingi sambu na mambu ya mono kutanaka ti yo ntangu mono vandaka soda. Kansi verse yai yibusaka mono nde kubika fioti, Yehowa ta sala nde mono vila mambu yonso yina ya mbi ya mono kele ti yo na mabanza. Yo ta vanda diaka ve na ntu na mono mpi na ntima na mono. Yai kele dikabu mosi ya mbote kibeni.”
BIBLIA KE TUBA NDE: “Na bilumbu na yandi muntu ya lunungu ta yela bonso matiti ya mpa, mpi ngemba ta kuma mingi tii kuna ngonda ta vanda diaka ve.”—Nkunga 72:7.
VERSE YAI KE KITISA NTIMA: Oleksandra yina ke zingaka na Ukraine ke tuba nde: “Mono ke yindulaka bangogo yina mbala na mbala. Kubika fioti, bitumba mpi mambu yonso ya mbi yina yo ke nataka ta vanda diaka ve, mpi beto ta wa diaka ve ata fioti boma nde bantu yina beto ke zolaka kele na kigonsa.”
BIBLIA KE TUBA NDE: “Bafwa na nge ta zinga. . . . Beno telama mpi beno tula milolo ya kiese, beno bantu ya ke zinga na mfututu!”—Yezaya 26:19.
VERSE YAI KE KITISA NTIMA: Marie yina ke zingaka na Rwanda ke tuba nde: “Kiteso ya bantu yonso ya dibuta na beto fwaka ntangu bantu ya dikanda ya nkaka sosaka kufwa bantu yonso yina vandaka Batutsi. Kansi verse yai ke ndimisa mono nde, mono ta mona bo diaka. Mono ke vingila kuwa bandinga na bo ya kiese ntangu bo ta futumuka!”
BIBLIA KE TUBA NDE: “Kubika kaka fioti, mpi bantu ya mbi ta vanda diaka ve . . . Kansi bantu ya kudikulumusa ta baka ntoto, mpi bo ta wa kiese mingi kibeni na ngemba ya mingi.”—Nkunga 37:10, 11.
VERSE YAI KE KITISA NTIMA: Daler yina ke zingaka na Tadjikistan ke tuba nde: “Ata bitumba me manaka, mambu ya mbi mpi bantu ya mbi kele kaka. Baverse yai me sadisaka mono mingi. Yehowa ke monaka mambu yonso mpi yandi ke bakisa mambu na mono. Yandi ke tuba nde kubika fioti, bampasi yonso ta mana mpi bantu ta vila yo.”
Bantu ya bo me tubila na zulunalu yai kele na kati ya bamilio ya Bambangi ya Yehowa yina Biblia me sadisaka na kuzwa ngemba. Bo me longukaka mutindu ya kununga kikalulu ya kukonda kuzola bantu ya mpusu ya nkaka ya nitu, ya insi ya nkaka, ya dikanda ya nkaka mpi kikalulu ya kukonda kuzola bantu ya nkaka. (Baefezo 4:31, 32) Bambangi ya Yehowa ke kotaka ve na mambu ya politiki mpi bo ke pesaka ve maboko na mambu ya mubulu.—Yoane 18:36.
Na nsi-ntoto ya mvimba, Bambangi ya Yehowa ke zolanaka mpi bonso bantu ya dibuta mosi. (Yoane 13:35) Mu mbandu yo lombaka nde Oleksandra yina beto tubilaka na luyantiku, kutina ti mpangi na yandi ya nkento na insi ya nkaka sambu na bitumba. Yandi ke tuba nde: “Ntangu beto kotaka na insi, mbala mosi beto monaka Bambangi ya Yehowa ya insi yina, bo vandaka kuvingila beto sambu na kuyamba beto. Bo sadisaka beto na kuyikama kuzinga na insi ya nkaka sambu beto tinaka insi na beto.”
Beto Bambangi ya Yehowa, beto ke bingisa nge na kiese yonso na kukwisa kuvukana ti beto na balukutakanu na beto. Kuna nge ta zaba mambu mingi na yina me tala mutindu ya kuzwa ngemba mpi mambu yina Biblia ke tubaka sambu na ngemba yina ta kota na ntoto na bilumbu ke kwisa. Kota na jw.org sambu na kuzwa kisika yina kele pene-pene ti kisika ya nge ke vandaka to lomba kulonguka Biblia ti Mbangi mosi ya Yehowa na nzila ya mukanda Zinga Mvula na Mvula!