Sambu na Nki Beto Fwete Vukanaka Sambu na Kusambila Nzambi?

1-3. (a) Inki mutindu Bakristu ke monisaka nde bo ke zolaka balukutakanu? (Tala kifwanisu ya luyantiku ya disolo.) (b) Inki beto ta tadila na disolo yai?

NTANGU Corinna vandaka ti bamvula 17, bo kangaka mama na yandi mpi bo nataka yandi na bwala mosi ya ntama sambu na kusala bilanga. Na nima, bo nataka mpi Corinna ntama ti bwala na yandi Sibérie. Bo kumaka kusadila yandi bonso mpika na ferme mosi. Bantangu ya nkaka bo vandaka kusadisa yandi bisalu na kingolo-ngolo, na madidi ya ngolo mpi na nganda, kukonda bilele ya madidi. Ata mpidina, Corinna ti mpangi-nkento ya nkaka bakaka lukanu ya kusala yonso sambu na kukwenda na lukutakanu.

² Corinna ke tuba nde, “Na nkokila mosi beto katukaka na ferme mpi beto tambulaka bakilometre 25 sambu na kukuma na kisika yina beto fwete baka train. Train katukaka na suka-suka, na 2 heures, mpi beto salaka bangunga sambanu tii kisika beto tulukaka. Na nima, beto tambulaka diaka bakilometre kumi sambu na kukuma na kisika ya lukutakanu.” Corinna vandaka na kiese ya kusala nzietelo yina. Yandi ke tuba nde: “Na lukutakanu, beto longukaka Nzozulu ya Nkengi mpi beto yimbaka bankunga ya kimfumu. Yo pesaka beto kikesa mpi kumisaka lukwikilu na beto ngolo.” Na nima ya bilumbu tatu, bo vutukaka na ferme. Kansi munkwa-ferme zabaka nkutu ve nde bo basikaka.

³ Bansadi ya Yehowa ke zolaka kuvukana ti bampangi na bo. Mu mbandu, Bakristu ya mvu-nkama ya ntete vandaka na kiese ya kuvukana sambu na kusambila Yehowa mpi kulonguka mambu na yandi. (Bisalu 2:42) Ntembe kele ve nde nge ke vandaka mpi na kiese ya kukwenda na balukutakanu. Kansi bonso bampangi ya nkaka, nge lenda mona mpi nde yo kele mpasi na kukwenda na balukutakanu mbala na mbala. Ziku kisalu na nge ke bakaka nge ntangu mingi, to nge ke vandaka ti mambu mingi ya kusala, to mpi nge ke wa-waka kulemba. Kansi nki ta sadisa beto na kusala bikesa sambu na kukwendaka na balukutakanu?^[1] (Tala noti na nsuka ya disolo.) Inki mutindu beto lenda sadisa balongoki ya Biblia mpi bampangi ya nkaka na kukwendaka na balukutakanu? Disolo yai ta tendula nde balukutakanu kele mfunu (1) sambu na beto mosi, (2) sambu na kusadisa bampangi ya nkaka, mpi (3) sambu na kusepedisa Yehowa.^[2]​—Tala noti na nsuka ya disolo.

BALUKUTAKANU KELE MFUNU MINGI

4. Inki mutindu balukutakanu ke sadisaka beto na kulonguka mambu ya Yehowa?

⁴ Balukutakanu ke longaka beto mambu mingi. Balukutakanu yonso ke sadisaka beto na kulonguka mambu mingi ya Yehowa. Mu mbandu, mabundu mingi me katuka kulonguka mukanda, Kwenda Pene-Pene na Yehowa, na Kulonguka ya Biblia ya Dibundu. Inki mutindu nge kudiwaka ntangu beto tadilaka bikalulu ya Yehowa mpi ntangu bampangi vandaka kutubila zola na bo sambu na Yehowa? Ntembe kele ve nde yo pusaka nge na kuzola diaka Yehowa mingi. Kulanda badiskure ti bansonga na dikebi yonso, mpi kuwidikila mbote lutangu ya Biblia na balukutakanu ke sadisaka beto na kuzaba mambu mingi ya Biblia. (Nehemia 8:8) Yindula mambu mingi ya beto ke zabaka konso mposo ntangu beto ke yidikaka lutangu ya Biblia mpi ke waka bampangi ke tuba malongi yina bo bakaka.

5. Inki mutindu balukutakanu me sadisaka nge na kusadila malongi ya Biblia mpi kutomisa mutindu na nge ya kusamuna?

⁵ Balukutakanu ke longaka beto mutindu ya kusadila malongi ya Biblia na luzingu na beto. (1 Batesalonika 4:9, 10) Mu mbandu, keti nge ke yibuka Kulonguka ya Nzozulu ya Nkengi mosi, yina pesaka nge nzala ya kusadila Yehowa mingi, kutomisa bisambu na nge, to kulolula bampangi? Balukutakanu yina beto ke salaka na kati-kati ya mposo lenda sadisa nge na kuzaba mutindu ya kulonga nsangu ya mbote sambu na kusadisa bantu na kuzaba kieleka ya Biblia.—Matayo 28:19, 20.

6. Inki mambu ke pesaka beto kikesa mpi ngolo na balukutakanu?

⁶ Balukutakanu ke pesaka beto kikesa. Nsi-ntoto ya Satana ke sosaka kubebisa lukwikilu na beto, kupusa beto na kudiyangisa, mpi kulembisa beto. Kansi balukutakanu ke pesaka beto kikesa mpi ngolo ya kulanda kusadila Yehowa. (Tanga Bisalu 15:30-32.) Mbala mingi beto ke longukaka mutindu bambikudulu ya Biblia me lunganaka. Yo ke sadisaka beto na kundima mpenza nde balusilu ya nkaka ya Yehowa ta lungana. Bampangi na beto ke pesaka beto kikesa ntangu bo ke salaka masolo, ke pesaka bakomantere, mpi ntangu bo ke yimbaka na ntima ya mvimba sambu na kukumisa Yehowa. (1 Bakorinto 14:26) Sambu bo kele banduku ya kieleka yina ke tudilaka beto dikebi, bo ke pesaka beto mpi kikesa ntangu beto ke solulaka ti bo na ntwala mpi na nima ya balukutakanu.—1 Bakorinto 16:17, 18.

7. Sambu na nki kukwenda na balukutakanu kele mfunu mingi?

⁷ Na balukutakanu, mpeve santu ya Nzambi ke sadisaka beto. Yezu ke twadisaka dibundu na nsadisa ya mpeve santu. Yo yina yandi tubaka nde beto fwete wa “mambu yina mpeve ke tuba na mabundu.” (Kusonga 2:7) Mpeve santu lenda sadisa beto na kununga mpukumuna mpi kusamuna na kikesa. Yo lenda sadisa beto mpi na kubaka balukanu ya mbote. Yo yina beto fwete sala bikesa sambu na kukwendaka na balukutakanu; mpidina mpeve santu ya Nzambi ta sadisa beto.

BETO KE SADISAKA BAMPANGI NA BALUKUTAKANU

8. Inki mutindu beto ke sadisaka bampangi ntangu bo ke monaka beto na balukutakanu, ke waka beto ke pesa bakomantere mpi ke yimba? (Tala mpi lupangu, “Yandi Ke Kudiwaka Mbote na Nima ya Lukutakanu.”)

⁸ Balukutakanu ke sadisaka beto na kumonisila bampangi zola. Bampangi mingi na mabundu ke nwana ti bampasi ya ngolo. Ntumwa Polo sonikaka nde: “Beto kudibanza sambu na bankaka.” (Baebreo 10:24, 25; noti na nsi ya lutiti) Beto lenda monisa nde beto ke kudibanzaka sambu na bampangi kana beto ke kwenda na balukutakanu sambu na kupesana kikesa. Ntangu beto ke kwendaka na balukutakanu, beto ke monisaka bampangi nde beto ke zolaka kuvanda ti bo, kusolula ti bo, mpi beto ke tudilaka bo dikebi. Beto ke pesaka bo mpi kikesa ntangu beto ke pesaka bakomantere mpi ke yimbaka na ntima ya mvimba.—Bakolosai 3:16.

9, 10. (a) Tendula mutindu bangogo ya Yezu, na Yoane 10:16, ke sadisaka beto na kubakisa mfunu ya kuvukanaka ti bampangi? (b) Kana beto ke kwenda mbala na mbala na balukutakanu, nki mutindu beto lenda sadisa bampangi yina mabuta na bo ya kinsuni me buyaka bo?

⁹ Ntangu beto ke kwendaka na balukutakanu, beto ke sadisaka dibundu na kuvanda na bumosi. (Tanga Yoane 10:16.) Yezu tubaka nde yandi kele bonso ngungudi mpi balongoki na yandi kele bonso mameme. Yindula fioti: Kana mameme zole kele na ngumba, zole ya nkaka kele na mwa dibengi, mpi mosi kele na kisika ya nkaka, keti beto lenda tuba nde mameme yonso tanu kele na kimvuka? Ve, sambu mameme ya kele na kimvuka ke vandaka kisika mosi mpi ke landaka ngungudi na bo. Mutindu mosi, beto fwete kwendaka na balukutakanu sambu na kuvanda ve ntama ti bampangi. Beto fwete vukanaka sambu na kuvanda “kimvuka mosi” mpi kulanda “ngungudi mosi.”

¹⁰ Balukutakanu ke sadisaka beto na kuzola mingi bampangi ya dibuta na beto ya nsi-ntoto ya mvimba. (Nkunga 133:1) Bampangi ya nkaka na dibundu, mabuta na bo ya kinsuni me buyaka bo. Kansi Yezu silaka nde yandi ta pesa bo dibuta yina ta zolaka bo mpi ta tudilaka bo dikebi. (Marko 10:29, 30) Kana nge ke kwenda mbala na mbala na balukutakanu, nge lenda kuma bonso tata, mama, to mpangi na bo. Kuyindula mambu yai ke sadisaka beto na kukwendaka na balukutakanu yonso.

BETO TA PESA YEHOWA KIESE

11. Inki mutindu balukutakanu ke sadisaka beto na kupesa Yehowa yina beto fwete pesa yandi?

¹¹ Na balukutakanu, beto ke pesaka Yehowa yina beto fwete pesa yandi. Sambu yandi kele Ngangi na beto, beto fwete tonda yandi, kupesa yandi lukumu mpi nkembo. (Tanga Kusonga 7:12.) Beto ke salaka yo na balukutakanu ntangu beto ke sambaka Yehowa, ke yimbilaka yandi, mpi ke tubaka mambu na yandi. Kusambila Yehowa konso mposo kele kima mosi ya mbote kibeni!

12. Yehowa ke kudiwaka nki mutindu kana beto ke kwenda na balukutakanu mutindu yandi me tubaka?

¹² Beto fwete lemfukila Yehowa sambu yandi muntu gangaka beto. Yandi me lombaka beto na kukwendaka na balukutakanu, mingi-mingi na ntangu yai ya nsuka me finama. Yo yina, ntangu beto ke kwendaka na balukutakanu, Yehowa ke waka kiese. (1 Yoane 3:22) Yandi ke monaka nde beto ke vandaka mpenza ti luzolo ya kukwenda na balukutakanu mpi yandi ke bakaka na mbalu bikesa yina beto ke salaka sambu na kukwenda na balukutakanu.—Baebreo 6:10.

13, 14. Inki mutindu balukutakanu ke sadisaka beto na kuvanda na kuwakana ya mbote ti Yehowa mpi ti Yezu?

¹³ Ntangu beto ke kwendaka na balukutakanu, beto ke monisaka Yehowa nde beto ke zolaka kuvanda pene-pene na yandi mpi Mwana na yandi. Na balukutakanu, beto ke longukaka Biblia, mpi Yehowa ke longaka beto mambu yina beto fwete sala mpi mutindu beto fwete zinga. (Yezaya 30:20, 21) Ntangu bantu yina kele ve Bambangi ya Yehowa ke kwisaka na balukutakanu, bo ke monaka nde Nzambi ke twadisaka beto. (1 Bakorinto 14:23-25) Yehowa ke twadisaka balukutakanu na beto na nzila ya mpeve santu, mpi yandi muntu ke longaka beto. Ya kieleka, balukutakanu ke sadisaka beto na kuwa malongi ya Yehowa, kubakisa nde yandi ke zolaka beto, mpi kukumisa bangwisana na beto ti yandi ngolo.

¹⁴ Yezu, Mfumu ya dibundu, tubaka nde: “Kisika bantu zole to tatu me vukana na zina na mono, mono kele pana na kati na bo.” (Matayo 18:20) Biblia ke tuba mpi nde, Yezu ‘ke tambulaka na kati’ ya mabundu. (Kusonga 1:20–2:1) Ya kieleka, Yehowa mpi Yezu ke vandaka na kati na beto mpi ke pesaka beto kikesa na balukutakanu. Yehowa ke kudiwaka nki mutindu ntangu yandi ke monaka bikesa ya nge ke sala sambu na kuvanda ti kuwakana ya mbote ti yandi mpi ti Mwana na yandi?

15. Inki mutindu kukwenda na balukutakanu ke sadisaka beto na kumonisa Nzambi nde beto ke zolaka kulemfukila yandi?

¹⁵ Ntangu beto ke kwendaka na balukutakanu, beto ke monisaka Yehowa nde beto ke zolaka kulemfukila yandi. Yehowa ke pusaka beto ve na kulemfukila yandi na kingolo-ngolo. (Yezaya 43:23) Yo yina, ntangu beto ke lemfukaka na ntuma na yandi ya kukwenda na balukutakanu, beto ke monisaka nde beto ke zolaka yandi mpi beto ke ndimaka nde yandi muntu fwete twadisa beto. (Baroma 6:17) Mu mbandu, nki beto ta sala kana mfumu ya kisalu ke zola nde beto sala bisalu yina ta kanga beto nzila ya kukwenda na balukutakanu mbala na mbala? Bamfumu ya luyalu lenda tuba nde, kana bantu kuvukana sambu na kusambila Yehowa, bo ta futa amande, bo ta kota boloko, to bo ta baka ndola ya ngolo. Bantangu ya nkaka beto lenda sosa kusala kima mosi kaka na ntangu yina beto fwete kwenda na balukutakanu. Na mambu yai yonso, beto fwete baka lukanu beto mosi. (Bisalu 5:29) Kansi konso ntangu ya beto ke bakaka lukanu ya kulemfukila Yehowa, beto ke pesaka yandi kiese.—Bingana 27:11.

BETO LANDA NA KUVUKANA TI BAMPANGI

16, 17. (a) Inki mutindu beto me zaba nde Bakristu ya ntete vandaka kubaka balukutakanu na mbalu? (b) Inki mutindu Mpangi George Gangas vandaka kutadila balukutakanu?

¹⁶ Na nima ya kuvukana na Pantekoti ya mvu 33, Bakristu vandaka kuvukana mbala na mbala sambu na kusambila Yehowa. Bo ‘landaka kudipesa na malongi ya bantumwa, mpi kuvukana.’ (Bisalu 2:42) Bo bikaka ve kuvukana ata ntangu bamfumu ya Roma ti bantwadisi ya dibundu ya Bayuda vandaka kuniokula bo. Ata yo vandaka mpasi, bo salaka yonso sambu na kulanda kuvukana.

¹⁷ Bubu yai mpi, bansadi ya Yehowa ke vandaka na ntonda mingi sambu na balukutakanu mpi bo ke kondaka yo ve. George Gangas vandaka mpangi ya Nto-Kimvuka bamvula kuluta 22; yandi tubaka nde: “Kuvukana ti bampangi ke pesaka mono kiese mingi mpi kikesa kibeni. Mono ke zolaka kuvanda na kati ya bantu ya ntete yina ke kumaka na Nzo ya Kimfumu mpi kukatuka muntu ya nsuka. Mono ke waka kiese mingi ntangu mono ke solulaka ti bantu ya Nzambi. Ntangu mono ke vandaka ti bo, mono ke kudimonaka na dibuta na mono mosi, na paladisu ya kimpeve.” Yandi yikaka nde: “Mpusa na mono ya kuluta ngolo ke vandaka ya kukwenda na balukutakanu.”

18. Inki mutindu nge ke tadilaka balukutakanu, mpi nki lukanu nge me baka?

¹⁸ Keti nge mpi ke tadilaka kusambila Yehowa mutindu yina? Kana mpidina, sala yonso sambu na kuvukanaka ti bampangi na nge na balukutakanu, ata yo lenda vanda mpasi bantangu ya nkaka. Monisa Yehowa nde nge ke kudiwaka kibeni bonso Ntotila Davidi, yina tubaka nde: “Mono ke zolaka nzo yina nge ke zingaka.”—Nkunga 26:8.