Bangiufula Ya Batangi

“Ndinga ya Nzambi,” yina Baebreo 4:12 ke tuba nde yo kele ya “moyo mpi ngolo,” ke tendula nki?

Baverse yina kele na ntwala mpi na nima ya Baebreo 4:12 ke sadisa beto na kubakisa nde Polo vandaka kutubila nsangu ya Nzambi ya me tala lukanu na yandi, yina kele na Biblia.

Mbala mingi beto ke sadilaka Baebreo 4:12 na mikanda na beto sambu na kumonisa nde Biblia kele ti ngolo ya kusoba luzingu ya bantu; kusadila verse yai mutindu yina kele kieleka. Kansi yo kele mfunu na kubakisa mambu yina Polo vandaka kutubila ntangu yandi sonikaka bangogo yina kele na Baebreo 4:12. Yandi vandaka kusiamisa Bakristu ya Ebreo na kusala mambu ya ke wakana ti balukanu ya Nzambi. Mingi ya balukanu yai vandaka na kati ya masonama ya santu. Polo sadilaka mbandu ya bantu ya Izraele yina Nzambi basisaka na Ezipte. Bo vandaka ti kivuvu ya kukota na ntoto ya lusilu yina vandaka ti ‘miliki mpi bwiki mingi,’ kisika bo ta pema kibeni.—Kubasika 3:8; Kulonga 12:9, 10.

Yo vandaka lukanu ya Nzambi. Kansi bantu ya Izraele lemfukilaka ve Yehowa mpi bo monisaka ve lukwikilu, yo yina bantu mingi na kati na bo kotaka ve na kupema yina. (Kutanga 14:30; Yozue 14:6-10) Kansi Polo yikaka nde, ‘lusilu ya kukota na kupema ya Nzambi vandaka kaka.’ (Baebreo 3:16-19; 4:1) Yo kele pwelele nde “lusilu” yina kele na kati ya mambu yina Nzambi me monisaka ya me tala lukanu na yandi. Bonso Bakristu ya Ebreo, beto mpi lenda tanga mambu ya me tala lukanu yai mpi kusala mambu ya ke wakana ti yo. Sambu na kumonisa nde lusilu yai kele na Masonuku, Polo tubilaka mambu yina kele na Kuyantika 2:2 mpi Nkunga 95:11.

Beto kele na kiese ya kuzaba nde, “lusilu ya kukota na kupema [ya Nzambi] kele kaka.” Beto ke ndimaka nde mambu yina Biblia ke longaka na yina me tala kupema ya Nzambi kele ya kieleka; yo yina beto ke salaka bikesa sambu na kukota na kupema yango. Yo ke tendula ve nde beto ke landaka Nsiku ya Moize to ke salaka mambu ya mbote kaka sambu Yehowa kundima beto. Kansi sambu beto ke kwikilaka na Nzambi, beto ke vandaka na kiese ya kusala ntangu yonso mambu ya ke wakana ti lukanu na yandi. Bantu mingi na ntoto ya mvimba ke longukaka mpi Biblia sambu na kuzaba mambu yina Nzambi me monisaka ya me tala lukanu na yandi. Yo me pusaka bantu mingi na kati na bo na kusoba bikalulu, kumonisa lukwikilu mpi kubaka mbotika. Bansoba yai ke monisa pwelele nde “ndinga ya Nzambi kele ya moyo mpi ngolo.” Mambu yina Nzambi me monisaka na Biblia na yina me tala lukanu na yandi me sobaka luzingu na beto mpi yo ta landa kumonisa ngolo na yo na luzingu na beto.