Satana Kele Nki Mutindu?

Mvutu ya Biblia

Diabulu kele na nitu ya kimpeve. Yo ke tendula nde yandi kele ti nitu yina beto lenda mona ve.—Baefezo 6:11,12.

Bantu mingi ke yindulaka nde Diabulu kele bonso nkombo, yandi kele ti bibongo mpi mukila mpi yandi me simba nsomo mosi ya nda. Bo ke yindulaka nde bantu ya ke salaka bifwanisu salaka kifwanisu ya Diabulu banda bamvula kuluta mile me luta. Ziku bantu yango landaka bangindu ya mbi mpi masolo ya luvunu ya ntangu ya ntama.

Biblia ke tubaka nde Diabulu kele nki mutindu?

Biblia ke sadilaka bambandu mingi sambu na kumonisa mutindu Diabulu kele. Yo ke sadisaka beto na kubakisa bikalulu na yandi ya mbi kansi ve mutindu nitu na yandi kele. Mu mbandu Biblia ke sadilaka mwa bambandu yai:

Wanzio ya Nsemo. Yandi ke monisaka bonso nde yandi ke pesaka bantu bima ya mbote sambu bo landa malongi na yandi kansi ve malongi ya Nzambi.—2 Bakorinto 11:14.
Ntambu ya ke ngana. Yandi ke nwanisaka bantu yina ke sambilaka Nzambi na makasi yonso.—1 Piere 5:8.
Dragoni mosi ya nene. Yandi ke pesaka boma, yandi ke ngolo mingi mpi yandi ke fwaka bantu.—Kusonga 12:9.

Baverse ya Biblia ya ke tendulaka mutindu Diabulu kele

2 Bakorinto 11:14: “Satana yandi mosi ke landaka kudikitula bonso wanzio ya nsemo.”

Ntendula ya verse yai: Satana ke monisaka bonso nde yandi ke vandaka ti bikalulu ya mbote sambu na kupusa bantu na kulanda malongi na yandi kansi ve malongi ya Nzambi.
Baefezo 6:11: “Beno lwata binwaninu yonso yina Nzambi ke pesaka sambu beno kuka kutelama ngolo na ntwala ya mayele ya mbi ya Diabulu.”

Ntendula ya verse yai: Satana ke sadilaka mayele ya mbi sambu na kupusa bantu na kubuya kulemfukila Nzambi.
Yakobo 4:7: “Beno lemfukila Nzambi; kansi beno vanda bambeni ya Diabulu, ebuna yandi ta tina ntama ti beno.”

Ntendula ya verse yai: Sambu muntu kubwa ve na mitambu ya Satana yandi fwete lemfukila Nzambi na kisika ya kulemfukila Satana.
1 Piere 5:8: “Mbeni na beno, Diabulu, ke kwendaka kuzieta bonso ntambu ya ke ngana, yandi ke sosa kudia muntu”

Ntendula ya verse yai: Satana ke mengaka bantu yina ke lemfukilaka Nzambi mpi yandi ke zolaka kufwa kinduku na bo ti Nzambi.