Basoda ya Russie Me Kota na Ukraine Sambu na Kunwanisa Yo

Na Kiya 24 Février 2022 na suka-suka, basoda ya insi Russie yantikaka kukota na kingolo-ngolo na insi Ukraine sambu na kunwanisa insi yai, ata bantwadisi mingi ya nsi-ntoto salaka bikesa sambu bitumba kusalama ve. Inki mutindu bitumba yai lenda vanda ti bupusi na nsi-ntoto ya mvimba? Sekretere ya nene ya Nations unies, António Guterres tubaka na bunkufi mambu yai mwa bilumbu me luta nde: “Beto lenda yindula ve ata fioti bampasi yina bitumba yai ta nata ti bima yina ta beba, mpi mutindu mavwanga yai ta sala nde bansi ya Eropa mpi ntoto ya mvimba kuvanda diaka ve na lutaninu.”

Mambu ya mutindu yai ke tendula nki kana beto tala mambu yina Biblia tubaka?

• Yezu tubaka dezia nde na ntangu mosi buna, “insi mosi ta nwanisa insi ya nkaka mpi kimfumu mosi ta nwanisa kimfumu ya nkaka.” (Matayo 24:7) Tanga disolo ya kele ti ntu-diambu “Inki Kele Kidimbu ya ‘Bilumbu ya Nsuka,’ to ‘Ntangu ya Nsuka’?” sambu na kuzaba mutindu Biblia ke monisa nde bitumba ya ke salama bubu ke lungisa mambu yina Yezu tubaka dezia na ntwala.

• Sambu na kumonisa bitumba, mukanda ya Kusonga ke tubila muntu ya ke tambusa mpunda yina me vanda na zulu ya mpunda ya “mbwaki” mpi yandi ke “katula ngemba na ntoto.” (Kusonga 6:4) Tanga disolo ya kele ti ntu-diambu “Bantu Iya ya Ke Tambusa Bampunda Iya—Bo Kele Banani?” sambu na kuzaba mutindu mambu yai ya Biblia tubaka dezia na ntwala ke tubila bitumba ya ke salama bubu yai.

• Mukanda ya Daniele tubilaka kimbeni na kati ya “ntotila ya nordi” ti “ntotila ya sudi.” (Daniele 11:25-45) Tala video ya kele ti ntu-diambu “Kulungana ya Mbikudulu—Daniele Kapu 11” sambu na kuzaba sambu na nki beto lenda tuba nde insi Russie mpi bansi yina ke wakana ti yo kele ntotila ya nordi.a

• Mukanda ya Kusonga ke tubila mpi “bitumba ya kilumbu ya nene ya Nzambi Nkwa-Ngolo Yonso.” (Kusonga 16:14, 16) Kansi bitumba yina mukanda yai ke tubila, kele ve bitumba na kati ya bansi bonso yai ya beto ke mona bubu yai. Tanga disolo “Bitumba ya Armagedoni kele Nki?” sambu na kuzaba mambu mingi na yina me tala mambu yina ta salama na bilumbu ke kwisa.

Sambu na nki nge lenda vanda ti kivuvu sambu na bilumbu ke kwisa?

• Biblia ke tuba nde Nzambi ta “sukisa bitumba na ntoto ya mvimba.” (Nkunga 46:9) Tanga disolo ya kele ti ntu-diambu “Kivuvu ya Kieleka Sambu na Bilumbu ya Ke Kwisa” sambu na kuzaba mambu yina Nzambi ke tuba sambu na bilumbu ke kwisa.

• Yezu longaka balongoki na yandi na kusamba sambu Kimfumu ya Nzambi kukwisa. (Matayo 6:9, 10) Kimfumu yina kele luyalu mosi ya kele na zulu mpi yo ta lungisa lukanu ya Nzambi sambu na ntoto, yo vanda lukanu yina Nzambi kele ti yo ya kutula ngemba na nsi-ntoto. Sambu na kuzaba inki mutindu Kimfumu yango ta natila nge mambote, tala vídeo ya kele ti ntu-diambu “Kimfumu ya Nzambi Kele Inki?”

Bambangi ya Yehowa kuluta 129 000 ke zingaka na insi Ukraine. Bonso Bambangi ya Yehowa ya ke zingaka na bansi ya nkaka, bampangi yai ke landaka mbandu ya Yezu sambu bo ke kotaka ve na mambu ya politiki mpi bo ke buyaka kunwana bitumba. (Yoane 18:36) Na ntoto ya mvimba, Bambangi ya Yehowa ke landa kulonga ‘nsangu ya mbote ya Kimfumu’ mpi kumonisa nde yo kele Kimfumu yina ta manisa bampasi ya bantu, yo vanda bitumba. (Matayo 24:14) Beto ke lomba nge na kubinga beto to kusonikila beto sambu nge zaba mambu mingi na yina me tala nsangu ya ke pesa kivuvu yina kele na Biblia.