Bantangu ya Ngolo na Ntoto ya Mvimba na Nsungi ya Mvula na 2023—Inki Biblia Ke Tuba?

Na ntoto ya mvimba, bantangu me kuma ngolo kuluta na ntwala mpi bantu ke niokwama sambu na yo. Diaka bisumbula ya nkaka ya lugangu ke salama sambu na bantangu yai ya ngolo. Tala mambu barapore yai ke tuba:

• Biro mosi (Agence américaine d’observation océanique et atmosphérique [NOAA], États-Unis, département du Commerce) tubaka na Kiya 13 juillet 203 nde: “Juin yai me vanda ngonda mosi ya ntangu ya ngolo kuluta, na mutindu yina yo me salamaka ntete ve banda bantu ke waka ntangu na ntoto ya mvimba, yai bamvula 174 me luta.”

• Kimvuka mosi (L’Agence spatiale européenne) tubaka na Kiya 13 juillet 2023 nde: “Na bansi Italie, Espagne, France, Allemagne mpi Pologne ntangu kele ngolo kibeni mpi tiya ya yo ke basisa lenda kuma tii na 48°C [118°F] na bisanga ya Sicile mpi ya Sardaigne. Yai lenda vanda bantangu ya kuluta ngolo yina bantu me waka ntete ve na Eropa.”

• Stefan Uhlenbrook (directeur de l’hydrologie, de l’eau et de la cryosphère à l’Organisation météorologique mondiale) tubaka na Kintete 17 juillet 2023 nde: “Mutindu ntoto ke kuma tiya mingi, beto ke vingila nde bamvula kubanda kunoka ngolo mpi mbala mingi, yo ta sala nde banzo kubanda kudinda mingi na masa.”

Keti mutindu tiya ke kuma ngolo ke bangisa nge? Tala mambu yina Biblia ke tuba sambu na diambu yai ya mfunu.

Keti bantangu ya ngolo ke lungisa mambu yina Biblia me tubaka?

Ee. Tiya ya bantu ke wa na ntoto ya mvimba mpi bamvula, bantangu mpi mipepe ya ke niokula bantu ke wakana kibeni ti ntendula ya mambu yina Biblia tubaka nde yo ta salama na bilumbu na beto. Mu mbandu, Yezu tubaka na ntwala nde beto ta mona “mambu ya ke pesa boma.” (Luka 21:11) Bantangu yai ya ke kuma ngolo na ntoto ya mvimba me pusa bantu na kubanga nde, bantu ta sala mambu yina ta sala nde bantu kuzinga diaka ve na ntoto.

Keti ntoto ta kuma kisika yina bantu ta kuka diaka ve kuzinga?

Ve. Nzambi salaka ntoto sambu yo vanda kisika yina beto fwete zinga mvula na mvula; yandi ta bika ve nde bantu kufwa ntoto. (Nkunga 115:16; Longi 1:4) Yandi me tubaka nde yandi ta ‘bebisa bantu yina ke bebisaka ntoto.’—Kusonga 11:18.

Biblia ke monisa nde Nzambi lenda tanina ntoto sambu bisumbula ya lugangu kufwa yo ve mpi yandi ta tanina yo.

• “[Nzambi] ke lembika mupepe ya ngolo; ebuna bitembo ya nzadi-mungwa ke kuma pima.” (Nkunga 107:29) Nzambi kele ti ngolo ya kuyala bima yonso ya kele na ntoto mpi na zulu. Yandi kele ti makuki ya kuyidika bima ya kele na ntoto yina ke kumisa bamvula, bantangu mpi mipepe ngolo mpi ke niokula bantu.

• “Nge ke kebaka ntoto, nge ke salaka nde yo buta mingi kibeni mpi nde yo kuma ti kimvwama mingi.” (Nkunga 65:9) Ti lusakumunu ya Nzambi, ntoto ta kuma paladisu.

Sambu na kuzaba mambu mingi na yina me tala mambu yina Biblia tubaka na ntwala nde ntoto ta vutuka mutindu yo vandaka, tala disolo “Nani Ta Gulusa Ntoto?”