Anton Petrus/Moment via Getty Images
BENO LANDA KUKENGILA!
Keti Bitumba ya Ntoto ya Mvimba Ta Salama Ntama Ve?—Inki Biblia Ke Tuba?
Na bamvula 30 ya me luta, bantu mingi vandaka kumona bonso nde kinduku na kati ya bansi kele na kukuma mbote kibeni. Kansi mambu ya me katuka kusalama ke monisa nde diambu yai lenda vanda ve ya masonga.
Zulunalu mosi (Reuters) tubaka na Mposo 6 janvier 2024 nde: “Bantu ke wa boma nde bitumba yina ke salama na Gaza ta kota mpi na bansi ya nkaka ya kele pene-pene sambu insi Izraele mpi kimvuka ya Hezbollah me yantika kunwana na ndilu ya insi Liban.”
“Zulunalu ya nkaka (The New York Times) tubaka na Lumingu 7 janvier 2024 nde: “Bimvuka yina insi Iran ke twadisaka ke nwana bitumba na bisika ya mutindu na mutindu, mpi insi Iran me yantika mbala mosi kusala diaka minduku yina lenda fwa ntoto (armes nucléaires). Diaka insi Russie mpi insi Chine me sala kinduku ti insi Iran. Mambu yai yonso ke pesa bansi yina kele na ndambu ya westi boma.”
“Zulunalu ya nkaka diaka (UN News) tubaka na Kiya 11 janvier 2024 nde: “Babombi ya Russie ke landa kubebisa bima mingi na insi Ukraine.”
“Zulunalu ya nkaka diaka (The Japan Times) tubaka na Kizole 9 janvier 2024 nde: “Mutindu insi Chine ke landa kukuma ti mbongo mpi basoda mingi, mutindu bantu ya insi Taiwan ke landa kuzola insi na bo mingi kuluta ndilu, mpi mutindu insi Chine mpi insi États-Unis kele diaka ve ti kinduku ya mbote, lenda sala nde bitumba kusalama kukonda mpasi.”
Inki Biblia ke tuba sambu na mambu ke beba na nsi-ntoto ya mvimba, mambu yina beto ke mona bubu? Keti mambu yango ta nata bitumba na ntoto ya mvimba?
Biblia tubilaka na ntwala mambu ya ke salama bubu
Biblia tubilaka ve na ntwala bitumba mosi ya siki-siki na kati ya bitumba ya beto ke mona bubu yai. Kansi, yo tubilaka bitumba ya ke landa kusalama mingi mpi yina bantu lenda manisa ve mpi ya ke salama na ntangu na beto mpi ya ke katula “ngemba na ntoto.”—Kusonga 6:4.
Mukanda ya Daniele tubaka na ntwala nde “na ntangu ya nsuka,” bangolo ya insi-ntoto yina ke nwaninaka kiyeka ta ‘yinakana,’ to ta nwana sambu na kuyala. Na bitumba yango, bo ta basisa basoda mingi mpi bo ta sadilaka “bimvwama” mingi to mbongo mingi.—Daniele 11:40, 42, 43.
Bitumba yina ke kwisa
Biblia ke monisa nde mambu ta landa kubeba na nsi-ntoto na ntwala nde yo bonga. Yezu tubaka na ntwala nde “mpasi ya nene ta vanda, mpasi mosi ya me bwaka ntete ve katuka na luyantiku ya nsi-ntoto.” (Matayo 24:21) “Mpasi yina ya nene” ta nata na bitumba yina Biblia ke bingaka nde Armagedoni. Biblia ke monisaka nde yo kele “bitumba ya kilumbu ya nene ya Nzambi Nkwa-Ngolo Yonso.”—Kusonga 16:14, 16.
Kansi na bitumba ya Armagedoni, bantu ta guluka. Bitumba yai ta fwa ve bantu yonso. Nzambi ta sadila bitumba yina sambu na kutula nsuka na luyalu ya bana ya bantu sambu luyalu na bo me sala nde bitumba kusalama mingi mpi yo me fwa bantu. Sambu na kuzaba mutindu bitumba ya Armagedoni ta nata ngemba ya mvula na mvula na ntoto, tanga masolo yai ke landa: