Keti Bantu ya Mayele Ke Ndimaka nde Yezu Zingaka?

Mambu mingi ke ndimisaka bantu ya mayele nde Yezu zingaka kibeni. Sambu na mambu yina bantu ya istware ya mvu-nkama ya ntete mpi ya zole sonikaka sambu na Yezu mpi Bakristu ya ntete, mukanda mosi (Encyclopædia Britannica) yina basikaka na 2002 ke tuba nde: “Mambu yina muntu mosi-mosi sonikaka ke monisa nde na ntangu ya ntama, yo vanda bambeni ya dibundu ya Bukristu vandaka ve kubuya kundima nde Yezu zingaka kibeni. Bo tulaka ntembe na diambu yai sambu na mbala ya ntete na nsuka ya mvu-nkama ya 18, na mvu-nkama ya 19 mpi na luyantiku ya mvu-nkama ya 20.”

Na 2006, mukanda mosi (Jesus and Archaeology) tubaka nde: “Bubu yai, ata muntu mosi ve ya mayele mpi ya kele ya kwikama lenda tula ntembe nde yo vandaka ti Muyuda mosi na zina ya Yezu, mwana ya Yozefi; bantu mingi ke ndimaka nde nkutu sesepi beto me zaba mambu mingi na yina me tala bisalu na yandi mpi malongi na yandi.”

Biblia ke monisaka nde Yezu kele kibeni muntu ya kieleka. Yo ke pesaka bazina ya ba-nkaka na yandi mpi ya bantu ya dibuta na yandi. (Matayo 1:1; 13:55) Yo ke pesaka mpi bazina ya bamfumu yina vandaka kuyala na bilumbu ya Yezu. (Luka 3:1, 2) Mambu yai yonso lenda sadisa bantu ya ke salaka bansosa na kusosa kuzaba kana mambu ya kele na Biblia ke vandaka ya kieleka.