Keti Bambangi ya Yehowa Me Sobaka Biblia Sambu Yo Wakana ti Malongi na Bo?

Ve, beto me salaka ve mutindu yina. Nkutu kana beto me bakisa nde malongi na beto wakanaka ve ti mambu yina Biblia ke tubaka, beto ke yidikaka yo.

Beto vandaka kulonguka Biblia bamvula mingi na ntwala nde beto basisa Biblia—Mbalula ya Nsi-Ntoto ya Mpa na 1950. Beto vandaka kusadila Babiblia yina vandaka na ntangu yina mpi malongi na beto vandaka kukatuka kuna. Tala mwa malongi yina Bambangi ya Yehowa ke longaka banda ntama mpi tuba nge mosi kana malongi yango ke wakana kibeni ti yina Biblia ke longaka kibeni.

1. Malongi ya beto ke ndimaka: Nzambi kele ve Butatu Busantu. Nzo-Nzulu ya Sioni ya juillet 1882 tubaka nde: “Bantu yina ke tangaka mikanda na beto me zaba nde beto ke ndimilaka Yehowa mpi Yezu, mpi mpeve santu, kansi beto ke ndimaka ve ata fioti malongi yina ke vandaka ve na Biblia, yina ke tubaka nde yo kele ti Banzambi tatu na persona mosi to mpi Nzambi mosi na bapersona tatu.”

   Mambu Biblia ke tuba: “Yehowa Nzambi na beto kele Yehowa mosi kaka.” (Kulonga 6:4) “Beto ke na Nzambi mosi mpamba, Tata na beto yina salaka bima yonso. Beto ke zingaka sambu na yandi. Mpi, Mfumu mosi mpamba kele, Yesu Kristo. Nzambi salaka bima yonso na lusadisu na yandi, beto ke zingaka mpi na lusadisu na yandi.” (1 Bakorinto 8:6, Bible en Kituba) Yezu tubaka yandi mosi nde: “Tata me luta mono na nene.”—Yoane 14:28, Bible en Kituba.

2. Malongi ya beto ke ndimaka: Bantu ke niokwamaka ve mvula na mvula na bilungi ya tiya. Na kulanda Baroma 6:23 na Biblia King James Version, Nzozulu ya Nkengi ya Sioni ya juin 1882 ya vandaka ti ntu-diambu “Lufutu ya Disumu Kele Lufwa” tubaka nde: “Bangogo yango kele pwelele mpi pete. Yo kele diambu ya kuyituka mutindu bantu mingi yina ke tubaka nde bo ke ndimaka nde Biblia kele Ndinga ya Nzambi, ke landa kubalula mambu yina ya kele pwelele, mpi kutuba nde sambu na bo, Biblia ke longaka nde lufutu ya disumu kele kuniokwama mvula na mvula na bilungi ya tiya.”

   Mambu Biblia ke tuba: “Muntu yina ke salaka masumu yandi muntu ta fwa.” (Ezekiele 18:4, 20, Bible en Kituba) Ndola yina Nzambi ta pesa bantu yina ke telemina yandi kele ve mpasi ya mvula na mvula, kansi “lufwa ya mvula na mvula.”—2 Batesalonika 1:9, Bible en Kituba.

3. Malongi ya beto ke ndimaka: Kimfumu ya Nzambi kele guvernema ya kieleka, kansi yo ke vandaka ve na ntima ya muntu. Na yina me tala Kimfumu ya Nzambi, Nzozulu ya Nkengi ya Sioni ya décembre 1881 tubaka nde: “Ntangu bo ta tula Kimfumu yango, yo ta bwisa bimfumu yonso ya ntoto.”

   Mambu Biblia ke tuba: “Kansi ntangu ya bantotila yina ta yala, Nzambi ya zulu ta tula ntotila mosi yina ta yalaka tii kuna; ntotila yina bantotila ya nkaka ta bedisaka yandi ve, kansi yandi ta fwa bantotila yonso ebuna yandi ta yalaka tii kuna.”—Daniele 2:44, Bible en Kituba.

Keti Bambangi ya Yehowa ke sadilaka kaka Mbalula ya Nsi-Ntoto ya Mvimba sambu na kumonisa malongi na bo?

Ve, beto ke landaka mpi kusadila Babiblia mingi na kisalu na beto ya kulonga nsangu ya mbote. Nkutu, ata beto ke pesaka bantu yina beto ke longukaka ti bo Biblia Mbalula ya Nsi-Ntoto ya Mpa ya ofele, beto ke longukaka mpi ti bantu yina ke sepelaka kusadila Babiblia ya nkaka.