Sambu na Nki Bambangi ya Yehowa Me Sobaka Mambu ya Nkaka Yina Bo Vandaka Kundima?

Banda ntama, beto ke bakaka mambu ya beto ke ndimaka na Biblia. Yo yina, konso mbala ya beto ke bakisaka mbote mambu ya Biblia, yo ke lombaka nde beto soba mambu ya beto ke ndimaka.a

Kusala mutindu yina ke wakana ti mambu yai ya Biblia ke tuba na Bingana 4:18: “Nzila ya bantu ya lunungu kele bonso nsemo ya suka yina ke landaka kukuma mingi tii kuna mwini ke kuma ngolo kibeni.” Kana suka me tana, nsemo ke kwisaka malembe-malembe sambu bima yonso kumonika mbote-mbote. Mutindu mosi, Nzambi ke sadisaka malembe-malembe na kubakisa kieleka ya kele na Biblia na ntangu ya yandi me zola. (1 Piere 1:10-12) Biblia tubaka dezia na ntwala nde, Nzambi ta sala nde mambu yai kusalama mingi mpi nswalu na “ntangu ya nsuka.”—Daniele 12:4.

Mpila mutindu na beto ya kubakisa kieleka ya kele na Biblia ke kumaka diaka mbote kuluta, yo fwete yitukisa beto ve to kuyangisa beto. Bansadi ya Nzambi ya ntangu ya ntama vandaka mpi ti bangindu mpi banzala yina lunganaka ve mpi yo lombaka nde bo soba mutindu na bo ya kutadila mambu.

• Bamvula 40 na ntwala nde Nzambi kukumisa Moize muntu ya fwete basisa bana ya Izraele na kimpika, Moize kudipesaka mukumba yina yandi mosi.—Bisalu 7:23-25, 30, 35.

• Bantumwa vandaka ve kubakisa mambu ya me tala lufwa mpi lufutumuku ya Mesia.—Yezaya 53:8-12; Matayo 16:21-23.

• Bankristu ya mvu-nkama ya ntete vandaka kudikusa na yina me tala ntangu yina “kilumbu ya Yehowa” fwete kwisa.—2 Batesalonika 2:1, 2.

Na nima, Nzambi sadisaka bo na kubika kudikusa mutindu yina mpi beto ke sambaka yandi na kusala mpi mutindu yina sambu na beto.—Yakobo 1:5.