Sambu na Nki Bambangi ya Yehowa Ke Tubaka Ve Ata Kima na Mambu Yonso ya Luvunu Yina Bantu Ke Kusilaka Bo?
Bambangi ya Yehowa ke zitisaka ndongisila ya Biblia ya kutuba ve ata kima kana bantu ke kusila bo makambu mpi ke seka bo. Mu mbandu, kingana mosi ya Biblia ke tuba nde: “Muntu yina ke sungika muntu ya ke sekaka bantu ke kudinatila nsoni.” (Bingana 9:7, 8; 26:4) Na kisika ya kuswana sambu na mambu ya kukonda mfunu yina bantu ke kusilaka beto, beto ke sosaka ntete kusepedisa Nzambi.—Nkunga 119:69.
Ya kieleka, kele ti “ntangu ya kuvanda pima mpi ntangu ya kutuba.” (Longi 3:7) Beto ke pesaka mvutu na bantu ya masonga yina ke vandaka kibeni na mfunu ya kuzaba kieleka, kansi beto ke buyaka kuswana sambu na mambu ya kukonda mfunu. Na mutindu yina, beto ke landaka malongi mpi mbandu ya Yezu ti ya Bakristu ya ntete.
Yezu tubaka ve ata kima ntangu bantu vandaka kukusila yandi makambu na ntwala ya Pilate. (Matayo 27:11-14; 1 Piere 2:21-23) Mutindu mosi, Yezu tubaka ve ata kima ntangu bo kusilaka yandi makambu nde yandi kele muntu ya ke diaka mbiki mpi ya ke nwaka vinu mingi. Na kisika ya kusala mutindu yina, yandi bikaka nde bisalu na yandi kusadisa bo na kubaka mvutu, na kuwakana ti munsiku yai: “Mayele ke monanaka ya lunungu na bisalu na yo.” (Matayo 11:19) Ata mpidina, bantangu ya nkaka, yandi vandaka kupesa mvutu ti kikesa yonso na bantu yina vandaka kukusila yandi makabu.—Matayo 15:1-3; Marko 3:22-30.
Yezu longaka balongoki na yandi na kubika ve nde mambu yina bo vandaka kukusila bo kulembisa bo. Yandi tubaka nde: “Kiese na beno kana bantu ke finga beno, ke monisa beno mpasi, mpi ke kusila beno makambu ya mutindu na mutindu sambu na mono.” (Matayo 5:11, 12) Kansi, Yezu tubaka mpi nde mambu yina bo ke kusila bo ta pesa balongoki na yandi dibaku ya kulonga nsangu ya mbote; na ntangu yina, yandi ta lungisa lusilu yai: “Mono ta pesa beno bangogo mpi mayele yina bambeni na beno yonso ta kuka ve kunwanisa to kutudila ntembe.”—Luka 21:12-15.
Ntumwa Polo pesaka Bakristu ndongisila ya kubuya kuswana ti bambeni sambu na mambu ya kukonda mfunu, yandi tubaka nde kuswana yina kele “mfunu ve mpi yo kele mpamba.”—Tito 3:9; Baroma 16:17, 18.
Ntumwa Piere siamisaka Bakristu na kunwanina kivuvu na bo kana mpila kele. (1 Piere 3:15) Ata mpidina, yandi zabaka nde mbala mingi yo ke vandaka mbote mingi na kusala yo na bisalu kansi ve na kutuba. Yandi sonikaka nde: “Na ntangu beno ke sala mambu ya mbote, beno sukisa kutuba ya buzoba ya bazoba.”—1 Piere 2:12-15.